ކުރީގެ މަޝްހޫރު ބަތަލާ ކަރިޝްމާ ކަޕޫރް އެނބުރި އެކްޓިން އަށް އަންނަ ވެބް ސީރީޒް "މެންޓަލްހުޑް" އަންނަ މަހުގެ ތެރޭގައި ސްޓްރީމްކުރާ ގޮތަށް ނިންމައިފި އެވެ.
މި ސީރީޒަކީ އެކްތާ ކަޕޫރްގެ ބަލާޖީގެ ޑިޖިޓަލް ޕްލެޓްފޯލް އޯލްޓް ބަލާޖީ އާއި ޒީ ނެޓްވޯކްގެ ޑިޖިޓަލް ޕްލެޓްފޯމް ޒީ5 އިން ގެނެސްދޭން ހަމަޖެހިފައިވާ އެއްޗެކެވެ. "މެންޓަލްހުޑް" ގެ ޕޯސްޓަރެއް ވެސް އެތަނުން މިހާރު ވަނީ ދައްކާލައިފި އެވެ. ނަމަވެސް ސީރީޒް ސްޓްރީމްކުރަން ފަށާނެ އިރެއް އަދި އިއުލާނެއްނުކުރެ އެވެ. ބެލެވޭ ގޮތުން މީގެ ޓްރެއިލާ ވަރަށް އަވަހަށް ދައްކައިލާނެ އެވެ.
ތިން ދަރިންގެ މައެއްގެ ރޯލުން ކަރިޝްމާ ފެންނަ މި ސީރީޒްގައި ކިޔައިދޭނީ ފިރިމީހާގެ ފަރާތުން މާ ބޮޑު އެހީތެރިކަމެއް ނުލިބި ދަރިން ބަލަމުން ގޭގެ ހުރިހާ ޒިންމާތައް ނަގަން ޖެހުމުން އަންބަކަށް ދިމާވާ ކަންކަމެވެ. މިފަދަ ރޯލެއް ކުޅެން ބަތަލާ ކަރީނާ ކަޕޫރްގެ ދައްތަ ކަރިޝްމާ ނިންމި އިރު އޭނާ އަކީ ދެ ދަރިން ލިބިފައި ވަނިކޮށް ކައިވެނި ރޫޅިފައިވާ އެކަނިވެރި މައެކެވެ.
"މެންޓަލްހުޑް" ގެ ކާސްޓުންގެ ތެރޭގައި ބޮލީވުޑްގެ ކުރީގެ އެކްޓަރު ޑީނޯ މޯރިއާ އާއި އެކްޓަރު ސަންޖޭ ސޫރީ އާއި ޓީވީ ބަތަލާއިން ކަމަށްވާ ޝިލްޕާ ޝުކްލާ އާއި ސަންދިއާ މިރްދުލް ޝުރޫތީ ސޭތު އަދި ތިލޮތާމާ ޝޯމް ހިމެނެ އެވެ.
ކާމިޔާބު އެތައް ފިލްމެއް ކުޅެ، އެތައް އެވޯޑެއް ވެސް ހޯދާފައިވާ ކަރިޝްމާ، 45، އެންމެ ފަހުން ފިލްމެއްގައި ލީޑް ރޯލް ކުޅުނީ 2012 ގެ "ޑޭންޖަރަސް އިޝްގް" ގަ އެވެ. އެކަމަކު އެއީ ބެލުންތެރިންނަށް އެހާ ކަމުދިޔަ ފިލްމެއް ނޫނެވެ.
ކަރިޝްމާ ކުޅުނު ފާހަގަކޮށްލެވޭ ބައެއް ފިލްމުތަކުގެ ތެރޭގައި "ރާޖާ ހިންދުސްތާނީ" އާއި "ދިލް ތޯ ޕާގަލް ހޭ" އާއި "ފިޒާ" އާއި "ކޫލީ ނަމްބަރު 1" އާއި "ބީވީ ނަމްބަރު 1" އާއި "ހީރޯ ނަމްބަރު 1" ގެ އިތުރުން "ހަމް ސާތު ސާތު ހޭ" އާއި "ޒުބޭދާ" ފަދަ އެތައް ފިލްމެއް ހިމެނެ އެވެ.
ކަރިޝްމާ ވަނީ ކުރިން ސިލްސިލާއެއްގައި ވެސް މަސައްކަތްކޮށްފަ އެވެ. އެއީ އޭނާގެ ނަމުގައި 2003-2004 އަށް ސަހާރާ ވަން އިން ގެނެސްދިން "ކަރިޝްމާ: ދަ މިރަކަލް އޮފް ޑެސްޓިނީ" އެވެ.