ދެ ސަރަހައްދުގައި ޖޫނިއާ ކޮލެޖު އެޅުމާ ގުޅޭގޮތުން މަޝްވަރާކޮށްފި

ރާއްޖޭގެ ދެ ސަރަހައްދެއްގައި ޖޫނިއާ ކޮލެޖު އެޅުމާ ގުޅޭގޮތުން، ހަޔަ އެޑިއުކޭޝަން މިނިސްޓްރީން މިއަދު މަޝްވަރާކޮށްފި އެވެ.

އެ މިނިސްޓްރީން ބުނީ ޕަބްލިކް ޕްރައިވެޓް ޕާޓްނަޝިޕް އިންވެސްޓްމަންޓެއްގެ ގޮތުގައި ނ. ކެނދިކުޅުދޫގައި ޖޫނިއާ ކޮލެޖަކާ އެކު ދަނާލެއް ހަދަން، އެ ދާއިރާގެ މެމްބަރު އަހުމަދު އީސާ އަދި ރަށު ކައުންސިލާ އެކު މަޝްވަރާކޮށްފައިވާ ކަމަށެވެ.

ޖޫނިއާ ކޮލެޖުގައި ދެ އަހަރުގެ ތެރޭގައި، 16-21 އަހަރާ ދެމެދުގެ ކުދިން ކިޔެވުން ފުރިހަމަކުރާ ގޮތަށް ތައުލީމާއި ތަމްރީނުގެ ކޯސްތައް ފަރުމާކުރާނީ، ހަޔަ އެޑިއުކޭޝަން މިނިސްޓަރު ޑރ. އިބްރާހިމް ހަސަން ވިދާޅުވިގޮތުގައި، އެ އަތޮޅު ހިމެނޭ ސަރަހައްދުގެ ސިނާއީ މަސައްކަތްތަކަށް އަމާޒުކޮށްގެން ވަޒީފާގެ ބާޒާރަށް އަދި އިތުރަށް މަތީ ތައުލީމުގެ އުނގެނުމަށް މަގުފަހިވާނެ ގޮތްތަކަށެވެ.

ނ. އަތޮޅަކީ ޓޫރިޒަމް ދާއިރާ ވަރަށް ބޮޑަށް ފުޅާވެ ކުރިއަރަމުން އަންނަ އަތޮޅަކަށް ވާތީ، އިނގިރޭސި ބަހުގެ އިތުރުން އެންމެ ގިނަ ޓޫރިސްޓުން އަންނަ ގައުމެއްގެ ބަހެއް ވެސް ޖޫނިއާ ކޮލެޖުގައި ކިޔަވައިދޭނެ ކަމަށް ވާޗުއަލްކޮށް ބޭއްވި ބައްދަލުވުމުގައި މިނިސްޓަރު ވިދާޅުވި އެވެ.

އޭގެ ފަހުން ބޭއްވި އެހެން ބައްދަލުވުމުގައި މިނިސްޓަރު މަޝްވަރާކުރެއްވީ ހއ. ދިއްދޫގައި ޖޫނިއާ ކޮލެޖު އެޅުމާ ބެހޭ ގޮތުންނެވެ. ޕަބްލިކް ޕްރައިވެޓް ޕާޓްނަޝިޕް އިންވެސްޓްމަންޓެއްގެ ގޮތުގައި ޖޫނިއާ ކޮލެޖަކާއެކު ދަނާލެއް ގާއިމްކުރުމަށް ކުރިއަށްގެންދާނެ ގޮތަކާ ގުޅޭގޮތުން، އެ ދާއިރާގެ މެމްބަރު އަބްދުﷲ ވަހީދު އަދި ރަށު ކައުންސިލްގެ މެމްބަރުން މަޝްވަރާކޮށްފަ އެވެ.

ފުވައްމުލަކުގައި ޕްރައިވެޓް ޕާޓްނަޝިޕް އިންވެސްޓްމަންޓެއްގެ ގޮތުގައި ސްޓޭޓް އޮފް ދި އާޓް ޓިވެޓް ސެންޓަރެއް ގާއިމްކުރުމާ ބެހޭގޮތުން، އެ ސިޓީއަށް ނިސްބަތްވެވަޑައިގަންނަވާ މަޖިލިސް މެމްބަރުންނާއި ކައުންސިލަރުންނާ ވެސް މިނިސްޓްރީން މަޝްވަރާކޮށްފައި ވެ އެވެ.