ހުއްދަ ނެތި ކެނޯއެއްގައި ދަތުރު ކުރަނިކޮށް ބަންޑުން ޖަހާލައި އެހެން ރަށަކަށް އެރި ބަޔަކު ފުލުހުންގެ ބެލުމުގެ ދަށަށް ގެންގޮސްފި އެވެ.
ފުލުހުން ބުނީ އެއް ރަށުން އަނެއް ރަށަށް އެރުން މަނާކޮށްފައިވަނިކޮށް، ކެނޯއެއްގައި ހދ. ނޮޅިވަރަމްފަރުން ފުރައިގެން އުޅެނިކޮށް ބަންޑުން ޖަހާލީ ކަމަށް ބުނެ ކުޅުދުއްފުއްޓަށް އެެރި ބަޔަކު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ. މި މައްސަލާގައި ހައްޔަރުކޮށްފައި ވަނީ އުމުރުން 23-30 އަހަރުގެ ދެ މީހުން ކަމަށް ފުލުހުން ބުންޏެވެ.
އެ މީހުން ނޮޅިވަރަމްފަރުން ފުރާފައި ވަނީ އެ ރަށުގެ ހުޅަނގު ފަރާތުން ކަމަށާއި، ކެނޯ ބަންޑުން ޖަހާލާފައިވަނީ ކުޅުދުއްފުށި އެއާޕޯޓް ރަންވޭ ހުޅަނގު ކޮޅުން ކަމަށް އެ މީހުންނާ ހަވާލާދީ ފުލުހުން ބުންޏެވެ. އަދި އެ ދެ މީހުން ދިޔަ ކެނޯއަކީ ވެރިފަރާތުގެ ހުއްދަ ނެތި ނަގާފައިވާ ކެނޯއެއް ކަމަށް ވެސް ފުލުހުން ބުނެފައިވެ އެވެ.
ރާއްޖޭގައި ކޮވިޑް-19 ފެތުރޭތީ ޒަރޫރީ ބޭނުމަކަށް ނޫން ގޮތަކަށް އެއްރަށުން އަނެއް ރަށަށް އެރުން މިހާރު ވަނީ މަނާކޮށްފަ އެވެ. ސަރުކާރުން މި ނިންމުން ނިންމާފައި ވަނީ މާލެ އިން ކޮވިޑް-19 ފެނި ކޮމިއުނިޓީ ސްޕްރެޑަކަށް ދިޔަ ހިސާބުންނެވެ.
މުޅި ރާއްޖެ އިން މިހާތަނަށް މި ބަލީގެ 52 މީހުން ފެނިފައިވާއިރު އޭގެ ތެރެއިން 32 ފެނިފައި ވަނީ މާލެ އިންނެވެ.