ދުނިޔޭގައި މިހާރު ހަލުވިކަމާ އެކު ފަތުރެމުންދާ ކޮވިޑް-19 އިން ރައްކާތެރިވުމަށް، މާލޭގައި ބިދޭސީން އުޅޭ ތަންތަނާއި އެ މީހުން އުޅޭ ހާލަތު، މާލޭ ސިޓީ ކައުންސިލުން ބަލަން ފަށައިފި އެވެ.
ގިނަ އަދަދެއްގެ ބިދޭސީން އުޅޭ މާލޭގައި ރޯގާ ފެތުރިއްޖެ ނަމަ އަދި އެ މީހުން ދިރިއުޅޭ ތަނަކުން ރޯގާ ފެނިއްޖެ ނަމަ، އަޅާނެ ރައްކާތެރިކަމުގެ ފިޔަވަޅުތައް ދެނެގަތުމަށް ފެށި މި ހަރަކާތުގައި މިއަދު ވެސް ވަނީ ބިދޭސީން އުޅޭ ގިނަ ތަންތަނެއް ބަލައިފަ އެވެ. އަދި ކުރިއަށް އޮތް ދެ ދުވަހު ވެސް އެ ހަރަކާތް ކުރިއަށް ގެންދާނެ ކަމަށް ސިޓީ ކައުންސިލުން ބުންޏެވެ.
ކައުންސިލްގެ އޮފިޝަލަކު ވިދާޅުވީ ބިދޭސީން ދިރިއުޅޭ ތަންތަނާއި ކައްކާ ތަންތަނަށް ގޮސް، އެތަންތަނުގައި ދިރިއުޅޭ އަދި އެ ތަންތަން ބޭނުން ކުރާ މީހުންގެ އަދަދު ބަލާނެ ކަމަށެވެ. އެއީ ރޯގާ ފެތުރިއްޖެ ނަމަ، ތަން ބަންދު ކުރުމާއި ކަރަންޓީނު ކުރާނެ މީހުންގެ އަދަދު ދެނެގަތުމަށް ކަމަށް އޭނާ ވިދާޅުވި އެވެ.
"ބޭނުމަކީ އެންމެ ނުރައްކާތެރި ހާލަތަށް ވެސް ތައްޔާރުވެ ތިބުން،" އޮފިޝަލް ވިދާޅުވި އެވެ.
މާލޭގައި އެތައް ހާސް ބިދޭސީން އުޅޭއިރު އާއްމު ގޮތެއްގައި އެފަދަ ކޮންމެ ތަނެއްގައި ވެސް ގިނަ ބަޔަކު ދިރިއުޅެ އެވެ. އަދި މި ފަދަ ތަނެއްގައި ބަލި ފެތުރިއްޖެ ނަމަ ކޮންޓްރޯލް ކުރުމަކީ އުނދަގޫ ވާނެ ކަމެއް ކަމަށް ސަރުކާރުން ވެސް ވަނީ ބުނެފަ އެވެ.
ރާއްޖެއަށް އެންމެ ގިނައިން ބިދޭސީން އަންނަ ބަންގްލަދޭޝް އާއި އިންޑިއާގައި ހަލުވި ކަމާއެކު ކޮވިޑް-19 ދަނީ ފެތުރެމުންނެވެ. އަދި ބަންގްލަދޭޝް އިން ރާއްޖެ އަށް ކުރާ ދަތުރުތައް މިހާރު ވަނީ ހުއްޓާލައިފަ އެވެ.
ރާއްޖެ އިން މިހާތަނަށް 13 މީހަކު ޕޮޒިޓިވްވެފައިވާއިރު އަދި ދިވެއްސެއްގެ ގައިން މިބަލި ފެނިފައެއް ނުވެ އެވެ. ނަމަވެސް ގިނަ ދިވެހިން ވެސް ވަނީ ބައްޔަށް ޓެސްޓުކޮށްފަ އެވެ.