ރިޔާޒް (ނޮވެމްބަރު 4) - ދުނިޔޭގެ އެންމެ ފައިދާ ބޮޑު ކުންފުނި، ސައުދީ އަރަބިއާގެ ގައުމީ ތެޔޮ ކުންފުނި އަރާމްކޯގެ ހިއްސާ ވިއްކަން ތައްޔާރުވެ، ވެރިރަށް ރިޔާޒުގެ ސްޓޮކް އެކްސްޗޭންޖުގައި ލިސްޓް ކުރާނެކަން އިއުލާންކޮށްފި އެވެ.
އަރާމްކޯގެ ހިއްސާ ވިއްކަން ފެށުން ވެގެންދާނީ ދުނިޔޭގެ އެންމެ ބޮޑު އިނިޝަލް ޕަބްލިކް އޮފާރިން (އައިޕީއޯ) އަށެވެ. އިންވެސްޓަރުންގެ ޝައުގަށް ބެލުމަށް ފަހު އައިޕީއޯގެ އަގު ކަނޑައަޅާނެ ކަމަށް އަރާމްކޯ އިން ބުނެ އެވެ.
ބައެއް ފަރާތްތަކުން ލަފާކޮށްފައިވާ ގޮތުގައި އަރާމްކޯ އިން ވިއްކާނީ 1-2 ޕަސެންޓް ހިއްސާ އެވެ.
އަރާމްކޯ އިން ބުނީ ބޭރުގެ ގައުމެއްގައި ލިސްޓް ކުރަން އަދި ހަމަޖެހިފައި ނުވާ ކަމަށެވެ.
"އިންޓަނޭޝަނަލް ލިސްޓިންއާ ބެހޭ މައުލޫމާތު ފަހުން ހާމަކުރާނަން. މި ވަގުތު ލިސްޓް ކުރާނީ ތަދައްވުލް (ސައުދީ ސްޓޮކް އެކްސްޗޭންޖް)ގައި އެކަނި،" ނޫސްވެރިންގެ ބައްދަލުވުމުގައި އަރާމްކޯގެ ޗެއާމަން ޔާސިރު އަލް ރުމައްޔާ ވިދާޅުވި އެވެ.
އަރާމްކޯގެ ރައީސް އަދި ސީއީއޯ އަމީން ނާސިރު ވިދާޅުވީ ކުންފުނީގެ ހިއްސާ ލިސްޓް ކުރުން ވެގެންދާނީ ވަރަށް ތާރީޚީ ކަމަކަށް ކަމަށެވެ.
އަރާމްކޯ- ދުނިޔޭގެ އެންމެ ބޮޑު ކުންފުނި
ދުނިޔޭގެ ކުންފުނިތަކުގެ ތެރޭން މިދިޔަ އަހަރު އެންމެ ބޮޑު ފައިދާއެއް ހޯދާފައި ވަނީ އަރާމްކޯ އެވެ. ކުންފުނީގެ އެކައުންޓްތަކާ ބެހޭ މައުލޫމާތު ފުރަތަމަ ފަހަރަށް ހާމަކުރިއިރު އަރާމްކޯ އަަށް މިދިޔަ އަހަރު ސާފު ފައިދާގެ ގޮތުގައި 111.1 ބިލިއަން ޑޮލަރު ލިބިފައިވާ ކަމަށް ހިސާބުތަކުން ދައްކަ އެވެ.
ޓެކްސް އަށް ނުކަނޑާ އަރާމްކޯގެ އާމްދަނީ އަކީ 224 ބިލިއަން ޑޮލަރެވެ. މިއީ ދުނިޔޭގެ އެންމެ ބޮޑު ފަސް ތެޔޮ ކުންފުނީގެ ފައިދާއާ ނުބައްދަލު އަދަދެކެވެ. އެމެރިކާގެ ތެޔޮ ކުންފުނި ޝެވްރޮން އާއި އެގްޒޮން މޯބިލް، އިނގިރޭސި ވިލާތުގެ ބީޕީ، އިނގިރޭސި ވިލާތާއި ހޮލެންޑުގެ ރޯޔަލް ޑަޗް ޝެލް އަދި ފްރާންސްގެ ޓޯޓަލް ކުންފުނީގެ ސާފު ފައިދާ އަކީ 80 ބިލިއަން ޑޮލަރެވެ. ފަސް ކުންފުނީގެ މިދިޔަ އަހަރުގެ އާމްދަނީ އަކީ 359.9 ބިލިއަން ޑޮލަރެވެ. އެމެރިކާގެ ޓެކް ކުންފުނި އެޕަލްގެ މިދިޔަ އަހަރުގެ ސާފު ފައިދާ އަކީ 50 ބިލިއަން ޑޮލަރެވެ.
އަރާމްކޯ އިން މިދިޔަ އަހަރު އެވްރެޖްކޮށް ވަނީ 10.3 މިލިއަން ފީފާ ތެޔޮ އުފައްދައިފަ އެވެ.