ކޮމަންވެލްތު އެސޯސިއޭޝަން އޮފް ޕަބްލިކް އެކައުންޓްސް (ސީއޭޕީއޭސީ)ގެ ވައިސް ޗެއާއަކަށް ކިނބިދޫ ދާއިރާގެ މެންބަރު މުހައްމަދު ނާޝިޒް ހަމަޖައްސައިފި އެވެ.
ކޮމަންވެލްތު ގައުމުތަކުގެ ޕާލިމެންޓް މެންބަރުން އެ ގައުމެއްގެ ދައުލަތުގެ މާލީ ކަންކަމުގައި މިނިވަންކަމާ އެކު ނިންމުންތައް ނިިންމުމާއި މާލީ ގޮތުން ސަރުކާރުތައް ޒިންމާދާރު ކުރުމުގައި ފުރިހަމަ ގޮތްތަކެއް ނިންމަން ހިތްވަރު ދިނުމުގެ ގޮތުން އުފެއްދި ސީއޭޕީއޭސީގައި މިވަގުތު އެ ޖަމާއަތުގެ 40 ގައުމަކުން ބައިވެރިވެ އެވެ.
ނާޝިޒް އަކީ ރައްޔިތުންގެ މަޖިލީހުގެ ޕަބްލިކް އެކައުންޓްސް ކޮމިޓީ ނުވަތަ މާލިއްޔަތު ކޮމިޓީގެ މުގައްރިރެވެ.
ސީއޭޕީއޭސީގެ ވައިސް ޗެއާއަށް އޭނާ އައްޔަނު ކުރުމުގެ ކުރިން އިއްޔެ ވަނީ އެ ކޮމިޓީގެ އެގްޒެކެޓިވް ކޮމިޓީގެ މެންބަރަކަށް ވެސް އައްޔަނުކޮށްފަ އެވެ. މި ވަގުތު ސީއޭޕީއޭސީގެ ޗެއާކަން ކުރައްވަނީ އިނގިރޭސިިވިލާތުގެ ޕާލިމެންޓް މެންބަރު އަދި އެގައުމުގެ ޕަބްލިކް އެކައުންޓްސްގެ ޗެއާ މެގް ހިލާ އެވެ.
ސީއޭޕީއޭސީން އަންނަނީ ކޮމަންވެލްތުގެ ގައުމުތަކުގެ މާލިއްޔަތު ކޮމިޓީތަކަށް މާލީ ދާއިރާގެ ގާނޫނުތައް ހެދުމާއި މާލީ ގޮތުން ނިންމުންތައް ނިންމުމުގައި އެހީތެރިކަން ދެމުންނެވެ.