ރާއްޖޭގެ މަޝްހޫރު ރެޕް އާޓިސްޓު ސިމްބޮލިކް ރެކޯޑްސްގެ އިސްމާއިލް އިފްހާމް މުހައްމަދު (ޕެސްޓް) ޑްރަގާއެކު ރޭ ހައްޔަރުކޮށްފި އެވެ.
ފުލުހުންގެ މީޑިއާ އޮފިޝަލަކު މިއަދު ވިދާޅުވީ ލިބުނު އިންޓެލިޖެންސް ރިޕޯޓަކާ ގުޅިގެން ޑްރަގް އެންފޯސްމަންޓް ޑިޕާޓްމަންޓް (ޑީއީޑީ) އިން ރޭ ހިންގި އޮޕަރޭޝަނެއްގައި އޭނާގެ އިތުރުން ހަތަރު މީހަކު ހައްޔަރުކޮށްފައިވާ ކަމަށެވެ.
އެ އޮޕަރޭޝަނުން 2.5 ކިލޯއަށް ވުރެ ގިނަ ޑްރަގްސް އަތުލައިގަނެފައިވާ ކަމަށް ވިދާޅުވިއަސް އެކަމުގެ އިތުރު ތަފުސީލެއް ނުދެއްވަ އެވެ.
ޕެސްޓް އަކީ ރާއްޖޭގައި ރެޕް ކިންގްގެ ގޮތުގައި މަޝްހޫރުވެފައިވާ ފަންނާނެކެވެ.
ޕެސްޓް މަޝްހޫރުކަން ހޯދީ 2011 ވަނަ އަހަރު އޭނާ ކިޔާފައިވާ "ރީތި ކުދިން" ލަވަޔާ އެކުގަ އެވެ. އެއީ އޭނާގެ އުމުރުން އެންމެ 16 އަހަރުގަ އެވެ. އޭގެ ފަހުން އޭނާ ވަނީ މަޝްހޫރުކަން ހޯދި އެތައް ލަވައެއް ކިޔައިފަ އެވެ.
