ރިޔާޒް (ސެޕްޓެމްބަރު 14) - ސައުދީ އަރަބިއާގެ ގައުމީ ތެޔޮ ކުންފުނި އަރާމްކޯ އިން ތެޔޮ ޕްރޮސެސްކުރާ މުހިންމު ދެ ތަނަކަށް ޑްރޯން ހަމަލާއެއްދީ އަލިފާން ރޯކޮށްލައިފި އެވެ.
އަބްގައިގުގައި ހުންނަ ދުނިޔޭގެ އެންމެ ބޮޑު ތެޔޮ ޕްރޮސެސިން ޕްލާންޓަށް ދިން ހަމަލާގައި އަލިފާން ރޯވެ ދުން އަރާ މަންޒަރުގެ ފޮޓޯތައް ދަނީ ދައުރުވަމުންނެވެ. ދެ ވަނަ ހަމަލާދީފައި ވަނީ ސައުދީގެ ދެ ވަނަ އަށް އެންމެ ބޮޑު އޮއިލް ފީލްޑް އޮންނަ ޚުރައިސްއަށެވެ. ސައުދީ އަރަބިއާގެ ރަސްމީ މީޑިއާ އިން ބުނެފައި ވަނީ ދެ ތަނުގައި ވެސް ރޯވެފައިވާ އަލިފާން މިހާރު ކޮންޓްރޯލްކޮށްފައިވާ ކަމަށެވެ.
ޑްރޯން ހަމަލާ ދިން ކަމަށް ތުހުމަތުކޮށްފައި ވަނީ ޔަމަނުގެ ހޫތީ ހަނގުރާމަވެރިންނަށެވެ. ނަމަވެސް ހަމަލާގެ ޒިންމާ އުފުލަން ޖެހޭ މީހުން ސައުދީ މީޑިއާ އިން ރަސްމީކޮށް ބުނެފައެއް ނުވެ އެވެ.
އަބްގައިގު އޮންނަނީ ސައުދީގެ އީސްޓަން ޕްރޮވިންސްގެ ހުޅަނގު ދެކުނުން 60 ކިލޯމީޓަރު (37 މޭލު) ދުރުގަ އެވެ. ޚުރައިސް އޮންނަނީ ހުޅަނގު ދެކުނުން 200 ކިލޯ މީޓަރު ދުރުގަ އެވެ.
ހޫތީން މީގެ ކުރިން ވަނީ ސައުދީގެ ދެ އޮއިލްފީލްޑަކަށް ޑްރޯން ހަމަލާ ދީފަ އެވެ.
ސައުދީ އިސްވެ އުފައްދާފައިވާ ކޯލިޝަނުން ހޫތީންނާ ދެކޮޅަށް ވައިގެ ހަމަލާދޭން ފަށާފައި ވަނީ މާޗް 2015 ގަ އެވެ.
