ގައުމީ ފުޓްބޯޅަ ޓީމުތަކުގެ ކަންތައްތަކުގައި އެފްއޭއެމްގެ އެގްޒެކްޓިވް ކޮމިޓީ އަށް ލަފާދިނުމަށް އެކުލަވާލި ފަސް މެމްބަރުންގެ ކޮމިޓީގެ ޗެއާމަންގެ މަގާމަށް ޓޫރިޒަމް މިނިސްޓަރު އަލީ ވަހީދު ހަމަޖައްސައިފި އެވެ.
ރާއްޖޭގެ ޒުވާން ގައުމީ ފުޓްބޯޅަ ޓީމު 18 އަހަރުން ދަށުގެ ސާފް ޗެމްޕިއަންޝިޕްގައި ލޯ މެޑަލް ހޯދުމުން އެކަމަކުގެ އުފާފާޅުކުރުމަށް ރޭ ހޮޓެލް ޖެންގައި ބޭއްވި ރަސްމިއްޔާތެއްގައި އެކަން އިއުލާނުކުރެއްވީ އެފްއޭއެމްގެ ރައީސް ބައްސާމް އަދީލް ޖަލީލް އެވެ.
"މި ކޮމިޓީގެ ޗެއާމަން ކަމުން އަޅުގަނޑު ފަހަތަށް ޖެހިލާފައި ހަވާލުމި ކުރަނީ ހީވާގި ޓުއަރިޒަމް މިނިސްޓަރު އަލީ ވަހީދަށް. އަލީ ވަހީދަކީ ދިވެހިރާއްޖޭގެ ކްލަބެއް ހިންގައި ރާއްޖޭގެ ކުޅިވަރަށް އިންގިލާބީ ބަދަލެއް ގެނައި އިސް ފަރާތެއް. ކްލަބެއްގެ ޗެއާމަން ކުރެއްވި ފަރާތެއް. އަލީ ވަހީދުގެ ޗެއާމަން ކަމުގައި ދުރު ވިސްނުމާ އެކީގައި ނިއު ރޭޑިންޓުން ހަތަރު އަހަރު ގިނަ ކާމިޔާބީތަކެއް ހޯދި،" ބައްސާމް ރޭ ވިދާޅުވި އެވެ.
މިދިޔަ މަހު 19 ވަނަ ދުވަހު މި ކޮމިޓީ އެންމެ ފުރަތަމަ އެކުލަވާލީ އަލީ ވަހީދުގެ އިތުރުން ސްޕޯޓްސް މިނިސްޓަރު އަހުމަދު މަހުލޫފް ވެސް ހިމަނައިގެންނެވެ. އެކަމަކު ކުޅިވަރާ ބެހޭ ވަޒީރު މި ފަދަ ކޮމިޓީއެއްގައި ހިމެނުމަކީ އެންމެ ރަނގަޅު ގޮތް ނޫން ކަމަށް ބުނެ އެކި ފާޑުކިޔުންތައް އަމާޒުވެ ޕްރެޝަރު ބޮޑުވުމުން ވަކިވީ އެވެ.
"މަހުލޫފްގެ އެހީތެރިކަން މި ކޮމިޓީ އަށް ލިބިގެންދާނެ. މިނިސްޓަރު ރިޕްރެޒެންޓްކުރާ ފަރާތެއް މި ކޮމިޓީގައި ހިމެނިގެންދާނެ. އެހެންވީމަ މިނިސްޓަރުގެ ލަފާ ވެސް ހިމެނޭނެ،" ބައްސާމް ވިދާޅުވި އެވެ.
މި ކޮމިޓީގައި ދެން ހިމެނެނީ އެފްއޭއެމްގެ ރައީސް ބައްސާމާއި އޮލިމްޕިކް ކޮމިޓީގެ ރައީސް މުހައްމަދު ޝަވީދުގެ އިތުރުން ބެޑްމިންޓަން އެސޯސިއޭޝަންގެ ރައީސް އަދި އޮލިމްޕިކް ކޮމިޓީގެ އެގްޒެކްޓިވް ކޮމިޓީގެ މެމްބަރު މޫސާ ނާޝިދު އެވެ.
އަލީ ވަހީދު ވިދާޅުވީ ރާއްޖޭގެ ފުޓްބޯޅައިގައި މި ވަގުތު ހާލަތު އެންމެ ރަނގަޅު ނޫން ކަމަށާއި އެކަން ރަނގަޅުކުރަން ވަކިވަކިވެގެން މަސައްކަތް ކޮށްގެން ހައްލެއް ނެތް ކަމަށެވެ. އަދި ކޮމިޓީއާ ގުޅެން ނިންމީ ރައީސް އިބްރާހިމް މުހައްމަދު ސޯލިހުގެ ހުއްދަ ވެސް ލިބިގެން ކަމަށާއި މި ކޮމިޓީއާ ބެހޭގޮތުން މީގެ ކުރިން ވާހަކަ ދެއްކުން ލަސްވީ ވެސް އެހެންވުމުން ކަމަށެވެ.
މި ސަރުކާރުގެ އެކްޓިން ސްޕޯޓްސް މިނިސްޓަރުގެ މަގާމު ވެސް ފުރުއްވި އަލީ ވަހީދު ރޭ ވިދާޅުވީ ރާއްޖޭގެ ފުޓްބޯޅައިގެ ކަންތައްތައް ހައްލުކުރަން ކުރު މުއްދަތާއި ދުރު ވިސްނުމުގެ ޕްލޭނެއް އޮންނަން ޖެހޭ ކަމަށެވެ. އެ ގޮތުން ކައިރި މުސްތަގުބަލެއްގައި ހާސިލްކުރެވެން އޮތީ އޭޝިއަން ކަޕަށް ކޮލިފައިވުމުގެ ޓާގެޓް ކަމަށާއި ދުރު ވިސްނުމުގެ ކަންތައްތަކަށް މަސައްކަތް ކުރެވޭނީ ރާއްޖޭގެ ފުޓްބޯޅަ ކްލަބްތަކުގެ ހާލަތު ރަނގަޅުކޮށްގެން ކަމަށެވެ.
"މި ކޮމިޓީގައި އަޅުގަނޑު އިންނަން ބޭނުމީ ޓޫރިޒަމް މިނިސްޓްރީގެ ގޮތުގައެއް ނޫން. އެއީ ބޯނަސް އެއް. އެހެންވީމަ ޓޫރިޒަމް މިނިސްޓަރު ދޭނީ އެހެން އެއްޗެއް މި ކޮމިޓީގައި މަސައްކަތްކުރާނީ އަލީ ވަހީދު. އެންމެން ޖެހޭނެ ފުލް ކޮމިޓްމަންޓް ދޭން ކާމިޔާބު ބޭނުމިއްޔާ 100 ޕަސެންޓް ދޭންޖެހޭ،" އަލީ ވަހީދު ވިދާޅުވި އެވެ.
"ޝޯޓް ޓާމް ކަމަކަށް ބަލާއިރު ރާއްޖޭގެ އެންމެން އަޒުމް ކަނޑައަޅަންވީ އަންނަ މަހު 14 އާއި 19 ވަނަ ދުވަހު މި އޮތް ދެ މެޗުން ފިލިޕީންސާ ގުއާމް ބަލިކުރަން. މި ކަމަށް ހުރިހާ އެންމެން ގައުމީ ޓީމު ފަހަތުގައި އޮންނަން ޖެހޭ،"
އޭނާ ވިދާޅުވީ ރާއްޖޭގެ ކްލަބްތަކުގެ ހާލަތަށް ބަލާއިރު ރަނގަޅަށް ހިންގާ ކްލަބަކަށް އޮތީ މާޒިޔާ ކަމަށާއި އީގަލްސް އާއި ޓީސީ ސްޕޯޓްސް ކްލަބް ފަދަ މަސައްކަތްކުރާ ކްލަބްތައް ބިކަވަމުން އަންނަ ކަމަށެވެ. އަދި ނިއު ރޭޑިއަންޓާއި ވެލެންސިއާ އަދި ވިކްޓްރީ ފަދަ ފުޓްބޯޅައިގެ ވަރުގަދަ ބާރުތައް ވުޖޫދުން ފޮހެވޭ ހިސާބުގައި އޮވެގެން ފުޓްބޯޅަ ރަނގަޅު ހާލަތަކަށް ގެންދަން އުނދަގޫ ކަމަށް ވިދާޅުވި އެވެ.
"ކްލަބްތަކަށް ބަލާއިރު ބޮޑެތި ކްލަބްތައް މި އޮތީ ސެކިއާ ކުރަންޖެހިފައި. އެ އަޅުގަނޑުމެން އެޑްރެސް ކުރާނެ ކަންތައް. ބައެއް ސަޕޯޓަރުންގެ ކަންބޮޑުވުން އެބަހުރި ކިހިނެއްބާއޭ ދެން ވާނީ ނިއު ރޭޑިއަންޓް، ވިކްޓްރީ، ވެލެންސިއާ މި ކްލަބްތައް ގާތްގަނޑަކަށް މި ވުޖޫދުން ފޮހެވެނީ. އެ އަނބުރާ އަންނާނީ ކިހިނެއްތޯ. އެ އަޅުގަނޑުމެން ހޯދާނެ ކަންތައްތައް. ދެން އަނެއްކާ އެ ކްލަބްތައް އެތަނަށް ދާނެތޯ އެއީ ވެސް އަޅުގަނޑުމެން ހޯދާނެ ކަމެއް،" އަލީ ވަހީދު ވިދާޅުވި އެެވެ.
"މަސައްކަތް މި ކުރަނީ ކުންފުނިތަކާއި ވިޔަފާރިތަކާއި އެހެނިހެން ވެސް ފަރާތްތައް މީގެ ކްލަބްތަކާއި އެފްއޭއެމާއި ބައިވެރިވެގެން މަސައްކަތް ކުރެވޭނެ ގޮތްތަކެއް ހޯދުން،"
ގަލޮޅު ދަނޑު އެކި ކަންކަމަށް ބޭނުން ކުރުމަކީ ވެސް ބަލައިގަނެވޭނެ ކަމެއް ނޫން ކަމަށް އަލީ ވަހީދު ވިދާޅުވި އެވެ.
އެކްޓިން ސްޕޯޓްސް މިނިސްޓަރުގެ މަގާމު އަލީ ވަހީދު ފުރުއްވަމުން އައިއިރު އެފްއޭއެމްގެ ލީޑަޝިޕް ބަދަލުކުރަން އުޅޭ ކަމުގެ ތުހުމަތު އެފްއޭއެމުން އަލީ ވަހީދުގެ މައްޗަށް ވެސް ކުރި އެވެ. އެކަމަކު އަލީ ވަހީދު ރޭ ވިދާޅުވީ ކުރިން ހިނގާދިޔަ ކަންތައްތަކާ މެދު ވިސްނައިގެން ރުޅި އައިސްގެން ތިބެގެން ރާއްޖޭގެ ފުޓްބޯޅަ ހަލާކުވެގެންދާން ނޭދޭ ކަމަށެވެ.
"ގައުމީ ޓީމު ތަމްސީލެއް ނުކުރެވޭނެ ހަމައެކަނި އަޅުގަނޑަށް. މިނިސްޓަރު މަހުލޫފަކަށް. ބައްސާމް ނޫނީ ގައުމީ ޓީމަށް އެއަރާ 11 ކުޅުންތެރިން ނޫނީ ސްކޮޑުގައި ހިމެނޭ 23 ކުޅުންތެރިންނަށް. ގައުމީ ޓީމު ތަމްސީލްކުރެވޭނީ ހުރިހާ އެންމެން އެކުވެގެން،" އަލީ ވަހީދު ވިދާޅުވި އެވެ.
މިިނިސްޓަރު މަހުލޫފް ވިދާޅުވީ އަލީ ވަހީދު މި ކޮމިޓީގެ ކަންތައްތައް ވަރަށް ރަނގަޅަށް ކުރާނެކަން އެނގޭ ކަމަށާއި ހޯދެން އޮތް ހައްލުތަކަށް ވެސް މަސައްކަތް ކުރައްވާނެ ކަމަށެވެ.
"އެ ޖޯޝު ހުރެ އެ ފޯރީގައި ހުރެ މިހާރު މިނިސްޓަރަކަށް ހުންނަވާއިރު އަޅުގަނޑަށް ޔަގީން އެކި ދިމަދިމާލުން ލާރި އެއްކުރައްވައިގެން ކޮންމެވެސް އެހެން ގޮތަކަށް ކުރަން ހުރި ކަންތައްތައް ވެސް ނިންމާނެ. މި އުޅެނީ ފުޓްބޯޅަ ރަނގަޅު ކުރެވޭތޯ. މާލޭގައި ފުޓްބޯޅަ ނެތިގެންދާން އުޅޭތީ މިހާރު މި އުޅެނީ އަތޮޅު ތެރޭގައި ވަރަށް ރަނގަޅަށް ޖައްސައިގެން ވާންކޮށް މި އަޑު ކިޔާލައިގެން ދާހެން ކުރިއަށްދާން،" މަހުލޫފް ވިދާޅުވި އެވެ.