އޯ ލެވެލް ފަށަނީ އަންނަ އޭޕްރީލްގައި

ކޮވިޑް-19 އާ ގުޅިގެން ފަސްވި ކެމްބްރިޖް އޯ ލެވެލް އިމްތިހާނު، އަންނަ އޭޕްރީލް މަހު ބާއްވަން ޝެޑިއުލްކޮށްފި އެވެ.

ސްކޫލުތަކަށް ފޮނުވާފައިވާ ޝެޑިއުލްގައިވާ ގޮތުން އެންމެ ފުރަތަމަ އޭޕްރީލް 14، 2021 ގައި އޮންނަނީ އާޓް އަދި ޑިޒައިންގެ ޕޭޕަރެވެ. ޖެހިގެން އަންނަ ދުވަހު ވެސް އާޓް އަދި ޑިޒައިންގެ ޓެސްޓެއް އޮވެ އެވެ.

ދިހަ އަހަރުގެ ތެރޭގައި ހަދާ އެންމެ ބޮޑު އިމްތިހާނު، އަހަރުތަކެއް ވަންދެން ފަށަމުން އައީ އިސްލާމާއި ދިވެހި ޕޭޕަރުންނެވެ. އެކަމަކު މި ފަހަރު ވަނީ އެކަމަށް ވެސް ބަދަލުތަކެއް ގެނެސްފަ އެވެ. މެއި 1، 2021 ގައި އިސްލާމް ޕޭޕަރު 2 އޮންނައިރު އެ މާއްދާގެ ޕޭޕަރު 1 ބާއްވަން ހަމަޖައްސާފައިވަނީ ޖެހިގެން އަންނަ ދުވަހެވެ. ދިވެހި ޓެސްޓު ބާއްވަނީ މެދުތެރޭގަ އެވެ.

އެންމެ ފަހު އިމްތިހާނު އިމްތިހާނު އޮންނާނީ ޖޫން 11، 2021 ގަ އެވެ. އެއީ ބަޔޮލޮޖީގެ ޓެސްޓެކެވެ.

ޑިޕާޓްމަންޓް އޮފް ޕަބްލިކް އެގްޒަމިނޭޝަން (ޑީޕީއީ) ހިންގުމާ ހަވާލުވެހުންނެވި އެޑިއުކޭޝަންގެ ޑެޕިއުޓީ މިނިސްޓަރު މުހައްމަދު އިހުސާން ވިދާޅުވީ ދަރިވަރުން ކިޔަވަމުން އަންނަ ސިލަބަހާއި ކަރިކިއުލަމް ވެސް މިހާރު ތަފާތު ކަމަށެވެ. އިސްލާމާއި ދިވެހި ޓެސްޓު އޮންނަ ދުވަސްތަކަށް ބަދަލު ގެނައީ ޓީޗަރުންނާއި ދަރިވަރުން އަދި ބެލެނިވެރިންގެ ވެސް އެދުމުގެ މަތިން ކަމަށް ވިދާޅުވި އެވެ.

"ކޮވިޑްގެ ހާލަތު ވީމަ ދަރިވަރުންނަށް ލުއި ދީ، އެންއައިއީގެ ވެސް އެދުމަކަށް މި ގޮތަށް ބަދަލު ގެނައީ،" އިހުސާން ވިދާޅުވި އެވެ.

އޯ ލެވެލް އަދި އެސްއެސްސީ އިމްތިހާނު ފަސްކޮށް މިދިޔަ އޭޕްރީލް މަހު އެޑިއުކޭޝަން މިނިސްޓްރީން ނެރުނު ސާކިއުލާގައި ބުނީ ކޮވިޑުގެ ސަބަބުން ކުރިމަތިވެފައިވާ ހާލަތުގައި ސިލަބަސް ނިންމައި އިމްތިހާނަށް ތައްޔާރުވާން އެކަށީގެންވާ ވަގުތު ލިބޭނެކަމަށް ނުފެންނަ ކަމަށެވެ. އެހެންވެ ޖީސީއީ އޯލެވެލް، އައިޖީސީއެސްއީ އަދި އެސްއެސްސީ އިމްތިހާނު އެ ދުވަސްވަރު ނުބާއްވަން ހަމަޖެއްސީ ކަމަށް ބުންޏެވެ. "މި ނިންމުމާ ގުޅިގެން ދެން އިމްތިހާނު ބާއްވާނެ ދުވަސްވަރެއް ކަނޑައެޅުމުގެ މަސައްކަތް ކުރަމުންދާ ވާހަކަ ވެސް ދެންނެވީމެވެ. މި ބަދަލު ގެނައުމުގައި އެންމެ ބޮޑު އިސްކަމެއް ދޭނީ ދަރިވަރުންނަށް ލިބޭ ގެއްލުން ވީހާ ވެސް ކުޑަ ކުރުމަށެވެ،" އެޑިއުކޭޝަން މިނިސްޓަރު ޑރ. އައިޝަތު އަލީ ސޮއިކުރައްވައި، ރާއްޖޭގެ ހުރިހާ ސްކޫލަކަށް ފޮނުއްވި ސާކިއުލާގައިވެ އެވެ.