އެކްޓަރު އާމީ ހެމާ ދެއްކި ވާހަކަތަކަކާ ގުޅިގެން އަމާޒުވި ފާޑުކިޔުންތަކާ ހެދި "ޝޮޓްގަން ވެޑިން" ގެ ބަތަލުގެ ރޯލުން އޭނާ ވަކިވެފައި ވާތީ އެ ރޯލަށް ޖޯޝް ޑަމެލް ނަގަން ނިިންމާފައިވާ ކަމަށް ރިޕޯޓްތައް ބުނެފި އެވެ.
ހޮލީވުޑްގެ ޚަބަރުތައް ގެނެސްދޭ ނޫސްތަކުން ބުނި ގޮތުގައި "ޓްރާންސްފޯމާ" ފަދަ ފިލްމުތަކުން ފެނިފައިވާ 48 އަހަރުގެ އެކްޓަރާ އެކު، ލަޔަންސް ގޭޓުން މިހާރު އަންނަނީ މަޝްވަރާކުރަމުންނެވެ. އަދި އެއްބަސްވުމަކަށް އާދެވުމާ އެކު އެކަން ރަސްމީކޮށް އިއުލާންކުރާނެ އެވެ.
ކޮމެޑީއެއްގެ ގޮތުގައި ހަދާ "ޝޮޓްގަން ވެޑިން" ގެ ބަތަލާ އަކީ ލަވަކިޔުންޔެރިޔާ ޖެނިފާ ލޮޕޭޒެވެ. މި ފިލްމަށް ޖޯޝް އެއްބަސްވެއްޖެ ނަމަ އެއީ މި ދެ ތަރިންގެ ބޮޑު ސްކްރީނުން އެކީގައި ފެންނާނެ ފުރަތަމަ ފަހަރަށް ވާނެ އެވެ.
މިދިޔަ އަހަރު "ދަ ލޮސްޓް ހަޒްބެންޑް" އާއި "ތިންކް ލައިކް އަ ޑޯގް" އިން ފެނުނު ޖޯޝްގެ ކުރިއަށް އޮތް ފިލްމަކީ "ބްލެކްއައުޓް" އެވެ.
ބެލުންތެރިންގެ ބޮޑު މަގުބޫލުކަމެއް ހޯދި 2012 ގެ "ޕިޗް ޕާކެޓް" ގެ ޑައިރެކްޓަރު ޖޭޒަން މޯ ޑައިރެކްޓްކުރާ "ޝޮޓްގަން ވެޑިން" އަކީ ޑޮމިނިުކަން ރިޕަބްލިކްގައި ޝޫޓްކުރަން ހަމަޖެހިފައިވާ ފިލްމެކެވެ. މީގައި ކިޔައިދޭނީ ޑެސްޓިނޭޝަން ވެޑިންއެއްގެ ތެރޭގައި ހިނގާ ނުރައްކާތެރި ހާދިސާއަކާ ގުޅިގެން ދިމާވާ ހެއްވާ މަޖާ ހާޖާނުގަނޑެއްގެ ވާހަކަ އެވެ.
