ލޯކަލް ޓޫރިޒަމަށް އަސަރުކުރާ ގޮތަށް ވ. ރަކީދޫގައި ބަނދަރު ހަދާތީ އެކަމުގެ ކަންބޮޑުވުންތަކާ އެކު ރައްޔިތުންގެ މަޖިލީހަށް ޕެޓިޝަނެއް ހުށަހަޅައިފި އެވެ.
މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދަށް ފޮނުވި ޕެޓިޝަންގައި ބުނެފައިވަނީ، ޓޫރިސްޓުން އެންމެ ގަޔަވާ ސަރަހައްދުގައި ބަނދަރު ހެދުމުން އެކަމުގެ ގެއްލުން ލިބޭނެ ކަމަށެވެ. އެހެންވެ، އެތަނުގައި ބަނދަރުގައި ހަދަން ނިންމުމަކީ މުސްތަގުބަލަށް ވިސްނާއިރު ގޯސް ނިންމުމަކަށް ވާނެ ކަމަށް ޕެޓިޝަނުގައިވެ އެވެ.
މިދިޔަ އޮކްޓޯބަރު މަހުގެ ތެރޭގައި އެ ބަނދަރު ހެދުމުގެ މަސައްކަތް ހަވާލުކުރީ އެމްޓީސީސީއާ އެވެ. އެ ކުންފުނިން މިހާރު ވަނީ 18.5 މިލިއަން ރުފިޔާ އަށް ހަވާލުކުރި މަޝްރޫއު ފަށައިފަ އެވެ. އޭގެ ތެރޭގައި ބަނދަރު ސަރަހައްދު ފުންކުރުމާއި ބްރޭކްވޯޓާ އާއި ރިވެޓްމެންޓް ޖެހުން ހިމެނެ އެވެ. އެ ބަނދަރު ހަދަމުން އަންނަނީ، 2003 ވަނަ އަހަރު އެ ރަށުގައި ބަނދަރު ހަދަން ކޮނުނު ސަރަހައްދުގަ އެވެ.
އެތަނުގެ ދިގުމިނުގައި 134 މީޓަރު އަދި ފުޅާމިނުގައި 71 މީޓަރު ހުންނާނެ އެވެ.
ކަންބޮޑުވުންތަކާއެކު މަޖިލީހަށް ފޮނުވި ޕެޓިޝަންގައި ބުނެފައިވާ ގޮތުގައި، މިހާރު ބަނދަރު ހަދަމުން އަންނަނީ ރަށުގެ އެންމެ ހިތްގައިމު ސަރަހައްދުގަ އެވެ. އެތަން ހިތްގައިމު، ރީތި ފަޅަކަށް ބަދަލުވެފައިވާ ކަމަށާއި ކޮންކްރީޓް ބަނދަރާއެކު އެކަމުގެ ރީތިކަން ގެއްލި ރަށުގެ ޓޫރިޒަމަށް އަސަރުކުރާނެ ކަމަށް ވެސް ބުންޏެވެ.
"ލޯކަލް ޓޫރިޒަމަށް އިސްކަން ދޭއިރު އެތަނުގައި ބަނދަރު ހަދަން ނިންމުމަކީ ލޯންގް ޓާމަށް ވިސްނަންޏާ ގެއްލުން ލިބޭނެ ކަމެއް،" ޕެޓިޝަންގައި ބުންޏެވެ.
އާބާދީގައި 368 ރަޖިސްޓްރީވެފައި ވިޔަސް ރަކީދޫގައި އާއްމުކޮށް ދިރިއުޅެނީ ފަންސާހަކަށް މީހުންނެވެ. އާބާދީ މަދަސް، އެ ރަށަކީ ގެސްޓް ހައުސްގެ މުސްތަގުބަލު އޮތް ތަނަކަށް ވުމުން، އެކަމަށް އިސްކަންދިނުމަށް، 50 އަށް ވުރެ ގިނަ މީހުން ސޮއިކޮށް މި މަހުގެ 13 ވަނަ ދުވަހު މަޖިލީހަށް ހުށަހެޅި ޕެޓިޝަންގައިވެ އެވެ.
ރަކީދޫގައި މިހާރު ވެސް 13 ކޮޓަރީގެ ގެސްޓް ހައުސެއް ހިންގަ އެވެ. އޭގެ އިތުރުން މިވަގުތު ހިދުމަތް މެދުކެނޑިފައިވާ ފަސް ކޮޓަރީގެ ގެސްޓް ހައުސްއަކާއި މިހާރު އިމާރާތް ކުރަމުން އަންނަ ތިން ކޮޓަރި އަދި 10 ކޮޓަރީގެ ގެސްޓް ހައުސެއް ހިމެނެ އެވެ.
ޕެޓިޝަންގައި ބުނެފައިވާ ގޮތުން ޓޫރިސްޓުން އަދި އާއްމުން ވެސް ރަކީދުއަށް ޝައުގުވެރިވަނީ އެ ރަށުގެ ރީތިކަމާއި ސާފުތާހިރުކަމުންނެވެ.
"ރަކީދޫގައި ގެސްޓްހައުސް ވިޔަފާރިކުރަން ގަސްތުކުރާ ބޭބޭފުޅުން ރަކީދުއާ މެދު ޝައުގުވެރިވަނީ ކޮންމެ ވެސް ހައިސިއްޔަތަކުން ރަކީދުއަށް ޒިޔާރަތްކުރައްވާ ރަކީދޫގައި ގެސްޓްހައުސް ހަދާ ހިންގުމަށް ހުރި ފަސޭހަތަކާ އުނދަގޫތަކާ އަޅާ ކިޔުމަށްފަހު އަދި އެންމެ ބޮޑު ކަމަކަށް ރަކީދޫގެ ރީތިކަމުން ނެގޭނެ ހުރިހާ ފައިދާތަކަށް ވިސްނާ ފިކުރުކޮށް ސައްލާކުރުމަށްފަހުގަ އެވެ،" ޕެޓިޝަންގައި ވެ އެވެ.
ރަށުގައި އެ ވަގުތަކު ދިރިއުޅޭ ބަޔަކު އެންމެ ބޮޑަށް ހިތްއުފާވާ އެންމެ ހިތްހަމަޖެހޭ ތަނަކީ މިހާރު ކޮނެފައިވާ ބަނދަރާ ދިމާޅު އަތިރިމައްޗާއި އެތަނާ ގުޅިފައިވާ ގޮތަށް އޮތް ފާލަމެވެ.
ޒަމާނީ ބަނދަރެއް ބޭނުންވާ ކަމަށާއި ނަމަވެސް އަވަސް އަރުވާލައިގެން އެއްވެސް ހަރުދަނާ ޕްލޭނެއް ނެތި ބަނދަރެއް ހެދުމުގެ އެއްވެސް ބޭނުމެއް އޮތް ކަމަކަށް ނުދެކޭ ކަމަށް، ކަންބޮޑުވުން ފާޅުކުރި މީހުން ބުންޏެވެ.