ބައެއް ރިސޯޓްތަކުގެ ބީޕީޓީ ބަޔާނުގައި އެއް ޕަސެންޓް ވެސް ފައިދާ ވެފައި ނެތް ކަމަށް އެބަ ދައްކާ ކަމަށާއި އެއީ އެއްވެސް މީހަކު ގަބޫލުކުރާނެ ކަމެއް ނޫން ކަމަށް މާލިއްޔަތު ކޮމެޓީގެ މުގައްރިރު، ކިނބިދޫ ދާއިރާގެ މުހަންމަދު ނާޝިޒް އިއްޔެ ވިދާޅުވެއްޖެ އެވެ.
ރާއްޖެ ވަންނަ ޑޮލަރު ރާއްޖޭގައި ހިފެހެއްޓޭނެ ގޮތަކާ މެދު މާލިއްޔަތު ކޮމެޓީން އިއްޔެ ވަނީ ޓޫރިޒަމް ދާއިރާގެ ޖަމިއްޔާތަކާ ބައްދަލުކޮށްފަ އެވެ. އޭގެ ތެރޭގައި ގެސްޓް ހައުސް އެސޯސިއޭޝަނާއި ޔޮޓް އެސސޯސިއޭޝަނާއި ޓްރެވެލް އެޖެންސީތަކާއި ޓުއާ ގައިޑް އެސޯސިއޭޝަން ހިމެނެ އެވެ. އެ ތިން ޖަމިއްޔާގެ ރައީސުންނާ އެކު، ޖަމިއްޔާގެ ބައެއް މެމްބަރުން ވެސް އިއްޔެގެ ކޮމެޓީގައި ބައިވެރިވެ ވަޑައިގަތެވެ.
ނާޝިޒް ވިދާޅުވީ، ޑޮލަރު ހިފެހެއްޓުމުގެ މައްސަލާގައި ކޮމެޓީން ވެސް ބައެއް ދިރާސާތައް ކޮށް ބައެއް މައުލޫމާތުތައް މީރާ އިން ވެސް ވަނީ ހޯދައިފަ އެވެ. އޭނާ ވިދާޅުވީ އޭގެ ތެރެއިން ފާހަގަކުރެވުނު އެއް ކަމަކީ ބައެއް ރިސޯޓްތަކުން ހުށަހަޅާ ބީޕީޓީ [ބިޒްނަސް ޕްރޮފިޓް ޓެކްސް] ބަޔާނުގައި އެއް ޕަސެންޓްގެ ފައިދާ ވެސް ނެތްކަން ކަމަށެވެ.
"ކާކުތޯ މިކަން ގަބޫލުކުރާނީ؟" އޭނާ ސުވާލު ކުރެއްވި އެވެ.
"އަޅުގަނޑު ނުދަންނަވާނަން ހުރިހާ ރިސޯޓެކޭ. އެކަމަކު ބައެއް ރިސޯޓްތަކުގެ ޕްރޮފިޓް މާޖިން ލެސް ދެން ވަން ޕަސެންޓް. މީގެ މާނައަކީ ކޮންމެވެސް ކަމެއް ހިނގައިފައޭ މިއޮތީ."
ރާއްޖެ އަށް ވަންނަ އާމްދަނީގެ ބޮޑު ބަޔަކީ ޓޫރިޒަމް ދާއިރާ އިން ލިބޭ އާމްދަނީ އެވެ. އަދި ރާއްޖެ އަށް ވަންނަ ބޭރު ފައިސާގެ 90 ޕަސެންޓް ހިއްސާ ކުރަނީ ވެސް ޓޫރިޒަމް ދާއިރާ އެވެ. އެކަމަކު މުޅި އެ ދާއިރާ އަށް ލިބޭ އާމްދަނީގެ ތެރެއިން ރާއްޖޭގައި ހިފެހެއްޓެނީ އެންމެ ވިއްސަކަށް ޕަސެންޓް ކަމަށް ތަޖުރިބާކާރުން ވިދާޅުވެ އެވެ.
ގެސްޓް ހައުސްގެ އެސޯސިއޭޝަންގެ ރައީސް އަބްދުﷲ ނަޝީދު ވިދާޅުވީ ރާއްޖެ އަށް ވަންނަ ބޭރު ފައިސާ ބޭރުވެގެންދާ މައިގަނޑު ސަބަބަކީ ރިސޯޓްތަކުގެ 80 ޕަސެންޓް ކޮންޓްރޯލް ކުރަނީ ބޭރު މީހުން ކަމަށް ވާތީ އެވެ.
"މި މައްސަލަ ހައްލުކުރެވޭނީ އަޅުގަނޑަށް ހީވާ ގޮތުގައި މިސާލަކަށް 100 އެނދުގެ ރިސޯޓެއް ވިއްޔާ އެނދަކަށް ކަނޑައެޅޭ އަންދާޒާއެއް ކޮށްލައިފައި ވަކި އެމައުންޓެއް ކަނޑައެޅުން. ދެން މޮނީޓާ ކުރަންވީ އެވަރަށް އެ ފައިސާ ލިބޭތޯ،" އޭނާ ހިޔާލު ދެއްވި އެވެ.
ރާއްޖެ އަށް ވަންނަ ބޭރު ފައިސާ ރާއްޖޭގައި ހަރު ނުލަނީ ރިސޯޓްތަކަށް އަންނަ ގިނަ ޓޫރިސްޓުންނަކީ ޓްރެވެލް އެޖެންޓުން މެދުވެރިކޮށް އަންނަ ޓޫރިސްޓުން ކަމަށް ވާތީ ކަމަށް ވެސް އޭނާ ވިދާޅުވި އެވެ.
"އެކަމަކު ގެސްޓް ހައުސްތަކަށް މި އަންނަނީ އޮންލައިން ބުކިންްގައި. އެ ފައިސާ ސީދާ ވަންނާނީ ރާއްޖޭގެ ބޭންކްތަކުގައި ހުންނަ އަޅުގަނޑުމެންގެ އެކައުންޓަށް،" ގެސްޓް ހައުސް އެސޯސިއޭޝަންގެ އިސް ބޭފުޅަކު ވިދާޅުވި އެވެ.
ނަޝީދު ވިދާޅުވި ގޮތުގައި ޑޮލަރުގެ މައްސަލަ މިހެން އޮއްވައި، ގެސްޓް ހައުސްތައް ހަދަން ބޭރު މީހުންނަށް އިންވެސްޓް ކުރެވޭ ގޮތަށް ހުޅުވާލުމަކީ މި މައްސަލަ އިތުރަށް ގޯސް ވެދާނެ ކަމެކެވެ.
"މިހާރު 99 ޕަސެންޓް މުޅިން ދިވެހިން އިންވެސްޓް ކޮށްފައި އޮތް ދާއިރާއެއް މިއީ. އެކަމަކު 49 ޕަސެންޓާ ހަމައަށް ބޭރު މީހުންނަށް އިންވެސްޓް ކުރެވޭ ގޮތް ވީމަ ޑޮލަރުތަކެއް އަނެއްކާ ވެސް ބޭރަށް ދިއުމުގެ ބިރު މިއައީ،" އޭނާ ވިދާޅުވި އެވެ.
