އިންޑިއާގެ ހުރިޙާ އެއާޕޯޓްތަކެއް މާދަމާއިން ފެށިގެން ބަންދުވާ އިރު މިއަދު ޓްރިވެންޑްރަމް އިން އަދި މިރޭ ކޮޗިންއިން ރާއްޖެ އަންނަން ޓިކެޓް ނެގި މީހުންނަށް، މޯލްޑިވިއަންގެ ފްލައިޓް ކެންސަލްކުރުމުން، ނާދެވި، ތާށިވެދާނެކަމުގެ ބިރު އުފެދިއްޖެ އެވެ.
ކޮރޯނާވައިރަސްއާ ގުޅިގެން ބައިނަލްއަގުވާމީ ދަތުރުތައް މާދަމާ އިން ފެށިގެން ހުއްޓާލާނެކަން އިންޑިއާ ސަރުކާރުން ވަނީ ކުރިން އިއުލާންކޮށްފަ އެވެ. އަދި މިރޭ އޮންނަ މޯލްޑިވިއަންގެ އެންމެ ފަހު ފްލައިޓުން ރާއްޖެ އަންނަން ގިނަ ދިވެހިންތަކެއް ވަނީ ޓިކެޓް ވެސް ނަގައިފަ އެވެ.
އެކަަމަކު މިރޭ 9 ގައި ކޮޗިންއިން ފުރަން އޮތް މޯލްޑިވިއަންގެ ފްލައިޓް ކެންސަލްވިކަން ގައުމީ އެއާލައިން އިން މިހާރު ވަނީ އިއުލާންކޮށްފަ އެވެ.
"އަޅުގަނޑުމެން މިތަނުގައި ތިބި އެޕާޓްމަންޓް ވެސް ދޫކޮށްލައިފިން. ފުރަން ހުރިހާ ކަމެއް ތައްޔާރުވެފައި ހުއްޓާ ކެންސަލް ކޮށްލީ. ދެން މިއަދު ނުފުރިއްޖެއްޔާ އަނެއްކޮޅުން މިކޮޅުގައި ތާށިވޭ،" ހިތުގެ ބައްޔަށް ފަރުވާ ހޯދަން ކޮޗިންއަށް ގޮސް ހުރި މީހަކު، ނަން ނުޖަހަން ޝަރުތުކޮށް، ބުންޏެވެ.
"މިތިބީ ހަދާނެ އެއްގޮތެއް ވެސް ނޭނގި ތާށިވެފައި."
މޯލްޑިވިއަން އިން އިއްޔެ ކުރި ޓްވީޓެއްގައި ބުނީ ޓްރިވަންޑްރަމާއި ކޮޗިންއަށް އެންމެ ފަހު ފްލައިޓް އޮންނާނީ މިއަދު ކަމަށެވެ. އެކަމަކު ފްލައިޓް ކެންސަލްވުމާ ގުޅޭ ގޮތުން މޯލްޑިވިއަންއިން އަދި ވަކި އެއްޗެކޭ ނުބުނެ އެވެ.
