ސައްހަ ލިޔެކިޔުން ނެތް އަދި ސަރުކާރުގެ ރެގިއުލަރައިޒޭޝަން ޕްރޮގްރާމުގައި ބައިވެރިނުވާ ބިދޭސީން އައްޑޫގައި ނުބައިތިއްބަން އައްޑޫ ސިޓީ ކައުންސިލުން ނިންމައިފި އެވެ.
އައްޑޫ ސިޓީ ކައުންސިލުން ނެރުނު ބަޔާނެއްގައި ބުނީ އައްޑޫގައި ބިދޭސީން ރެގިއުލޭޓްކުރުމުގެ މަސައްކަތް ފަށާފައިވާ ކަމަށެވެ. ސިޓީ ކައުންސިލުން ވަނީ ބިދޭސީންގެ ރަޖިސްޓްރީ އަށް ވަކި ފޯމެއް ވެސް ތައްޔާރުކޮށްފަ އެވެ.
އައްޑު އަށް ބިދޭސީން ގެންދިއުމާއި ފޮނުވާލުމުގެ ކުރިން ވެސް ރަޖިސްޓްރީ ކުރުމަށް ސިޓީ ކައުންސިލުން ވަނީ އަންގައިފަ އެވެ. ކައުންސިލުން ބުނީ އައްޑު އަށް ބިދޭސީއެއް ގެންދިއުމުގެ ކުރިންނާއި އައްޑޫގައި ހުރި ބިދޭސީއަކު ފޮނުވާލުމުގެ ކުރިން އެ ބިދޭސީއެއް ގެންދާ ފަރާތަކުން އަވަށު އޮފީހުގައި އޭނާ ރަޖިސްޓްރީކުރަން ޖެހޭނެ ކަމަށެވެ.
ކައުންސިލުން ވަނީ މިހާރު އައްޑޫގައި ތިބި ހުރިހާ ބިދޭސީން ވެސް އެ ބަޔަކު ތިބި އަވަށެއްގެ އަވަށު އޮފީހުގައި ރަޖިސްޓްރީވާން އަންގައިފަ އެވެ.
ކައުންސިލުން ބުނީ ސައްހަ ލިޔެކިޔުން ނެތް އެއްވެސް ބިދޭސީއަކަށް އައްޑު އަށް އެތެރެ ނުވެވޭނެ ކަމަށެވެ. މިހާރު ތިބި މީހުންގެ ތެރެއިން ވެސް ސައްހަ ލިޔެކިޔުން ނެތި ސަރުކާރުން ހިންގާ ރެގިއުލަރައިޒޭޝަން ޕްރޮގްރާމުގައި ބައިވެރިނުވާ ނަމަ ސަރުކާރާ ގުޅިގެން އެ ބަޔަކު ގައުމަށް ފޮނުވާލާނެ ކަމަށް ވެސް އައްޑޫ ސިޓީ ކައުންސިލުން ބުންޏެވެ.
ސިޓީ ކައުންސިލުން ގެނައި މި ބަދަލުތަކަކީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ 39 ވަނަ މާއްދާގެ (ޓ) އާއި (ޔ) އާއި އެ ގާނޫނުގެ 40 ވަނަ މާއްދާގެ (ހ) ގެ 26 ވަނަ ނަންބަރުގެ މައްޗަށް ރިއާޔަތްކޮށް، ބިދޭސީންނާއި ގުޅޭގޮތުން ކަމާބެހޭ ދައުލަތުގެ އިދާރާތަކާއި މަޝްވަރާކޮށްގެން ނިންމާފައިވާ ނިންމުންތަކެކެވެ.
ރާއްޖޭގައި ގަވައިދާހިލާފަށް އުޅެ ތިބި ބިދޭސީންގެ އަދަދު 50،000 އަށް ވުރެ މަތި ކަމަށް ކަމާ ބެހޭ އިދާރާތަކުން ވަނީ ބުނެފަ އެވެ.
އެ މައްސަލަ ހައްލުކުރުމަށް، ސަރުކާރުން މަސައްކަތް ފަށާފައިވާއިރު މިދިޔަ އަހަރުގެ ތެރޭގައި އިކޮނޮމިކް މިނިސްޓްރީން ވަނީ ބިދޭސީން ރަޖިސްޓްރީކުރުމުގެ ހާއްސަ ޕްރޮގްރާމެއް ވެސް ފަށައިފަ އެވެ.
ކޮވިޑް-19ގެ ސަބަބުން ބިދޭސީންނަށް ވަކި ހާއްސަ ސަމާލުކަމެއް ދިފައިވާއިރު މާލޭގައި ތޮއްޖެހިގެން އުޅޭ ބިދޭސީންނަށް ރަނގަޅު ބޯހިޔާވަހިކަން ހޯދައިދީފައި ވެއެވެ. އެގޮތުން ބިދޭސީންނަށް ތިލަފުށި ގުޅީފަޅު އަދި ހުޅުމާލެއިން ވެސް ޖާގަ ހޯދައިދީފައި ވެއެވެ.
މީގެ އިތުރުން ގިނަ އަދަދެއްގެ ބިދޭސީން އަނބުރާ ގައުމަށް ފޮނުވާލައިފަ ވެސް ވެއެވެ. އިންޑިއާގެ ގިނަ ބައެއްގެ އިތުރަށް ބަންގްލަދޭޝްގެ ގިނަ ހާހަކަށް ވުރެ ގިނަ މީހުން ވެސް އަނބުރާ ގައުމަށް ފޮނުވާލާފައި ވެއެވެ.
