ޔުނައިޓެޑް ނޭޝަންސް (އޮކްޓޯބަރު 11) - ސީރިއާގެ ދާޚިލީ ހަނގުރާމައިގައި 300،000 މީހުން މަރުވެގެން ދިޔައީ ރައީސް ބައްޝާރުލް އަސަދުގެ ލީޑާޝިޕް ފޭލްވެގެން ކަމަށާއި އެކަމުގެ ޒިންމާ އަސަދު އުފުއްލަން ޖެހޭނެ ކަމަށް އދ.ގެ ސެކްރެޓަރީ ޖެނެރަލް ބާން ކީ މޫން ވިދާޅުވެއްޖެ އެވެ.
ޖަރުމަނުގެ ބްރޯޑްކާސްޓާއަކަށް ދެއްވި އިންޓަވިއުއެއްގައި ބާން ވިދާޅުވީ ސީރިއާގެ ލީޑަޝިޕް ފޭލްވެގެން އެތައް ބައެއް މަރުވެފައިވާ ކަމަށެވެ.
ބާން ވިދާޅުވީ ސީރިއާ އަށް ދެމުންދާ ވައިގެ ހަމަލާތައް ހުއްޓާލުމުގެ އެއްބަސްވުމަކަށް މަސައްކަތްކޮށް ދެއްވުމަށް އެމެރިކާގެ ޚާރިޖީ ވަޒީރު ޖޯން ކެރީގެ އަރިހުން އެދިވަޑައިގެންފައިވާ ކަމަށެވެ.
"ހަމަލާތައް ހުއްޓާލައިގެން ސީރިއާގައި އެންމެ ބޮޑަށް ހާލުގައި ޖެހިފައިވާ މީހުންނަށް އިންސާނީ އެހީ ފޯރުކޮށް ދެވޭނީ. މަދުވެގެން ފަސް މިލިއަން މީހުންނަށް އެހީ ފޯރުކޮށްދޭން ޖެހޭ،" ބާން ވިދާޅުވި އެވެ.
ސީރިއާގެ ހަލަބް ސިޓީ އަށް ދޭ ހަމަލާތަކުގެ މައްސަލާގައި ރަޝިޔާއާ ދެކޮޅަށް ބައިނަލްއަގުވާމީ ޖިނާއީ ކޯޓަށް މައްސަލަ ވައްދަން ޖެހިދާނެ ކަމުގެ އިންޒާރު ފްރާންސް އިން ވަނީ ދީފަ އެވެ.
ބާން ކުރިން ވިދާޅުވެފައި ވަނީ ސީރިއާގައި ދޭ ހަމަލާތައް ހަނގުރާމައިގެ ޖަރީމާގެ ގޮތުގައި ބައިނަލްއަގުވާމީ ޖިނާއީ ކޯޓުން ތަހުގީގު ކޮށްދިނުމަށް ސަލާމަތީ މަޖިލީހުގައި އެދިފައިވާނެ ކަމަށެވެ.