ސުލަވޭސީ (ޖެނުއަރީ 15) - އިންޑޮނީޝިއާގެ ސުލަވޭސީ އައިލެންޑަށް މިއަދު އައި ބާރުގަދަ ބިންހެލުމުގައި ވެއްޓުނު އިމާރާތްތަކުގެ ތެރޭގައި ހޮސްޕިޓަލެއް ވެސް ހިމެނިއްޖެ އެވެ.
ރިކްޓާ މިންގަނޑުން 6.2 ގެ ބާރުމިނުގައި އައި ބިންހެލުމުގައި 42 މީހުން މަރުވި އެވެ.
ފަސް ބުރިއަށް ހަދާފައިވާ މިތުރާ މަނަކައްރާ ހޮސްޕިޓަލުން ބޮޑު ބައެއް ވެއްޓުމުގެ ސަބަބުން ވަނީ ފަސް މީހުން މަރުވެފަ އެވެ. އެ ހޮސްޕިޓަލުން ވަނީ 60 މީހުން ސަލާމަތްކޮށްފަ އެވެ.
"އެއީ ވަރށް ކުއްލިއަކަށް ދިމާވި ހާދިސާއެއް. ގާތްގަނޑަކަށް 10 ސުކުންތު ތެރޭ،" ފުލުހުންގެ ތަރުޖަމނާކު ވިދާޅުވި އެވެ.
އޭނާ ވިދާޅުވީ ބިންހެލުމުގައި ހޮސްޕިޓަލުން ކަރަންޓް ވެސް ދިޔަ ކަމަށެވެ.
ބިންހެލުން އައީ އިންޑޮނީޝިއާ ގަޑިން މިއަދު މެންދުރު 1 ޖެހިއިރު އައި ވަރުގަދަ ލޮޅުމަކާ އެކު އެވެ. ބިންހެލުން އައި ނަމަވެސް ސުނާމީގެ އިންޒާރު ދީފައެއް ނުވެ އެވެ. ނަމަވެސް ބައެއް މީހުން ވަނީ ރައްކާތެރި ހިސާބުތަކުން ހިމާޔަތް ހޯދައިފަ އެވެ.
އިންޑޮނީޝިއާގެ ސުމަތުރާ އަށް 2004 ވަނަ އަހަރު އައި ބިންހެލުމާ އެކު އުފެދުނު ސުނާމީގައި އޭޝިއާ އިން 226،000 މީހުން މަރުވި އެވެ. އިންޑޮނީޝިއާ އިން އެކަނި 120،0000 މީހުން މަރުވި އެވެ.