ރޭ ދަންވަރު ރާއްޖޭގެ އެންމެ އުތުރުގެ ސަރަހައްދަށް އައި ބިންހެލުމެއްގެ އަސަރު އެ ސަރަހައްދުގެ ބައެއް ރަށްތަކަށް ކޮށްފި އެވެ.
ބިންހެލުންތައް ދިރާސާކުރާ ޔޫއެސް ޖިއޮލޮޖިކަލް ސާވޭ އިން ބުނެފައިވާ ގޮތުގައި ބިންހެލުން އައީ ހއ. ދިއްދޫއާ 47.2 މޭލު ބޭރުން ކަނޑުގެ ބިމުގެ 10 ކިލޯމީޓަރު ފުނުންނެވެ. ބިންހެލުމުގެ ބާރުމިނަކީ 4.5 މެގްނިޓިއުޑެވެ.
ރާއްޖޭގެ މޫސުމާ ބެހޭ އިދާރާ އިން ބުނީ އުތުރުގެ ބައެއް ރަށްރަށުގެ ބިންގަނޑަށް ލޮޅުމެއް އެރިކަމުގެ ރިޕޯޓްތައް ލިބިފައިވާ ކަމަށާއި ރާއްޖޭ ގަޑިން ރޭ ދަންވަރު 1:47 ހާއިރު ލޮޅުމެއް އެރިކަން، ހދ. ހަނިމާދޫގައި ގާއިމުކޮށްފައިވާ ބިންހެލުން ރެކޯޑްކުރާ މީޓަރަށް ފާހަގަވެފައިވާ ކަމަށެވެ.
މި ލޮޅުމުގެ ސަބަބުން ރާއްޖެ އަށް ގެއްލުމެއް ކުރިމަތިވެދާނެ ކަމަށް ނުބެލެވޭ ކަމަށް ވެސް މެޓް އޮފީހުން ބުންޏެވެ. ނަމަވެސް މިކަމާ ބެހޭ ގޮތުން ބަލަންޖެހޭ ކަންކަން ބަލަމުން އަންނަ ކަމަށް ބުންޏެވެ.
އުތުރުގެ ބައެއް ރަށްރަށުން ބިންހެލުމުގެ އަސަރު ވަރަށް ބޮޑަށް ކުރި ކަމަށް ބުންޏެވެ. ބައެއް މީހުން ބުނި ގޮތުގައި ލޮޅުން އެރި ވަގުތު ނިދާފައި ތިބި ބައެއް މީހުންނަށް ވެސް ހޭލެވުނެވެ.