ނޫސްވެރިޔާ އަހްމަދު ރިލްވާން ވަގަށް ނެގި މައްސަލައިގައި ދައުލަތުން ދައުވާކުރި މީހުންގެ މައްޗަށް ކްރިމިނަލް ކޯޓުގައި ކުށް ސާބިތު ނުވާ ކަމަށް ކުރި ހުކުމް އިސްތިއުނާފުކުރަން ހުށަހަޅާފައިނުވާ ކަމަށް ހައި ކޯޓުން މިރޭ ބުނެފި އެވެ.
ރިލްވާން ގަދަކަމުން ފޮރުވި ކަމަށް ބުނެ ދައުލަތުން ޓެރަރިޒަމްގެ ދައުވާކުރީ ހ. ހިލްޓަން އާލިފް ރައޫފާއި ގދ. ވާދޫ ކަރަންކާގޭ މުހައްމަދު ނޫރައްދީންގެ މައްޗަށެވެ. ދައުލަތުން ތުހުމަތު ކުރި ގޮތުގައި ރިލްވާން ގަދަކަމުން ފޮރުވީ އާލިފް ގެންގުޅުނު ރަތް ކުލައިގެ ކާރަކަށް ރިލްވާން އަރުވައިގެން ގެންގޮސްގެންނެވެ. ނަމަވެސް އެއްވެސް މީހެއްގެ މައްޗަށް ކުށް ސާބިތު ނުވާކަމަށް އޮގަސްޓް 2، 2018 ގައި ދަށު ކޯޓުން ވަނީ ހުކުމްކޮށްފަ އެވެ.
ހުކުމް ކުރި ދުވަހު، އެ މައްސަލަ އިސްތިއުނާފުކުރުމުގެ ހުއްދަ އަށް ހައި ކޯޓުގައި އެދިފައި ވާނެ ކަމަށް ޕްރޮސިކިއުޓާ ޖެނެރަލްގެ އޮފީހުން ވަނީ ބުނެފަ އެވެ. ނަމަވެސް ހައި ކޯޓުން ވަނީ އެކަން ދޮގުކޮށްފަ އެވެ.
އެ މައްސަލައާ ގުޅިގެން ހައި ކޯޓުން ނެރުނު ބަޔާނުގައި ބުނީ، ކްރިމިނަލް ކޯޓުގެ ހުކުމް އިސްތިއުނާފުކުރަން ގަސްތުކުރާ ކަމަށް ބުނެ، އެ ހުކުމް ކުރި ދުވަހު ޕީޖީ އޮފީހުން ސިޓީއެއް ފޮނުވާފައިވާ ކަމަށެވެ. އެ ސިޓީގައި ބުނެފައިވަނީ މައްސަލައިގެ ޝަރީއަތް ނިމުނު ގޮތުގެ ރިޕޯޓް ލިބުމުން އިސްތިއުނާފުކުރަން ހުށަހެޅުމުގެ ހުއްދަ ދިނުމަށެވެ. ޕީޖީގެ ސިޓީއަށް، އޮގަސްޓް 6، 2018 ގައި ޖަވާބުދީފައިވާނެ ކަމަށް ކޯޓުން ބުންޏެވެ.
"ކޯޓުން ދިން ޖަވާބުގައި ދަންނަވާފައިވާނީ، ފުރަތަމަ މަރުހަލާގެ ކޯޓަކުން ނުވަތަ ޓްރައިބިއުނަލަކުން ނިންމާ ނިންމުން އިސްތިއުނާފަށް ހުށަހަޅަން ޖެހޭ މުއްދަތުކަމުގައިވާ ދިވެހިރާއްޖޭގެ ސުޕްރީމް ކޯޓުގެ ސާކިއުލާގައި ބަޔާންކުރައްވާފައިވާ 10 ދުވަސް ފާއިތުވުމަށް ފަހު ހުށަހަޅާ މައްސަލައެއް ނަމަ، އެ މައްސަލައެއް ހުށަހަޅަން ޖެހޭނީ ހައިކޯޓުގެ ގަވާއިދުގެ ދަށުން އިސްތިއުނާފުކުރުމުގެ ހުއްދައަށް އެދިކަމުގައި ދެންނެވީމެވެ. އަދި މި ދެންނެވުނު މާއްދާގެ ދަށުން މައްސަލަ ހުށަހެޅުމުން ގަވައިދާ އެއްގޮތްވާ ގޮތުގެ މަތިން އެ މައްސަލައަކާ މެދު ގޮތެއް ނިންމޭނެ ކަމުގައި ދަންނަވަމެވެ." ބަޔާނުގައި ބުނެފައިވެ އެވެ.
ރިލްވާންގެ މައްސަލައާ ގުޅިގެން ޕީޖީ އޮފީހާއި ހައި ކޯޓާ ދެމެދު އިތުރު މުއާމަލާތެއް ކޮށްފައިނުވާ ކަމަށް ބަޔާނުގައި ބުންޏެވެ. އަދި އެ އޮފީހަށް ޖަވާބުދިންތާ އަހަރެއްވިއިރު ވެސް މައްސަލަ އިސްތިއުނާފުކުރަން ނުވަތަ އިސްތިއުނާފުކުރުމުގެ ހުއްދައަށް އެދި ހުށަހަޅާފައިނުވާ ކަމަށް ބުންޏެވެ.
"އެހެންކަމުން، ރައްޔިތުންގެ ހިތްތަކުގައި ދިވެހިރާއްޖޭގެ ހައިކޯޓުގެ އަގުވެއްޓޭ ގޮތަށް ވާހަކަފުޅު ނުދެއްކެވުމަށާއި ކަމުގެ ހަގީގަތް އޮޅޭ ގޮތަށް ޓްވީޓު ނުކުރެއްވުމަށް ޕްރޮސިކިއުޓާ ޖެނެރަލްގެ އޮފީހަށް އިލްތިމާސް ކުރަމެވެ،" ބަޔާނުގައި ބުނެފައިވެ އެވެ.