ގާނޫނީ މައުލޫމާތުތަކަށް ޚާއްސަ ވެބްސައިޓެއް މަދަނީ ޖަމްއިއްޔާއަކުން ލޯންޗްކޮށްފިި އެވެ.
"ޖަސްޓިސް އިނީޝިއޭޓިވް.ލީގަލް" ގެ ނަމުގައި ޖަސްޓިސް އިނީޝިއޭޓިވް މޯލްޑިވްސް އިން ލޯންޗްކުރި ވެބްސައިޓަކީ ހުރިހާ ގާނޫނަކާއި ގާނޫނަށް ގެނެވޭ އިސްލާހުތައް އެއް ޕްލެޓްފޯމަކުން ފެންނާނެ ގޮތަށް ފަރުމާ ކޮށްފައިވާ ވެބްސައިޓެކެވެ. ޖަސްޓިސް އިނީޝިއޭޓިވް މޯލްޑިވްސް އަކީ ލެކްސަވީ ޗެމްބާސްގެ އިސް ނެގުމުގެ ދަށުން ހިންގާ ޖަމްއިއްޔާ އެކެވެ.
އެ ވެބްސައިޓްގައި ހުރިހާ ގާނޫނުތަކެއް ހިމަނާފައިވަނީ އެ ގާނޫނުތަކަށް ގެނެސްފައިވާ ހުރިހާ އިސްލާހުތަކާއި އަދި ގާނޫނުގެ އަރިމަތީ ސުރުހީތަކުން ބެލޭ ގޮތަށެވެ. މިއީ އިސްލާހުތައް ހިމެނޭހެން ހުރިހާ ގާނޫނުތަކެއް ކޮމްޕައިލްކޮށް ލޯންޗްކުރި ފުރަތަމަ ވެބްސައިޓެވެ. އަދި އިސްލާހުތައް ވަކިވަކިން ބެލޭ ގޮތަށް ވެބްސައިޓްގައި ހިމަނާފައި ވާއިރު، ހިލޭ ބޭނުން ކުރެވޭ އެ ވެބްސައިޓް ހަދާފައިވަނީ ފޯނާއި ޓެބްލެޓުން ވެސް ފަސޭހަކޮށް ބެލޭ ގޮތަށެވެ.
މީގެ އިތުރުން ގާނޫނުތަކަށް އަމަލު ކުރަން ފެށި ތާރީޚުތަކާއި ގާނޫނީ މައުލޫއުތަކާއި ކޯޓުތަކުގެ ނިންމުންތަކާ ބެހޭގޮތުން ލިޔެފައިވާ ލިޔުންތަކާއި ކޯޓުތަކާއި ޓްރައިބިއުނަލްތަކަށް ހުށަހަޅަންޖެހޭ ފޯމްތައް ވެސް އެ ވެބްސައިޓުން ލިބެން ހުރެ އެވެ.