ޖެނިފާ ލޮޕޭޒްގެ "ޝޮޓްގަން ވެޑިން" އިން އާމީ ހެމާ ވަކިވެއްޖެ

ޝޫޓިން ފަށަން ތައްޔާރުވަމުން ދިޔަ ޖެނިފާ ލޮޕޭޒްގެ އެކްޝަން-ކޮމެޑީ "ޝޮޓްގަން ވެޑިން" އިން ފިލްމުގެ ބަތަލު އާމީ ހެމާ ވަކިވެއްޖެ އެވެ.

މި ފަހުން "ކޯލް މީ ބައި ޔޯ ނޭމް" އާއި "ހޮޓެލް މުމްބާއީ" ފަދަ ފިލްމުތަކުން ފެނިފައިވާ އެކްޓަރު ކުއްލި ގޮތަކަށް ފިލްމުން ވަކިވީ އޭނާ ދައްކާފައިވާ ވާހަކަތަކެއްގެ މައްސަލަ ހޫނުވެ، އާންމުންގެ ފަރާތުން ބޮޑެތި ފާޑުކިޔުންތަކެއް ވެސް އަމާޒުވެފައި ވަނިކޮށެވެ. ލޯބީގެ ގުޅުންތަކުގައި އޭނާ އަކީ ތަންކޮޅެއް "ހަރުކަށި މީހެއް" ކަމަށާއި "ކެނަބަލިޒަމް" އަށް ހިތްވަރުދޭ ކަހަލަ ވާހަކަތަކެއް ދައްކާފައިވެ އާމީ ދައްކާފައިވެ އެވެ.

މި ވާހަކަ ސޯޝަލް މީޑިއާގައި ބައެއް މީހުން މާ ބޮޑުކޮށްލުމުން "ޝޮޓްގަން ވެޑިން" ހަދާ ލަޔަންސް ގޭޓުން ވެސް ވަނީ އާމީ އަމިއްލަ އަށް ފިލްމުން ވަކިވާން އެދިފަ އެވެ. އަދި އޭނާ އާންމުކުރި ބަޔާނެއްގައި ބުނީ ފިލްމުން ވަކިވާން ޖެހުމަކީ މައްސަލައެއް ނޫން ކަމަށާއި ކޮވިޑްގެ ބަލިމަޑުކަމުގެ ތެރޭގައި ދަރިން ދޫކޮށްލާފައި އެހެން ގައުމަކަށް ފިލްމުގެ ޝޫޓިން އަށް މި ވަގުތު ދެވެން ވެސް ނެތް ކަމަށެވެ.

ޖޭޒަން މޯ ޑައިރެކްޓްކުރާ "ޝޮޓްގަން ވެޑިން" ޝޫޓްކުރަން ނިންމާފައި ވަނީ ޑޮމިނިކަން ރިޕަބްލިކްގަ އެވެ. އަދި ޝޫޓިން އަށް ހަތަރު މަހެއްހާ ދުވަސް ނަގާނެ އެވެ.

"ޝޮޓްގަން ވެޑިން" އަށް އާމީ ވަކިވުމާ ގުޅިގެން ފިލްމަށް އެހެން ބަތަލަކު ހޯދުމުގެ މަސައްކަތް މިހާރު އަންނަނީ ކުރަމުންނެވެ. މި ފިލްމުގެ އެކްޒެކެޓިވް ޕްރޮޑިއުސަރެއްގެ ގޮތުގައި މަޝްހޫރު އެކްޓަރު ރަޔަން ރެނޮލްޑްސް ވެސް ހިއްސާވެ އެވެ.

"ޝޮޓްގަން ވެޑިން" އަކީ ޑެސްޓިނޭޝަން ވެޑިންއެއްގެ ތެރޭގައި ހިނގާ ނުރައްކާތެރި ހާދިސާއަކާ ގުޅިގެން ދިމާވާ ހެއްވާ މަޖާ ހާޖާނުގަނޑެއް ދައްކުވައި ދޭނެ ފިލްމެކެވެ. މީގެ ސްކްރީންޕްލޭ ލިޔެފައި ވަނީ މާކް ހޭމާ އާއި ލިޒް މެރިވެދާ އެވެ.

ދެ ކުދިން ވެސް ލިބިފައި ވަނިކޮށް މިދިޔަ އަހަރު ކައިވެނި ވެސް ރޫޅައިލި އާމީ، 34، ގެ ކުރިއަށް ހުރި ފިލްމުތަކުގެ ތެރޭގައި "ކްރައިސިސް" އާއި "ޑެތު އޮން ދަ ނައިލް" އަދި "ނެކްސްޓް ގޯލް ވިންސް" ހިމެނެ އެވެ.

އޭނާގެ އެންމެ ފަހުގެ ފިލްމަކީ މިދިޔަ އަހަރު ނެޓްފްލިކްސް އިން ޕްރިމިއާކުރި ރޮމޭންޓިކް ތުރިލާ "ރެބެކާ" އެވެ.