އިނގިރޭސި ރާނީ ކުއީން އެލިޒަބަތުގެ ފިރިކަލުން ޕްރިންސް ފިލިޕް އަވަހާރަވުމާ ގުޅިގެން ރައީސް އިބްރާހިމް މުހައްމަދު ސޯލިހު ތައުޒިޔާ ވިދާޅުވެއްޖެ އެވެ.
ރައީސް މިއަދު ކުރެއްވި ޓުވީޓެއްގައި ވިދާޅުވީ ފިލިޕްއަކީ ރައްޔިތުންނަށް ހިދުމަތްކޮށްދިނުމުގައި ނަމޫނާ ދައްކަވާފައިވާ ބޭފުޅެއް ކަމަށެވެ. އަދި 1972 ވަނަ އަހަރު ޕިލިޕް އާއި ރާނީ ކުއީން އެލިޒަބަތު ރާއްޖެއަށް ކުރެއްވި ދަތުރުފުޅުގެ ހަނދާން އާ ކުރައްވާ ކަމަށް ރައީސް ވިދާޅުވި އެވެ.
"ޝާހީ އާއިލާ އާއި އިނގިރޭސިވިލާތުގެ ރައްޔިތުންނަށް ތައުޒިޔާ ކިޔަން." ރައީސް ވިދާޅުވި އެވެ.
އުމުރުފުޅުން 99 އަހަރުގައި ފިލިޕް އަވަހާރަވެފައި ވަނީ ހޮސްޕިޓަލުގައި ފަރުވާ ދެމުން އަންނަނިކޮށެވެ. ފިލިޕް ދާދި ފަހުން ވަނީ ހިތްޕުޅުގެ އޮޕަރޭޝަނެއް ވެސް ކުރައްވައިފަ އެވެ.
ޕްރިންސަސް އެލިޒަބަތުއާ ފިލިޕް ކައިވެނި ބައްލަވައިގެންނެވީ 1947 ވަނަ އަހަރު އެވެ. އެއީ އެކަމަނާ އަށް ރާނީގެ މަގާމު ލިބިވަޑައިގެންނެވުމުގެ ފަސް އަހަރު ކުރިންނެވެ. ކުއީން އާއި ފިލިޕަށް ވަނީ ހަތަރު ބޭފުޅުން ލިބިވަޑައިގެންފަ އެވެ. ފުރަތަމަ ދަރިކަލުން ޕްރިންސް އޮފް ވޭލްސް، ޕްރިންސް ޗާލްސް އުފަންވެވަޑައިގެންނެވީ 1948 ވަނަ އަހަރު އެވެ.
