އިންޑިއަން ހައި ކޮމިޝަނުން، ވިސާ އެޕޮއިންޓްމަންޓްގެ ޓޯކަން އޮންލައިންކޮށް ދޫކުރަން ނިންމައިފި އެވެ.
ކޮވިޑް-19 އިން ރައްކާތެރިވާން އިންޑިއާގެ ބޯޑަރުތައް ބަންދުކުރެވިފައި އޮތަސް ރާއްޖެއާ އެކު އޮންނަ ގާތް ގުޅުމެއްގެ ސަބަބުން، ބޭސްފަރުވާއަށް ދިވެހިިންނަށް އިންޑިއާއަށް ދެވޭ ގޮތް އެ ގައުމުން ވަނީ ހަމަޖައްސައިދީފަ އެވެ.
އެ ކޮމިޝަނުން މިއަދު ބުނީ ވިސާ ޖެހުމަށްޓަކައި މީގެ ފަހުން ޓޯކަން ދޫކުރާނީ އޮންލައިންކޮށް ކަމަށެވެ. ވިސާ އަށް އެެދި އޮންލައިންކޮށް ފޯމު ފުރުމަށް ފަހު، ވިސާ ޖެހުމުގެ އެޕޮއިންޓްމަންޓް ހަދަން ހާއްސަކޮށްފައިވާ ވެބްސައިޓަށް ގޮސް އެެކަމަށް އެދި ހުށަހެޅޭނެ އެވެ. އެންމެ އަވަހަށް ލިބެން އޮތް ވަގުތަށް އެޕޮއިންޓްމަންޓް ހެއްދޭނެ ކަމަށް ވެސް އެ ކޮމިޝަން އިން ބުންޏެވެ.
ކަރުދާސް އެއްވެސް ޓޯކަން އެއް މީގެ ފަހުން އެ އިދާރާއަކުން ދުލެއް ނުކުރާނެ އެވެ.
އިންޑިއަން ހައި ކޮމިޝަނުން ބުނީ މި ބަދަލާ އެކު އެޕޮއިންޓްމަންޓް ހަދަން މިދިޔަ މަހުގެ ފަހުކޮޅު ހަމަޖެއްސި ފޯނު ނަންބަރު ބޭނުންކުރުން ހުއްޓާލާނެ ކަމަށެވެ. އަދި މިއީ އެތަނުން ދޭ ހިދުމަތްތައް ޑިޖިޓަލްކުރުމަށްޓަކައި ކުރެވެމުން އަންނަ މަސައްކަތުގެ ތެރޭގައި ހިމެނޭ ކަމެއް ކަަމަށް ވެސް ބުންޏެވެ.
ވިސާއަށް އެދުމަށްޓަކައި މިދިޔަ ހަފްތާގައި ފޯނު ނަންބަރެއް ހަމަޖެއްސީ އެ މަސައްކަތް ކުރަން ބޭނުންކުރާ ސިސްޓަމަށް މައްސަލައެއް ކުރިމަތިވުމުން ވަގުތީ ހައްލެއްގެ ގޮތުގަ އެވެ.