ދިވެހި އަންހެނުން މިހާރު އަޅާ ބުރުގާ ސްޓައިލްގެ ކުރިން އެކި ދުވަސްވަރު އެކި ވައްތަރުގެ ބުރުގާ ފެނިފައިވެ އެވެ. އެކި ސްޓައިލަށް، އެކި ކުލައިގެ ފޮތިން ބުރުގާ އެޅި އެވެ. މިއީ ވެސް ހުނަރުވެރިކަމާ ގުޅިފައިވާ ކަމެއްކަން އެނގިގެން ދިޔަ އެވެ.
"އެއްލި ބުރުގާ" ގެ ގޮތުގައި 1960ގެ އަހަރުތަކުގައި ބުރުގާ ސްޓައިލެއް މަޝްހޫރުކަން އޭރުގެ ފޮޓޯތަކުން ހާމަވެ އެވެ.
އެއްލި ބުރުގާ އަކީ ތުނި ދޮޕައްޓާ ފޮއްޗެއް ގޮތަށް، ވިދާ މިނާ ނުވަތަ ލޭސް ޑިޒައިން ޖަހާފައިވާ، ދޫކޮށް އޮޅާލައިފައިވާ ބުރުގާއެކެވެ. މި ބުރުގާ އާއްމުކޮށް އަޅާ އުޅުނީ އިސްތަށިގަނޑު ހުޅިއަކަށް އައްސާލުމަށް ފަހު ލިބާހާއި ފޭއްޔާ އެކުގަ އެވެ.
އޭގެ ފަހުން އެންމެ އާއްމުކޮށް އެޅި ބުރުގާ އަކީ ދެ ކަން ދޫކޮށްލާފައި އޮންނަ ބުރުގާ އެކެވެ. މިއީ 1980ގެ އަހަރުތަކުގައި އެޅި ސްޓައިލެކެވެ. ކުރިމައްޗަށް ދެ ކަން ވައްޓާލާފައި ފަހަތަށް އެއް ކަން ވައްޓާލައިފަ އެވެ. މީގެ ބުރުގާ އާންމުކޮށް އަޅާ އުޅުނީ ވަރަށް ސާދާ އެއް ކުލައިގެ ފޮތިންނެވެ. އަދި ބައެއް ފަހަރާ ބުރުގާގެ ކައިރީގައި ލޭސް ރޭނދާ ހަރުކޮށްފައި ހުރެ އެވެ. މި ބުރުގާ ގިނައިން އަޅަނީ އުމުރުން ދުވަސްވީ މީހުންނެވެ.
މި ބުރުގާ ޒަމާނީ ގޮތަކަށް ބަދަލުކޮށްލައިގެން 90ގެ އަހަރުތަކުގައި އަޅަން ފެށި އެވެ. އޭރު ގިނައިން ބޭނުންކުރީ މާޖެހި ފޮތީގެ ބުރުގާ އެވެ. ބުރުގާގެ ދެ ކަން އެކި ސްޓައިލަށް އޮޅާފައި ނުވަތަ އެއް ކަން ވައްޓާލާފައި ބޮލުގައި ޖަހާ ރީތި ވިދާ ދައްޗަކުން ހަރުކޮށްލަނީ އެވެ. މި ބުރުގާއާ އެކު ގިނައިން ލަނީ ކުރުތާ ސްޓައިލުގެ އަތް ދިގު ޓޮޕެވެ.
ބުރުގާގެ ސްޓައިލް "އުސް ވީ" 2000ގެ އަހަރުތަކަ އެވެ. ގިނައިން އެޅީ ޕްރިންޓު ޖެހި ފޮތީގެ ބުރުގަލެވެ. ބުރުގާ ފޮތި އޮޅާލުމުގެ ކުރިން، އިސްތަށިގަނޑު އުސް ހުޅިއަކަށް ސްޓައިލް ކޮށްލުމަށް ފަހު މާޖެހި ޕިންއެއް ހަރުކޮށްލަ އެވެ. މި ބުރުގާ އަކީ މިހާތަނަށް ދިވެހިންގެ ތެރޭގައި އެޅި އެންމެ ގޮތް ބޮޑު ސްޓައިލެވެ.
މި ފަހުގެ ބުރުގާ ސްޓައިލް އޭރަށްވުރެން އާދައިގެ އެވެ. ޝިފޯން އަދި ޝޯލް ފޮތި ރާއްޖޭގެ ފިހާރަތަކުން އާއްމުކޮށް ލިބެން ހުރުމުގެ ސަބަބުން، ގިނައިން އަޅަނީ ދޫ ސްޓައިލަކަށް؛ ބޮލާ ކައިރިކޮށް އޮޅާފައިވާ ސްޓައިލެކެވެ. މި ސްޓައިލް މިހާރު މަދުވެފައި ކަޅު ފޮތީގެ "5 މުށް ބުރުގާ" މަގުބޫލުވެއްޖެ އެވެ. ކަޅު ބުރުގާގެ އިތުރުން މޫނު ބުރުގާ ވެސް އާއްމުވެއްޖެ އެވެ. މި ދުވަސްވަރަށް ވަކި ހާއްސަ ސްޓައިލެއް ނެތެވެ. އެކި ސްޓައިލްތައް އެބަ ފެނެ އެވެ. އެކަމަކު އަދިވެސް ދާނީ ބަދަލުވަމުންނެވެ.