ފްލެޓްތަކާ ގުޅޭ އަވަސް ތާރީޚުތަކެއް މިނިސްޓަރަށް ވިދާޅުވެވުނީ އޮޅުމަކުން!

ކުރީގެ ސަރުކާރުން ހުޅުމާލޭގައި އިމާރާތް ކުރަން ފެށި 7،000 ފްލެޓް އަންނަ މަހުގެ ތެރޭގައި ހަވާލުކުރެވޭނެ ކަމަށް ރައްޔިތުންގެ މަޖިލީހުގެ ކޮމިޓީއެއްގައި ހައުސިން މިނިސްޓަރު އައިމިނަތު އާތިފާ ވިދާޅުވީ އޮޅުމަކުން ކަމަށާއި ބަލަނީ ވީހާވެސް އަވަހަކަށް ފްލެޓް ހަވާލުކުރެވޭތޯ ކަމަށް ހައުސިން މިނިސްޓްރީން ރޭ ބުނެފި އެވެ.

ކޮވިޑް-19ގެ ބަލިމަޑުކަމާ ހެދި އާއްމުންގެ ދިރިއުޅުމަށް ބޮޑެތި ދަތިތަކެއް ކުރިމަތިވެފައި ވަނިކޮށް، ރައްޔިތުންގެ މަޖިލީހުގެ ގައުމީ ތަރައްގީ އާއި ތަރިކައިގެ ކޮމެޓީގެ ބައްދަލުވުމުގައި މިނިސްޓަރު އާތިފާ މިދިޔަ ހަފުތާގައި ވިދާޅުވީ ފްލެޓްތައް ހަވާލުނުކުރެވި އޮތީ ފްލެޓް ލިބޭ ލިސްޓުގައި ތިބި މީހުންގެ ހާލަތު ބެލުމުގެ މަސައްކަތް ކުރަމުން އަންނާތީ ކަމަށެވެ. އަދި ކޮވިޑް-19 އާ ގުޅިގެން މާލެ ސަރަހައްދު ލޮކްޑައުން ކުރީ ރައީސް އޮފީހުގެ ކޮމެޓީއަކުން ކުރާ އެ މަސައްކަތް ނިމުމަކާ ގާތުގައި ވަނިކޮށް ކަމަށާއި އެހެންވެ، ޖުލައި މަސް ނިމުމުގެ ކުރިން އެތަންތަން ހަވާލުކުރެވޭނެ ކަމަށް އުއްމީދު ކުރައްވާ ކަމަށެވެ.

އެކަމަކު މިނިސްޓްރީން މި ވާހަކަ ފަހުން ބަދަލުކޮށް، ބުނީ މިނިސްޓަރު އިޝާރާތް ކުރެއްވީ ފްލެޓްތައް ލިބޭ ފަރާތްތަކުގެ ލިސްޓް އަންނަ މަހުގެ ނިޔަލަށް ފައިނަލްކޮށް ފްލެޓްތައް ސެޕްޓެމްބަރަށް ނިންމަން މަސައްކަތް ކުރާ ވާހަކަ ކަަމަށެވެ. އެކަމަކު ތާރީޚް ވެސް ބަދަލުކޮށް، ހައުސިން މިނިސްޓްރީން ރޭ އަނެއްކާވެސް ވަނީ މިނިސްޓަރު އާތިފާގެ ވާހަކަ ސާފުކޮށްދޭން ކުރު ބަޔާނެއް ނެރެފަ އެވެ.

އެ ބަޔާނުގައި ބުނީ އާއްމުންގެ ދިގު އިންތިޒާރަކާ ގުޅިފައިވާ ފްލެޓްތަކާ ގުޅިގެން މިނިސްޓަރަށް އަވަސް ތާރީޚުތަކެއް ވިދާޅުވެވުނީ "އޮޅިގެން" ކަމަށެވެ.

މިނިސްޓްރީން ބުނިގޮތުގައި ފްލެޓްތައް ލިބޭނެ މީހުން ކަނޑައަޅައި ހަވާލުކުރަން ބުނި ތާރީޚުގައި އެކަން ނުކުރެވި ލަސްވަނީ ކޮވިޑް-19 އާ ގުޅިގެން މާލެ ލޮކްޑައުންކޮށްފައި އޮތުމުންނެވެ. އެއީ ފުރަބަންދުގެ ތެރޭގައި ގޭގެއަށް ޒިޔާރަތްކޮށް ހަދަން ޖެހޭ އެސެސްމަންޓްތައް ހެދުމަށް ދަތިތަކާ ދިމާވުމުން ކަމަށް ވެސް ބަޔާނުގައިވެ އެވެ.

ހުޅުމާލޭގެ ދެ ވަނަ ފިޔަވަހީގައި، ޗައިނާ ސްޓޭޓް އިންޖިނިއަރިން އެންޑް ކޮންސްޓްރަކްޝަން ކޮމްޕެނީ (ސީއެސްއީސީ)އާ ހަވާލުކޮށްގެން، ކުރީގެ ރައީސް އަބްދުﷲ ޔާމީންގެ ސަރުކާރުން، ފެށި މަޝްރޫއުގައި އިމާރާތް ކުރަމުން އަންނަނީ 25 ބުރީގެ 16 ޓަވަރެވެ. މި މަޝްރޫއު އަށް ކުރީގެ ސަރުކާރުން ވެސް ވަނީ ލޯނެއް ނަގައިފަ އެވެ.

ޗައިނާގެ އެގްޒިމް ބޭންކުން 437 މިލިއަން ޑޮލަރުގެ އެ ލޯނު ހޯދާފައި ވަނީ ސަރުކާރުގެ ސޮވެރިން ގެރެންޓީއާ އެކު ހަ ޕަސެންޓްގެ އިންޓަރެސްޓް ރޭޓްގަ އެވެ. އެގޮތުން ލޯނުގެ 15 ޕަސެންޓް، ފަސް އަހަރުގެ ތެރޭގައި އަދި އަނެއް 85 ޕަސެންޓް 15 އަހަރުގެ ތެރޭގައި ދަައްކަން ޖެހެ އެވެ.

މި ފްލެޓްތައް ނިންމަން މި ސަރުކާރުން ވެސް އޮތީ 45 މިލިއަން ޑޮލަރުގެ ލޯނެއް ނަގަން ނިންމައިފަ އެވެ.

ހިޔާ މަޝްރޫއުގެ ފްލެޓްތަކަށް ކުރިމަތިލީ މީހުންގެ ތެރެއިން ފްލެޓް ހައްގުވާ މީހުން ކަނޑައަޅައި ކުރީގެ ސަރުކާރު ނިމުނުއިރު، ގިނަ ބަޔަކަށް އޮތީ ލިއުން ވެސް ދީފަ އެވެ. އެކަމަކު އެ ލިސްޓްތަކަކީ އިންސާފުން ބޭރުވެ އެކުލަވާލާފައިވާ ލިސްޓްތަކެއް ކަމުގެ ތުހުމަތާ އެކު މި ސަރުކާރުން ވަނީ މައްސަލަތައް ބަލަން ފްލެޓް ކޮމިޓީއެއް އެކުލަވާލައިފަ އެވެ.

މާލެ ލޮކްޑައުންކުރި އިރު، ބައެއް ގޭގެއަށް އެ ކޮމިޓީން ވަނީ ޒިޔާރަތްކޮށް ހާލަތު ބަލައިފަ އެވެ.

ކުރިން ހަމަޖައްސާފައި އޮތީ ކޮމިޓީގެ މިދިޔަ އަހަރުގެ ޑިސެމްބަރުމަހުގެ ނިޔަލަށް ނިންމުމަށެވެ. ފްލެޓް ކޮމިޓީގެ މަސައްކަތް މިހާ ދިގުލައިގެން ދިޔައީ، އެ ކޮމިޓީން ބުނިގޮތުގައި، ހަތް ކެޓަގަރީން ހުށަހަޅާފައިވާ ގިނަ އަދަދެއްގެ ފޯމުތައް ވަކިކޮށް، އެ ފޯމުތަކާ އެކު ހުށަހަޅާފައި ހުރި ލިޔެކިޔުންތައް ހަމަކޮށް، ތަރުތީބުކުރާށެވެ. އެ މުއްދަތުގެ ތެރޭގައި، ފްލެޓްތަކާ ގުޅިގެން ހުށަހެޅި ޝަކުވާތައް ވެސް ވަކިވަކިން ބެލި ކަމަށް ކޮމިޓީން ބުންޏެވެ.