މި އަހަރުގެ ރޯދަ މަހަށް ހަނދު ސާބިތުކުރުން އަންނަ އާދިއްތަ ދުވަހުގެ ރޭ ބާއްވަން ހަމަޖައްސައިފި އެވެ.
ކަލަންޑަރުގައިވާ ގޮތުން މި އަހަރުގެ ރޯދަ މަހުގެ ފުރަތަމަ ދުވަހަކީ މި މަހުގެ 13 ވަނަ ދުވަހެވެ. އެއީ އަންގާރަ ދުވަހެވެ.
ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ކުރި އިއުލާނެއްގައި ބުނީ އެހެން އަހަރުތަކެކޭ އެއްގޮތަށް މިއަހަރު ވެސް ހަނދު ފެނިގެން އެކަމުގެ މައުލޫމާތުދޭއިރު ގާތްގަނޑަކަށް ހަނދުހުރި އުސްމިނާއި، މިސްރާބު ފަދަ މައުލޫމާތުތައް ދޭން ވާނެ ކަމަށެވެ.
ރޯދަ މަހަށް ހަނދު ސާބިތުކުރުމަށް ހަނދު ދުށް މީހަކު ނުވަތަ ބަޔަކު ހެކިބަސް ދޭންޖެހޭނީ މާލޭގައި ނަމަ މާލޭގެ ކޯޓެއްގެ ގާޒީއެއްގެ ކުރިމަތީގަ އެވެ. އަދި ރަށެއްގައި ނަމަ އެ ރަށެއްގެ މެޖިސްޓްރޭޓުގެ ކުރިމަތީގަ އެވެ. މެޖިސްޓްރޭޓެއް ނެތް ރަށެއްނަމަ އެ ވަގުތަކު ރަށު ކައުންސިލްގެ އިދާރާ ހިންގެވުމާ ހަވާލުވެހުންނެވި އިސް ވެރިއެއްގެ ކުރިމަތީގަ އެވެ.
ރޯދަ މަހުގެ ހަނދުގެ މައްސަލަ ވަކިގޮތަކަށް ނިމެންދެން އަންނަ އާދިއްތަ ދުވަހުގެ ހަވީރު 5:30 އިން ފެށިގެން އެ ޑިޕާޓްމަންޓާއި، ރަށްރަށުގެ މެޖިސްޓްރޭޓް ކޯޓުތަކާއި، ރަށު ކައުންސިލްގެ އިދާރާތަކާއި، އަތޮޅު ކައުންސިލްގެ އިދާރާތައް ހުޅުވާފައި ހުންނާނެ ކަމަށް ވެސް ޑީޖޭއޭ އިން ބުނެ އެވެ.
ހެކިބަސް އަދާކުރުމަށްޓަކައި އައުމާއި ދިއުމުގެ ހަރަދު ދޫކުރާ ގޮތަށް ވެސް ހަމަޖެހިފައިވެ އެވެ.
ރާއްޖޭގައި ހަނދު ސާބިތުކުރުމުގައި އާންމުކޮށް ބަލަނީ އިސްލާމީ ބޮޑެތި ގައުމުތަކުން ހަނދާ މެދު ނިންމާ ގޮތެކެވެ.