މާލޭ ބޮޑުތަކުރުފާނު މަގުގެ އިރުމަތީ ފަރާތުގައި އިމާރާތްކޮށްފައިވާ ކިންގް ސަލްމާން މިސްކިތުގެ ކުރެހުމާ ގުޅޭ ކޮޕީރައިޓްސް މައްސަލައެއް ފެންމަތިވެއްޖެ އެވެ.
ސައޫދީ ރަސްގެފާނުގެ އެހީގައި އިމާރާތްކޮށްފައިވާ މި މިސްކިތުގެ މަސައްކަތް ކުރަން ހަވާލުކޮށްފައި ވަނީ ތުރުކީގެ ޓާމެކްސް ކުންފުންޏާ އެވެ. އެ ކުންފުންޏާ އެކު ކުރީ ސަރުކާރުން އެއްބަސްވުމުގައި ސޮއިކުރީ ފެބްރުއަރީ 28، 2017 ގައެވެ.
ނަމަވެސް ތުރުކީ ކުންފުންޏަށް ހަވާލުކޮށްގެން، ކުރީ ސަރުކާރުން މިސްކިތް އިމާރާތްކޮށްފައި ވަނީ މެލޭޝިއާގެ ކުންފުންޏެއް ކަމަށްވާ އެންއާރްވައި އާކިޓެކްސް އިން ހުށަހެޅި ޑިޒައިނަށް ކަމަށް ބުނެ އެ ކުންފުނިން ވަނީ ސަރުކާރަށް ސިޓީއެއް ފޮނުވައިފަ އެވެ.
މިސްކިތުގެ ކުރެހުމާ ގުޅޭ ޝަކުވާއެއް ލިބިފައިވާކަން ކަށަވަރު ކޮށްދެއްވައި ރައީސް އޮފީހުގެ ތަރުޖަމާން މަބްރޫކް އަޒީޒް "މިހާރު" އަށް ވިދާޅުވީ ސަލްމާން މިސްކިތް ހަދަން ކުރީ ސަރުކާރަށް ހުށަހެޅި ކުރެހުން ކޮޕީކޮށް، އެހެން ކުންފުންޏަކާ ހަވާލުކޮށްގެން އެ މަސައްކަތް ކޮށްފައިވާ ކަމަށް އެ ސިޓީގައި ބުނެފައިވާ ކަމަށެވެ.
"[އެންއާރްވައި އާކިޓެކްސް] އިން ކޮށްފައިވާ ތުހުމަތަކީ ކޮޕީރައިޓާ ގުޅޭ ތުހުމަތެއް،" މަބްރޫކް ވިދާޅުވި އެވެ.
އެންއާރްވައި އާކިޓެކްސްގެ ވެބްސައިޓުގައި ސަލްމާން މިސްކިތުގެ ކުރެހުންތައް އެބަހުއްޓެވެ. މިހާރު މިސްކިތް އަޅާފައިހުރީ އެ ވެބްސައިޓުގައި ހުރި ކުރެހުންތަކާ ވަރަށް ބޮޑަށް ދިމާވާ ގޮތަށެވެ. ބޮޑަށް ފާހަގަވަނީ އެ ކުރެހުމުގައި ހުރި ބައެއް ބައިތައް މިހާރު އަޅާފައި ހުރި މިސްކިތުގައި ނެތްކަމެވެ.
ކިންގް ސަލްމާން މިސްކިތުގައި ހިމެނޭނެ ބައެއް ތަންތަން:
- މަލްޓި ޕާޕަސް ހޯލެއް ހުންނާނެ
- އޮޑިޓޯރިއަމެއް ހުންނާނެ
- ގުރުއާނާ ބެހޭ މަރުކަޒު މިސްކިތަށް ބަދަލުކުރެވޭނެ
- ދުނިޔޭގެ ފެންވަރުގެ ލައިބްރެރީއެއް ހުންނާނެ
- ސެމިނާތަކާއި ކްލާސްރޫމްތައް ހުންނާނެ
ސަލްމާން މިސްކިތުގެ މަސައްކަތް މިދިޔަ އަހަރު ކުރީ ކޮޅު ނިންމައި ސަރުކާރާ ހަވާލު ކުރި ނަމަވެސް އަދިވެސް އެ މިސްކިތެއް ނުހުޅުވަ އެވެ. މި ރޯދަ މަހު ވަގުތީ ގޮތުން ވިޔަސް މިސްކިތް ހުޅުވަން މަސައްކަތްކުރި އެވެ. ނަމަވެސް ފަހުން ބުނެފައިވަނީ ރޯދަ އަށް ވެސް ތަން ހުޅުވެން ނެތް ކަމަށެވެ.