ރައްޔިތުންގެ މަޖިލީހުގެ ކޮމިޓީތަކަށް ޓްރާންސްޕޯޓް މިނިސްޓަރު އައިޝަތު ނަހުލާ ހާޒިރު ނުކުރެވޭތީ މެމްބަރުން ކަންބޮޑުވުން ފާޅުކުރައްވައިފައި ވަނިކޮށް މިރޭ ބާއްވާ ގައުމީ ތަރައްގީ އާއި ތަރިކައިގެ ކޮމިޓީއަށް އޭނާ ހާޒިރުކުރަން ނިންމައިފި އެވެ.
އޮންލައިންކޮށް މިރޭ 9:30 ގައި ބާއްވާ ކޮމެޓީއަށް މިނިސްޓަރު ނަހުލާ އާއި ޓްރާންސްޕޯޓް މިނިސްޓްރީގެ ވެރިން ހާޒިރު ކުރަނީ ކޮވިޑް-19އާ ގުޅިގެން އެ މިނިސްޓްރީގެ މަސައްކަތްތައް ކުރިއަށް ދާ ގޮތާ ގުޅޭގޮތުން މަޝްވަރާ ކުރާށެވެ.
މި ކޮމިޓީން ނަހުލާ ޖަވާބުދާރީކުރުވާއިރު، ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމެޓީއަށް ވެސް އޭނާ ހާޒިރުނުކުރެވިގެން ބައެއް މެމްބަރުން ވަނީ ހިތްހަމަނުޖެހުން ފާޅުކުރައްވައިފަ އެވެ. އެ ކޮމިޓީ އަށް އޭނާ ހާޒިރުކުރަން މިހާރު ނިންމާފައި އޮތީ އަންނަ ހޯމަ ދުވަހެވެ.
އެ ކޮމިޓީގެ މެމްބަރުން ވިދާޅުވެފައިވާ ގޮތުގައި، ޓްރާންސްޕޯޓް މިނިސްޓްރީއާ ގުޅޭ ގިނަ ކަންބޮޑުވުންތަކެއް އާއްމުންގެ އެބަހުއްޓެވެ. އެކަންކަމާ މެދު މިނިސްޓަރު ޖަވާބުދާރީ ކުރުވަން ކޮމިޓީ އަށް ހާޒިރުނުކުރެވުމަކީ މައްސަލައެއް ކަމަށް ބައެއް މެމްބަރުން ވިދާޅުވެފައިވެ އެވެ.
މެމްބަރުން ވިދާޅުވީ ކޮމިޓީ އަށް ހާޒިރުވާން އެންގުމުން އެކަން ނުކުރައްވަން ނަހުލާ ދައްކަވަނީ އެކި ސަބަބުތައް ކަމަށެވެ. އޭނާ މިހާތަނަށް ކޮމިޓީއަށް ހާޒިރުވެވަޑައިގަތީ، ޓްރާންސްޕޯޓް މިނިސްޓްރީގެ ބައެއް މުވައްޒަފުން ވަކިކުރާ މައްސަލާގައިި އެކަނި ކަމަށް މެމްބަރުން ވިދާޅުވި އެވެ.
ސަރުކާރު ކޯލިޝަންގެ މައި ޕާޓީ އެމްޑީޕީގެ މެމްބަރުންނާއި އިދިކޮޅު މެމްބަރުން ވެސް ގެންދަވަނީ އެ މައްސަލާގައި ނަހުލާއަށް ފާޑު ވިދާޅުވަމުންނެވެ.