ކުރިން ބަލިޖެހިފައި ހުރިތޯ ބަލަން ހަދާ އެންޓިބޮޑީ ޓެސްޓް ހެދުމުގެ ހުއްދަ ހޯދަން އައްޑޫ ފޭދޫގައި ހިންގާ އެއިމްސް ޑައިގްނޯސްޓިކް ކެއާ އިން އެދުމުން އެ ހުއްދަ ނުދޭން ހެލްތު މިނިސްޓްރީން ނިންމައިފި އެވެ.
މިކަމާ ބެހޭ ގޮތުން އެއިމްސްގެ އިތުރުން ހެޕީ މާކެޓްގެ ވެސް މެނެޖިން ޑިރެކްޓަރު ރިޓަޔާޑް އަލީ އިހުސާން މިއަދު ކުރެއްވި ޓްވީޓެއްގައި ވިދާޅުވީ ކޮވިޑް-19 އަށް ޓެސްޓްކުރުމުގެ ހުއްދަ އަށް އެދުމުން އަނގަބަހުން އެ ހުއްދަ ދެވެން ނެތްކަން އަންގާފައިވާ ކަމަށެވެ. އެހެންވެ އެ ކްލިނިކުން އެކަމަށް ފެށި މަސައްކަތް ހުއްޓާލާފައިވާ ކަމަށް ވިދާޅުވި އެވެ.
އެއިމްސް އަކީ 2015 އިން ފެށިގެން އައްޑޫގައި ހިދުމަތް ދެމުން އަންނަ، އައްޑޫގެ އެންމެ ފެންވަރު ރަނގަޅު އެއް ކްލިނިކެވެ. އެ ތަނަކީ ހެޕީ މާކެޓްގެ ވެރިޔާ މުހައްމަދު ނައީމްގެ ހިއްސާ އޮންނަ ތަނެކެވެ.
އެއިމްސްގައި ކޮވިޑް-19 އަށް ޓެސްޓްކުރެވޭނެ ގޮތް ހެދުމަށް އެކަމަށް ބޭނުންވާ ހުއްދަ ހޯދުމުގެ މަސައްކަތްކުރަމުންދާކަން އިހުސާން ޓްވިޓާގައި އިއުލާންކުރެއްވީ މިދިޔަ މަހުގެ 28 ގަ އެވެ. އޭރު އޭނާ ވިދާޅުވެފައި ވަނީ އެއިމްސްގައި ގަޑިއަކު 36 ސާމްޕަލް ޓެސްޓްކުރުމުގެ ކެޕޭސިޓީ ހުންނާނެ ކަމަށެވެ.
ކޮވިޑް-19 ޓެސްޓް ކަމަށް އިހުސާން ވިދާޅުވެފައިވީ ނަމަވެސް، އެނގިފައިވާ ގޮތުގައި އެއިމްސް އިން އެދިފައި ވަނީ އެންޓިބޮޑީ ޓެސްޓް ހެދުމުގެ ހުއްދައަކަށެވެ. އެނގިފައިވާ ގޮތުގައި އެ ހުއްދަ ނުދިނީ އައްޑޫ އަކީ ކޮރޯނަވައިރަސް އެއްވެސް ވަރަށް ފެތުރިފައި ނެތް ސަރަހައްދެއްކަމުން އެންޓިބޮޑީ ޓެސްޓް ހެދުމުގެ މާބޮޑު ބޭނުމެއް ނެތުމުންނެވެ. އަދި އެއީ ބަލި ހުރިތޯ ބަލަން ކޮވިޑް-19 އަށް ކުރާ ޕީސީއާރު ޓެސްޓަކަށް ނުވުމުންނެވެ.
އެއިމްސް އަށް އެންޓިބޮޑީ ޓެސްޓްކުރުމުގެ ހުއްދަ ނުދޭން ނިންމި އިރު، އަދިވެސް އައްޑޫ އިކްއަޓޯރިއަލް ހޮސްޕިޓަލް (އޭއީއެޗް) ގައި އެކަން ކުރެވޭނެ އިންތިޒާމެއް ހަމައެއް ނުޖައްސަ އެވެ.
ނަމަވެސް މިދިޔަ މަހުގެ ތެރޭގައި އެ އިންތިޒާމު ހަމަޖެހޭނެކަމުގެ ޔަގީންކަން ނައިބު ރައީސް ފައިސަލް ނަސީމު ދެއްވި ކަމަށް ނައިބު ރައިސާ އެކު ބޭއްވި ބައްދަލުވުމަކަށް ފަހު ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވި އެވެ.
