މިދިޔަ އަހަރު ނިމުނު އިރު އެމްޓީސީސީއަށް ރިކޯޑު އަދަދަކަށް ފައިދާ ވެއްޖެ އެވެ.
އެ ކުންފުނިން މިއަދު އާއްމުކުރި ހަތަރުވަނަ ކުއާޓަރުގެ ރިޕޯޓު ދައްކާގޮތުން މިދިޔަ އަހަރު ނިމުނުއިރު ސާފު ފައިދާގެ ގޮތުގައި 172.6 މިލިއަން ރުފިޔާ ވަނީ ލިބިފަ އެވެ. މިއީ 2019 ވަނަ އަހަރުގެ އެ މުއްދަތާ އަޅާބަލާއިރު، 119.8 މިލިއަން ރުފިޔާގެ ކުރިއެރުމެކެވެ. 2019 ވަނަ އަހަރު އެ ކުންފުންޏަށް ސާފު ފައިދާގެ ގޮތުގައި ލިބުނީ 52.8 މިލިއަން ރުފިޔާ އެވެ.
މިދިޔަ އަހަރު ޓެކުހަށް ކެނޑުމުގެ ކުރިން އެ ކުންފުންޏަށް 203.11 މިލިއަން ރުފިޔާ ފައިދާގެ ގޮތުގައި ލިބުނުއިރު، 2019 ގައި ލިބުނީ 63.08 މިލިއަން ރުފިޔާ އެވެ.
އެމްޓީސީސީގެ ސީއީއޯ އާދަމް އާޒިމް މިއަދު ވިދާޅުވީ މިދިޔަ އަހަރަކީ މިހާތަނަށް އެ ކުންފުނީގެ މާލީ ގޮތުން ނަތީޖާ އެންމެ ރަނގަޅު އަހަރު ކަމަށެވެ. ކޮވިޑް-19ގެ ސަބަބުން ލޮކްޑައުން އިއުލާން ކުރި އިރު ވެސް އެއްވެސް މަހަކު އެ ކުންފުންޏަށް ގެއްލުން ނުވާ ކަމަށް އޭނާ ވިދާޅުވި އެވެ.
"2020 ވަނަ އަހަރަކީ އެމްޓީސީސީގެ 40 އަހަރުގެ ހަޔާތުގައި އެންމެ ބޮޑު ފައިދާއެއް ޑިކްލެއާ ކުރެވޭ އަހަރު. މިއީ 2019 ވަނަ އަހަރާ އަޅާބަލާއިރު ވަރަށް ބޮޑު ކުރިއެރުމެއް. މިވަރުގެ ކުރިއެރުމެއް އެމްޓީސީސީގެ 40 އަހަރުގެ ހަޔާތުގައި ހޯދިފައެއް ނެތް،" އާޒިމް ވިދާޅުވި އެވެ.
އޭނާ ވިދާޅުވީ އެ ކުންފުންޏަށް އެންމެ ބޮޑު އާމްދަނީއެއް ލިބިފައިވަނީ މެރިން ކޮންސްޓްރަކްޝަންގެ ދާއިރާއިން ކަމަށެވެ. އެހެންކަމުން އެ ދާއިރާ ފުޅާކުރުމަށް މަސައްކަތް ކުރަމުން އަންނަ ކަމަށް އޭނާ ވިދާޅުވި އެވެ.
"އަޅުގަނޑުމެންނަށް އެއްފަހަރާ 40 ރަށުގައި މަސައްކަތް އެބަކުރެވޭ. އެއްފަހަރާ ތިން އެއާޕޯޓުގައި މަސައްކަތް ކުރުމާއި ތިން ރަށެއްގެ މަގު ހެދުމާއި ތިން ރަށެއްގެ ބިން ހިއްކުމުގެ މަސައްކަތް ކުރުމުގެ ކެޕޭސިޓީ އެބަހުރި."
އެމްޓީސީސީން ވަނީ މިދިޔަ އަހަރުގެ ތެރޭގައި 34 ޕްރޮޖެކްޓެއްގެ މަސައްކަތް ނިންމާލައިފަ އެވެ. މިއީ މިހާތަނަށް އެ ކުންފުނިން އެންމެ ގިނަ ޕްރޮޖެކްޓުތައް ނިންމި ވެސް އަހަރެވެ.