އެސިސްޓެންޓް ޕްރޮސެކިއުޓާ ޖެނެރަލް (ޕީޖީ) ގެ މަގާމަށް މިއަދު ބޭފުޅަކު ހަމަޖައްސައިފި އެވެ.
އެ އޮފީހުގައި ގިނަ އަހަރުތަކެއް ވަންދެން މަސައްކަތް ކުރައްވާފައިވާ ޝަމްރާ ޝަމީމް، އެސިސްޓެންޓް ޕީޖީއަކަށް އައްޔަންކުރެއްވި ކަމުގެ ލިޔުން ޕީޖީ އައިޝަތު ބިޝާމް ވަނީ މިއަދު ދެއްވައިފަ އެވެ.
ތަފާތު އެކި މައްސަލަތަކުގައި ކޯޓަށް ވަޑައިގަންނަވާ ޝަމްރާ ވަނީ، ކުރީގެ އުއްތަމަ ފަނޑިޔާރު އަބްދުﷲ ސައީދުގެ މައްޗަށް ކުރި، ދައުލަތުގެ މަސައްކަތަށް ހުރަސް އެޅުމުގެ ދައުވާގައި ދައުލަތުގެ ވަކީލެއްގެ ގޮތުގައި ވަޑައިގެންފަ އެވެ.
އެ ދައުވާ ކުރެއްވީ ގަވަމެންޓް އީ ލެޓާ މެނޭޖްމަންޓް ސިސްޓަމް (ޖެމްސް) ގެ ޚިދުމަތް ސުޕްރީމް ކޯޓުން ކަނޑާލަން އުއްތަމަ ފަނޑިޔާރު އަބްދުﷲ ސައީދު އެންގެވި މައްސަލައިގަ އެވެ.
އެސިސްޓެންޓް ޕީޖީގެ މަގާމުގައި މިހާރު ވެސް ދެ ބޭފުޅުން އެބަތިއްބެވި އެވެ. އެއީ ޖިހާދާ އަނީސާއި ހުސެއިން ނާޝިދެވެ.