ފުލުހުންނަށް ލިބުނު ބާރާއެކު ރާއްޖޭގައި އޮޓޮޕްސީ ހަދަން ތައްޔާރުވަނީ

ގާނޫނުގެ ތެރެއިން ލިބުނު އިތުރު ބާރާއެކު، ރާއްޖޭގައި އޮޓޮޕްސީ ހެދުމަށް ތައްޔާރުވަމުން އަންނަ ކަމަށް ފުލުހުން ބުނެފި އެވެ.

ޕޮލިސް ވެބްސައިޓުގައި އިއްޔެ ބުނީ، ޖިނާއީ އިޖުރާއަތުގެ ގާނޫނަށް މި ފަހުން ގެނައި ބަދަލުގެ ސަބަބުން އޮޓޮޕްސީ ހެދުމަށް ފުލުހުންނަށް ބާރުތަކެއް ދީފައިވާ ކަމަށެވެ. އެއާއެކު، މަރުގެ އަސްލު ސަބަބު ދެނެގަތުމަށް ހަދާ އެ ޓެސްޓު ފެށުމަށް ތައްޔާރުވަމުން އަންނަ ކަމަށް ބުންޏެވެ.

ފުލުހުންގެ ފަރާތުން އެކަމުގައި އިސްކޮށް ހުންނެވީ ޕެތަލޮޖިސްޓް، އިންސްޕެކްޓަރު އޮފް ޕޮލިސް ޑރ. ހަސަން އުމަރެވެ. ޕެތަލޮޖިސްޓުންނަކީ، ހަށިގަނޑުގައި ހުންނަ ދިޔާ ތަކެއްޗާއި ޓިޝޫ ފަދަ ތަކެތި އިތުރުކޮށް ތަހުލީލު ކުރުމުގައި އިސްކޮށް ހަރަކާތްތެރިވާ ޑޮކްޓަރުންނެވެ.

އޭނާއާ ހަވާލާދީ، ފުލުހުންގެ ވެބްސައިޓުގައި ބުނީ ރާއްޖޭގައި އޮޓޮޕްސީގެ ހިދުމަތް ފެށޭނެކަމުގެ ޔަގީންކަން އޮންނަ ކަމަށެވެ.

"އަޅުގަނޑަށް އަބަދު ވެސް ޔަގީންކަން އޮވޭ ރާއްޖޭގައި ވެސް މި ހިދުމަތް ފެށޭނެކަން. ކުރިއަރަމުންދާ ގައުމެއް ދުނިޔޭގެ ހުރި ހުރިހާ ޕްރޮފެޝަނަލް ހިދުމަތްތަކެއް ވެސް ފޯރުކޮށްދިނުމަށް މަސައްކަތް ކުރަމުންދާ ގައުމެއް. އަޅުގަނޑުމެންނަށް ވަރަށް މުހިއްމު، ބޭނުންތެރި ދާއިރާއެއް މި ދާއިރާއަކީ،" މީގެ 12 އަހަރު ކުރިން ފުލުހުންގެ ހިދުމަތާ ގުޅިވަޑައިގެންނެވި ޑރ. އުމަރު ވިދާޅުވި އެވެ.

އޭނާ ވިދާޅުވިގޮތުގައި، ފޮރެންސިން ހިދުމަތްތައް އެއް ދުވަހުން އަނެއް ދުވަހަށް ފުޅާވެ، ޝަރީއަތުގެ މަރުހަލާގައި ވެސް ފޮރެންސިކް ހެކިތަކަށް ބަރޯސާވާ މިންވަރު މިހާރު ވަނީ އިތުރުވެފަ އެވެ. އަދި ރާއްޖޭގައި އޮޓޮޕްސީ ހެދޭނެ އިންތިޒާމު ހަމަޖެހިފައި ނެތުމަކީ ތަހުގީގުކުރާ މީހުންނަށް ބޮޑެތި ދަތިތަކެއް ކުރިމަތިވާކަން ފާހަގަކުރެއްވި އެވެ.

ރާއްޖޭގައި އޮޓޮޕްސީ ހަދަން ކުރަންޖެހޭ މަސައްކަތްތައް ދޭތެރެދޭތެރެއިން ކުރެ އެވެ. އެގޮތުން، މިދިޔަ އަހަރު ޖިނާއީ އިޖުރާއަތުގެ ގާނޫނަށް ގެނައި އިސްލާހުތަކާ ގުޅިގެން ފުލުހުންނަށް އޮޓޮޕްސީ ހެދުމުގެ ބާރު ދިނުމާއެކު އަނެއްކާ ވެސް ވަނީ އެ މަސައްކަތް ފަށައިފަ އެވެ. އެކަމާ ގުޅޭ ގަވައިދުތައް ހެދުމުގެ މަސައްކަތްތަކެއް ވެސް އަންނަނީ ކުރަމުންނެވެ.

ޒަމާނީ ކުރިއެރުންތަކާއެކު އޮޓޮޕްސީ ހެދުމުގެ ވައްޓަފާޅިއަށް މިހާރު ބޮޑެތި ބަދަލުތަކެއް އައިސްފައިވާކަން ޑރ. އުމަރު ފާހަގަކުރެއްވި އެވެ.

ޑރ. އުމަރު ވިދާޅުވީ ދުނިޔޭގެ ކުރިއަރާފައިވާ ބައެއް ގައުމުތަކުގައި އޮޓޮޕްސީ ހެދުމުގައި ބޮޑަށް ބަރޯސާވަނީ ޓެކްނޮލޮޖީގެ އެހީގައި ވާޗުއަލްކޮށް ކުރުމަށެވެ.

"އަޅުގަނޑުމެންގެ ތެރޭގައި މިހާރު މިހިރަ ޓެކްނޮލޮޖީ، ސީޓީ ސްކޭން ފަދަ އެއްޗެހި ބޭނުންކޮށްގެން ވާޗުއަލް އޮޓޮޕްސީއެއް ހަދައިގެން އެއިން ރިޒަލްޓް ދެނެގަނެވޭތޯ ބަލާނެ. އެހެންވީމާ އަސްލުގައި މިހާރު މީހަކު ފަޅާނީ އެ ނޫން ގޮތަކަށް އެކަން ދެނެގަނެގެން ނެތް ހާލަތުގައި އެކަނި. އެއީ އަޅުގަނޑުމެންގެ ވެސް ތަސައްވުރަކީ. އެގޮތަށް މަސައްކަތް ބައްޓަންކުރެވޭތޯ މަސައްކަތް ކުރަމުން މިދަނީ،" ޑރ. އުމަރު ވިދާޅުވި އެވެ.

މަރުގެ މައްސަލައެއްގައި ޝައްކު އުފެދިއްޖެ ނަމަ ޕޯސްޓްމޯޓަމް ހަދަން މިހާރު ފޮނުވަނީ ރާއްޖެއިން ބޭރަށެވެ. އެކަމުގައި އުފުލަންޖެހޭ ތަކުލީފުތައް އިންތިހާއަށް ބޮޑެވެ.