ވަޒީފާއެއް ހޯދާ ދިވެހިންނަށް ޚާއްސަ: އަލީގެ މި ފޮތް މުހިންމު

ވަޒީފާއެއް ހޯދުމަކީ އުނދަގޫ ކަމެކެވެ. ވަޒީފާގައި ދެމިހުރުމަކީ ވެސް ފަސޭހަ ކަމެއް ނޫނެވެ. އެކަމަކު މި އޮތީ އުފާވެރި ޚަބަރެކެވެ؛ އެ ހުރަސްތައް ގިރާކުރާނެ ގޮތް ބުނެދޭ ފޮތެއް ދިވެހި ބަހުން ފުރަތަމަ ފަހަރަށް ނެރެފި އެވެ.

"ވަޒީފާ އަށް ނުކުންނަ އިރު" ލިޔުއްވާފައި ވަނީ މެނޭޖްމެންޓް ދާއިރާގެ ތަޖުރިބާކާރު އަލީ ޚާލިދެވެ. އޭނާ 2006-2008 އަށް ޓީވީއެމްގެ ސީއީއޯއަކަށް އުޅުއްވި ދުވަސްވަރު ލިޔުއްވަން ގަސްދުކުރެއްވި މި ފޮތުގައި މައުލޫއު އަށް ވަރަށް ފުޅާ ދާއިރާއެއްގައި ތަފްސީލްކޮށް ބައްލަވާލައްވާފައިވެ އެވެ.

"އަލަށް ވަޒީފާ އަށް ނުކުންނަން ބޭނުންވާ ޒުވާނުންނަށް އޭނާ ކުރިއަށްދާން ބޭނުންވާ ދާއިރާ ކަނޑައެޅުމާ ހިސާބުން ފެށިގެން ވަޒީފާ ހޯދުމަށް ކުރަން ޖެހޭ ކަންތަކާއި ވަޒީފާގައި ދިމާވާނެ އެކިއެކި ގޮންޖެހުންތަކަށް ކުރިމަތިލެވިދާނެ ގޮތުގެ މަގެއް" ދައްކައިދޭ މި ފޮތް ޚާއްސަވާ މައިގަނޑު ސަބަބަކީ އަލީގެ އަމިއްލަ ތަޖުރިބާގެ އަލީގައި ފޮތް ލިޔުއްވާފައި ވުމެވެ. އެހެންވެ، މިއީ ސީދާ ރާއްޖޭގެ ވަޒީފާގެ މާހައުލަށް ފެތޭ، ވަރަށް ބޭނުންތެރި އިރުޝާދުތަކެކެވެ.

"ޓައީ ގޮށުގެ ވާހަކަ އޭނާ ގާތުގައި އަހަރެން ބުނުމުން އޭނާ ބުނީ، ޓައީ ގޮށްޖަހަން ނޭނގޭ ވާހަކަ އެވެ. ދެން އެކަން ރަނގަޅު ކުރެވުނު އިރު، އޭނާއަކީ ޖޯކަރެއް ކަމަށް އެންމެން ހަދާލައިފި އެވެ. ޓައީގެ ވާހަކަ ފަހުން ވީ، މީނާ ބަލިކޮށްލަން ބޭނުންކުރާ ހަތިޔާރަކަށެވެ." ސަމާލުކަން ދޭންވީ ކަންކަން ފާހަގަކުރައްވައި، މިސާލެއްގެ ގޮތުން އަލީ ނެންގެވި ހާދިސާއެއް ބަޔާންކުރައްވަމުން ލިޔުއްވާފައިވެ އެވެ.

ނަގައިގަންނަން ވަރަށް ފަސޭހަ އާދައިގެ ބަހުރުވައަކުން ލިޔެފައިވާ ފޮތުގައި ވަނީ، ޝައުގުވެރިވާ މަސައްކަތެއްގައި ގިނަ ދުވަހު ދެމިހުރެވޭނެ ގޮތަށް ވަޒީފާއެއް އިޚްތިޔާރުކޮށް ވަޒީފާގައި އުޅޭނެ ގޮތް ކިޔައިދީފަ އެވެ. ހަމައެކަނި މުސާރައިގެ ބޭނުމުގައި ވަޒީފާ އަކަށް ނުކުތަސް، އެއީ ވަގުތީ ކަމަކަށް ހެދުމަށާއި ކުރިއަށް ދާން ޝައުގުވެރިވާ ދާއިރާ އަބަދުވެސް ހަނދާނުގައި ބޭއްވުމަށް ފޮތުގައި ނަސޭހަތްތެރިވެފައިވެ އެވެ.

ފޮތުގެ ބައެއް ބައިތައް:

* ކުރިއަށް ދާން ބޭނުންވާ ދާއިރާ ދެނެގަތުން

* ވަޒީފާގެ އިންޓަވިއު އަށް ތައްޔާރުވުމުގެ ގޮތުން ވިސްނާލަން ޖެހޭ ކަންކަން

* އޮފީހުގެ ފުރަތަމަ ދުވަސް

* ކުރާ މަސައްކަތަށް ވެރިންގެ ތައުރީފް ހޯދުުން

* ޖެއްސުންކުރާ މުވައްޒަފުން

* ނޭނގޭނެ ކަމަށް ވެސް ދޮގުނުހަދާތި

* މަސައްކަތުގެ މާހައުލުގައި އުޅޭ ހިތްވުމާއި ހިތްހަމަނުޖެހުން

ފޮތުގައި ހުރި މައުލޫމާތުތަކަށް ބަލާ އިރު، ވަޒީފާއެއް ހޯދަން އުޅޭ ޒުވާނުންގެ އިތުރުން މިހާރު ވަޒީފާގައި އުޅޭ މީހުންނަށާއި ވަޒީފާ ދޭ ފަރާތްތަކަށް އަދި ވެރިންގެ ގޮތުގައި މަސައްކަތްކުރާ މީހުންނަށް ވެސް ބޭނުންހިފޭނެ މުހިއްމު ޓިޕްސް ހިމަނާފައިވެ އެވެ.

ލިޔެ ނިމުނުތާ ހަތަރު އަހަރު ފަހުން އަލީގެ އަމިއްލަ ޚަރަދުގައި ޗާޕްކުރެއްވި ފޮތް ނޮލެޖު ބުކްޝޮޕުން 165 ރުފިޔާ އަށް ގަންނަން ލިބޭނެ އެވެ.

އަލީގެ އެންމެ ބޮޑު އުއްމީދަކީ ޒުވާނުންނަށާއި އެމީހުންގެ ބެލެނިވެރިންނަށް އަމާޒުކޮށް ލިޔުއްވި ފޮތުގައި ހުރި މައުލޫމާތު ފުޅާ ދާއިރާއެއްގައި ލިބިގެން ދިޔުމެވެ.

"އަޅުގަނޑު އުއްމީދުކުރަނީ ކޮލެޖުތަކުން ދަރިވަރުންނަށް މީގެ މައުލޫމާތު ދޭން ޝައުގުވެރިވާނެ ކަމަށް. އެއީ އެ ތަންތަނުން ކުދިން ވަޒީފާ އަށް ނުކުންނާނީ. ވަޒީފާ އަށް ނުކުންނަ އިރު އެ ބޭނުންވާ ޑިސިޕްލިންގައި ތިބޭނެ ގޮތް މި ފޮތުން އެނގިގެންދާނެ،" މިހާރު ރައީސް އޮފީހުގެ ޗީފް އޮފް ކޮމިއުނިކޭޝަންސްގެ މަގާމުގައި ހުންނެވި އަލީ ވިދާޅުވި އެވެ.