ރާއްޖޭގައި ހިންގާފައިވާ އެކިއެކި މަޝްރޫއުތަކުގައި "ވެލިއު ފޯ މަނީ" ނުވަތަ މަޝްރޫއު ހިންގާފައި ވަނީ އެކަށީގެންވާ އަގުތަކުގައިތޯ ބެލުމާއި އިހުމާލުވި ފަރާތްތައް ދެނެގަތުމުގެ މަސައްކަތް މާލިއްޔަތު ކޮމިޓީން ވަރަށް އަވަހަށް ފަށާނެ ކަމަށް މުގައްރިރު ވިދާޅުވެއްޖެ އެވެ.
"މިހާރު" އަށް އިއްޔެ ދެއްވި އިންޓަވިއުއެއްގައި މުގައްރިރު އަދި ކިނބިދޫ ދާއިރާގެ މެމްބަރު މުހަންމަދު ނާޝިޒް ވިދާޅުވީ ރައްޔިތުންގެ މުދަލާއި ހިދުމަތް އެ ރައްޔިތުންނަށް އަމާނާތްތެރިކަމާއި އިހުލާސްތެރިކަމާ އެކު ރައްދުކުރަން، ދައުލަތުގެ އެކިއެކި ޒިންމާތަކާ ހަވާލުވެ ތިބޭ މީހުންނަށް އެނގެންޖެހޭ ކަމަށެވެ.
"މިސާލަކަށް ވެލިއު ފޯ މަނީ. ރައްޔިތުންނަށް އެ ކަމަކަށް ކުރި ހަރަދުގެ ފައިދާ ލިބޭތޯ މިއީ ބަލަން ޖެހޭ ކަމެއް،" އޭނާ ވިދާޅުވި އެވެ.
"އަޅުގަނޑު އަސްލު ދެރަ ވެސްވި، މިސާލަކަށް ސައުދީ ފަންޑުން 297 މިލިއަން ރުފިޔާ އިން ނިންމޭނެ ކަމެއް އެއީ ގއ. ގދ. ގެ ސުނާމީ ހައުސިން މަޝްރޫއަކީ. އެކަމަކު އެކަން ނިމިގެން ދިޔައިރު ދެ ގުނަ އަށް ވުރެ ބޮޑަށް ހަރަދުވީމަ އެއީ މިސް މެނޭޖްމަންޓް. ވެލިއު ފޯ މަނީ. އިމްޕްލިމެންޓް ކުރަން ތިއްބެވި ބޭފުޅުންގެ ފޭލިއާ އެއީ. އަށް އަހަރު ނުވަ އަހަރު ވާއިރު އެތަން ނުނިމި، ރައްޔިތު މީހާ އަށް ބޯހިޔާވަހިކަން ނުލިބި، އެންމެ ފަހުން ފުލުހުންނާއި ސިފައިން ގެންގޮސްގެން ނިންމައި، ކޮންޓްރެކްޓަރަށް 400-500 މިލިއަން ރުފިޔާ ދޭން ޖެހުނީމަ ކަމަކު ނުދާނެ."
އެކަހަލަ އެހެން މިސާލެއް ވެސް އޭނާ ނެންގެވި އެވެ. އެއީ ހިޔާ ފްލެޓްގެ މަޝްރޫއެވެ. އޭނާ ވިދާޅުވީ 7،000 ފްލެޓް އިމާރާތް އެޅުން އެއީ ރަނގަޅު ކަމެއް ކަމަށާއި އޭގެ ސަބަބުން އެތައް ބަޔަކަށް ބޯހިޔާވަހިކަން ވެސް ލިބި ހިތްހަމަޖެހުން ލިބިއްޖެ ކަމަށެވެ.
"އެކަމަކު އެއީ އެ ބޭފުޅުންނަށް ހައްގު މިންވަރުތޯ،" އޭނާ ސުވާލު ކުރެއްވި އެވެ.
"ކޮންމެ ބޭފުޅަކަށް ވެސް އެނގޭނެ ރާއްޖޭގެ މާކެޓްގައި ގެެއެއް ހަދާއިރު އަކަފޫޓަކަށް 1،300ރ. އަށް ގެއެއް ހެދޭނެ ކަން. އެކަމަކު 7،000 ފްލެޓްގެ މަޝްރޫއުގައި އަކަފޫޓަކަށް ބަހާލީމަ [އަގު] 1،700-1،800ރ، އެބަ ޖެހޭ. ފިނިޝިން އާ އެކީ ނިމޭވަރަށް ވުރެ ވެސް ބޮޑު ހަރަދެއް ކޮށްގެން އެތަން ހަދާފައި އެހުރީ. އެކަމަކު މިހާރު ގޮސް ވަންނަން ބަލާއިރު ދޮރުފަތްތަކެއް ނެތް. ޓައިލްސްއެއް ނެތް. ފިނިޝިން ހުރީ ނުހަދާ. އެހެންވީމަ މިކަހަލަ ކަންކަމުގައި މާލިއްޔަތު ކޮމިޓީން ބަލާނީ ކާކުތޯ އިހުމާލުވީ. ކިހިނެއްތޯ ވެފައި އޮތީ."
އޭނާ ވިދާޅުވީ އެކަންކަން އެ ކޮމެޓީން ބަލަން ފެށުމުން އޭގެ ނަތީޖާ އަކީ، މީގެ ފަހުން ހިންގާ މަޝްރޫއުތައް ޒިންމާދާރު ކަމާ އެކު ހިންގުން ކަމަށެވެ. އަދި ވިދާޅުވީ، މިކަންކަން ބަލަނީ މީހެއްގެ ފަހަތުން ދުވުމުގެ ބޭނުމުގައި ނޫން ކަމަށާއި ބޭނުމަކީ އެ މަޝްރޫއުތަކުގެ އަސްލު ފައިދާ ރައްޔިތުންނަށް ހޯދައިދިނުން ކަމަށެވެ.
"މި ކަހަލަ ކުދި އަދި ބޮޑެތި މަޝްރޫއުތައް މިހާރު ވެސް ބައިވަރު އެބަހުރި އަޅުގަނޑުމެން މާލިއްޔަތު ކޮމެޓީން ބަލާނެ. އަޅުގަނޑުމެން އޮޑިޓަ ޖެނެރަލާ ވެސް މަޝްވަރާ ކޮށްފިން ބައެއް މަޝްރޫއުތަކުގެ ވެލިއު ފޯ މަނީ އޮޑިޓިން ހަދަން،" އޭނާ ވިދާޅުވި އެވެ.
"ކާކު، ކޮން ކަމެއްގައިތޯ މިސްޓޭކް ހެދީ އަޅުގަނޑުމެން ބަލާނީ. ކަންކަން ރަނގަޅުކުރުން މީގައި ބޭނުމަކީ. މުސްތަގުބަލުގައި ވެސް އެންމެން ވެސް ވިސްނަން ޖެހޭނެ އަޅުގަނޑުމެން [ކޮމިޓީން] ސުވާލުކުރާނެ ކަން. އަޅުގަނޑުމެން ބަލާނެކަން."