އެންމެ ކުޑަ އުޖޫރަ މި މަހު ކަނޑައަޅާނަން: ފައްޔާޒް

ރާއްޖޭގައި ވަޒީފާ އަދާކުރާ މީހުންނަށް ދެވޭނެ އެންމެ ކުޑަ އުޖޫރަ މި މަސް ނިމުގެ ކުރިން ކަނޑައަޅުއްވާނެ ކަމަށް އިކޮނޮމިކް މިނިސްޓަރު ފައްޔާޒް އިސްމާއީލް މިއަދު ވިދާޅުވެއްޖެ އެވެ.

ފައްޔާޒް ކުރެއްވި ޓްވީޓެއްގައި ވިދާޅުވީ އެންމެ ކުޑަ އުޖޫރަ ކަނޑައަޅާނެ އުސޫލާއި އަދަދާ މެދު މަޝްވަރާކުރުމަށް ފަހު، މި މަސް ނިމުމުގެ ކުރިން އެ ކަން ކަނޑައަޅުއްވާނެ ކަމަށެވެ. އެއީ ވަޒީފާއާ ބެހޭ ގާނޫނަށް މިހާރު ހުށަހަޅާފައިވާ އިސްލާހާ ގުޅުމެއް ހުރި ކަމެއް ނޫން ކަމަށް ވެސް އޭނާ ވިދާޅުވި އެވެ.

"އެންމެ ކުޑަ އުޖޫރަ ފުރަތަމަ ފަހަރަށް އިއުލާނު ކުުރުމާ، ވަޒީފާގެ ގާނޫނަށް ގެންނަ ބަދަލާ ގުޅުމެއް ނެތް،" ޓްވީޓްގައި ފައްްޔާޒް ވިދާޅުވި އެވެ.

ރާއްޖޭގައި ވަޒީފާ އަދާކުރާ މީހުންނަށް ދޭ އެންމެ ކުޑަ އުޖޫރަ ކަނޑައެޅުމުގެ ބާރު އިކޮނޮމިކް މިނިސްޓަރަށް ދޭ ގޮތަށް، ވަޒީފާއާ ބެހޭ ގާނޫނަަށް ސަރުކާރުން އިއްޔެ ވަނީ ވަޒީފާއާ ބެހޭ ގާނޫނަށް އިސްލާހެއް ހުށަހަޅާފަ އެވެ. ކެނދިކުޅުދޫ ދާއިރާގެ މެމްބަރު އަހުމަދު އީސާ ހުށަހެޅުއްވި އިސްލާހުގައި ބުނެފައި ވަނީ ރާއްޖޭގައި ވަޒީފާ އަދާކުރާ މީހުންނަށް ދެވޭނެ އެންމެ ކުޑަ އުޖޫރަ ކަނޑައަޅާނީ އެކަމަށް ލަފާދޭން އެކުލަވައިލާ ބޯޑެއްގެ ލަފަޔާ އެކު އިކޮނޮމިކް މިނިސްޓަރު ކަމަށެވެ. އެގޮތުން އުފައްދާ ބޯޑަށް ކިޔާނީ "މިނިމަމް ވޭޖް އެޑްވައިޒަރީ ބޯޑް" އެވެ.

އިސްލާހު ފާސްވާތާ އެއް މަސްދުވަހުގެ ތެރޭގައި އެކުލަވާލަން ޖެހޭ ބޯޑުން ކުރަން ލާޒިމްކުރާ ކަންތައްތަކުގެ ތެރޭގައި އެންމެ ކުޑަ އުޖޫރަ ދޭނެ ސިޔާސަތުތަކާއި މިންގަނޑުތަކާއި ހަމަތައް ދިރާސާކޮށް މިނިސްޓަރަށް ލަފާ ދިނުން ހިމެނެ އެވެ. ބޯޑުން ކުރާނެ އަނެއް ކަމަކީ އެންމެ ކުޑަ އުޖޫރައިގެ ގޮތުގައި ދޭނެ އަދަދު ކޮންމެ ދެ އަހަރަކުން ރިވައިސްކުރުމެވެ. އެގޮތުން އެ އަދަދަށް ބަދަލެއް ގެންނަން ފެނިއްޖެ ނަމަ ބޯޑުން އެ ލަފާ މިނިސްޓަރަށް ދޭ ގޮތަށް ވެސް ބިލުގައި ވެ އެވެ.

އެންމެ ކުޑަ އުޖޫރަ ދޭން ފުރަތަމަ ކަނޑައަޅާ ދާއިރާތައް

- ޓޫރިޒަމް

- އިމާރާތްކުރުމުގެ ދާއިރާ

- މަސްވެރިކަން

- ދަނޑުވެރިކަން

- ތައުލީމީ ދާއިރާ

- ކުދި އަދި މެދު ފަންތީގެ ވިޔަފާރި

އިގުތިސާދީ ހާއްސަ ހާލަތެއް ދިމާވެއްޖެ ނަމަ އެންމެ ކުޑަ އުޖޫރައިގެ ގޮތުގައި ދޭނެ އަދަދު، ދެ އަހަރުގެ ކުރިން ވެސް ރިވައިސް ކުރެވޭނެ ކަމަށް، ބިލްގައިވެ އެވެ.