ބޮލީވުޑްގެ ކުރީގެ ބަތަލާ ކަރިޝްމާ ކަޕޫރް އަށް އަހަރު ފަހުން އަލުން އެކްޓިން އަށް ނުކުންނަ ވެބް ސީރީޒް "މެންޓަލްހުޑް" އަންނަ މަހުގެ 11 ގައި ސްޓްރީމްކުރަން ނިންމައި، އޭގެ ޓްރެއިލާ ދައްކާލައިފި އެވެ.
ފަސް މައެއްގެ ވާހަކަ ކިޔައިދޭ މި ސީރީޒަކީ އެކްތާ ކަޕޫރްގެ ފިލްމު ކުންފުނި ބާލާޖީގެ ޑިޖިޓަލް ފްލެޓްފޯމް އޯލްޓް ބާލާޖީން ހަދާފައިވާ އެއްޗެކެވެ. "މެންޓަލްހުޑް" ސްޓްރީމްކުރާނީ އޯލްޓް ބާލާޖީގެ އިތުރުން ޒީ ނެޓްވޯކްގެ ޑިޖިޓަލް ޕްލެޓްފޯމް ޒީ5 އިންނެވެ.
މި ސީރީޒްގެ ކަރިޝްމާއާ އެކު ފެނިގެންދާނީ ސަންޖޭ ސޫރީ އާއި ޑީނޯ މޯރިއާ ސަންދިއާ މިރުދުލް އާއި ޝިލްޕާ ޝުކްލާ އާއި ޝުރޫތީ ސޭތުގެ އިތުރުން ތިލޮތާމާ ޝޯމެވެ. މި އެންމެން ވެސް ފެނިގެންދާނީ ބިޒީ ދިރިއުޅުމުގެ ތެރޭގައި ދަރިން ބެލެހެއްޓުމުގައި ކުރިމަތިވާ ކަންތައްތަކަކާ އެކީގަ އެވެ.
ރިޓޫ ބާޓިއާގެ ސްކްރީންޕްލޭއަކަށް ހަދާފައިވާ "މެންޓަލްހުޑް" ޑައިރެކްޓްކޮށްފައި ވަނީ ކަރިޝްމާ ކޯލީ އެވެ.
ވެބް ސީރީޒަކުން އެނބުރި އެކްޓިން އަށް އައި އިރު، ކާމިޔާބު އެތައް ފިލްމެއް ކުޅެފައިވާ ކަރިޝްމާ، 45، އެންމެ ފަހުން ކުޅުނު ފިލްމަކީ 2012 ގެ "ޑޭންޖަރަސް އިޝްގް" އެވެ.