މަސައްކަތުގެ މާހައުލުގައި ކުރިމަތިވާ ޖިންސީ ފުރައްސާރައިގެ މައްސަލަތަކާ ދެކޮޅަށް މިރޭ ކުރި ސުލްހަވެރި އިހުތިޖާޖު ރޫޅާލުމުގައި ފުލުހުން ބާރުގެ ބޭނުންކުރި ގޮތުން އާއްމުން ރުޅިގަދަވެއްޖެ އެވެ.
ޒުވާނުންތަކެއް އިސްވެ ފަށާފައިވާ "ރައިޒް އަޕް އެމްވީ" މޫވްމަންޓުން ބޭއްވި އިހުތިޖާޖު ފެށީ ރަސްފަންނު ސަރަހައްދުންނެވެ. އެ ތަނުގައި ތިބެގެން އަޑުގަދަކުރާ ބޭނުންކޮށްގެން ޝުއޫރު ފާޅުކުރުމަށް ފަހު މަޖީދީ މަގު ސަންފްރޮންޓް ފިހާރައާ ހަމައަށް ދިޔަތަނާހެން ފުލުހުން ވަނީ ހުރަސް އަޅަން ފަށައިފަ އެވެ.
"އަޅުގަނޑުމެން އުޅުނީ މަޖީދީ މަގުން ދާން ވެގެން. އެކަމަކު ކުރިއަށް ދާން އުލެނިކޮށް ފުލުހުން ހުރަސް އަޅައިފި. ދެން އެކި ގޮތްގޮތުން ބައިވެރިން ހަޅޭއްލަވަމުން ގޮސް، އައިކެއާ އާ ހިސާބަށް ދިޔައިރު ފުލުހުން އެތާނގައި ސަފު ހަދައި ބަންދުކޮށްލައިފި. ދެން ބައިވެރިން އައީ އަނެއްކާ މަޖީދީ މަގަށް. އެތާނގައި މަގުގައި އިށީދެ ތިއްބައި މެގަ ފޯނު ފުލުހުން ޖަހައިގެންފި،" އިހުތިޖާޖުގެ ބައިވެރިއަކު ކިޔައިދިނެވެ.
"މެގަ ފޯން އަތުލަން ވެގެން މުޒާހަރާގެ ބައިވެރިން އުޅުމުގެ ތެރެއިން އެ މީހުން ޓާގެޓް ކުރީ އޭގެ ތެރެއިން އެއް އަންހެން ކުއްޖަކަށް. ފުލުހުން ބޭނުންވީ އޭނާ ހައްޔަރުކުރަން. އެކަމަކު އެއްވެސް މީހަކު ބޭނުމެއް ނުވި އޭނާ ފުލުހުން ހައްޔަރުކޮށްގެން ގެންދާކަށް. އެހިސާބުން ހަމަނުޖެހުން އުފެދި ޕެޕާ ސްޕޭރޭ ޖަހައި ހެދީ."
އިހުތިޖާޖު ކުރި ޒުވާނުންގެ ގަޔަށް ޕެޕަސްޕްރޭ ޖަހާ ވީޑިއޯއެއް ސޯޝަލް މީޑިއާގައި ވަނީ އާންމުވެފަ އެވެ. އެ ވީޑިއޯގައި ފެންނަ ގޮތުގައި ފުލުހުން ވަނީ ވަރަށް ގަދަ އަށް ޕެޕާ ސްޕްރޭ ޖަހައިފަ އެވެ. އަދި އަނިޔާވެރިކަމާ އެކު، މީހުން ދުރުކުރަމުން ދާތަން އެ ވީޑިއޯގައި ފެނެ އެވެ.
"ނޫސްވެރިންނާ ދިމާ އަށް ވެސް އައުގުރާނަ ގޮވައި ހެދި. ވަރަށް ހަޑި ހުތުރުކޮށް މިރޭ ފުލުހުން ފެނުނީ،" އިހުތިޖާޖުގެ ބައިވެރިޔަކު ބުންޏެވެ. "އަންހެން ކުއްޖެއްގެ ދެ އަތުގައި ބިޑި އަޅުވާފައި އޭނާގެ މޫނަށް ވެސް ސްޕްރޭ ޖެހި."
މިރޭގެ އިހުތިޖާޖު ރޫޅާލައިފައި ވަނީ، ގަދަ ބާރުން، ހާލަތާ ނުބައްދަލު ބޭނުންކޮށްގެން ކަމަށް އިހުތިޖާޖުގެ ބައިވެރިން ދެކެ އެވެ. އަދި އެ އިހުތިޖާޖުގެ ފޮޓޯތައް އާންމުވުމާ އެކު، އާންމުންގެ ވަރަށް ބޮޑެތި ފާޑުކިޔުންތަކެއް ވެސް ފުލުހުންނަށް ވަނީ އަމާޒުވެފަ އެވެ.
މިރޭގެ އިޖުތިޖާޖު ރޫޅާލިގޮތުން، މަޖިލީހުގެ ބައެއް މެމްބަރުން ވެސް ވަނީ ކަންބޮޑުވުން ފާޅުކުރައްވައިފަ އެވެ.
"މި ވަރަށް ޕެޕަސްޕްރޭ ނުޖަހައި މިހާ އަނިޔާވެރި ނުވެ މިކަން ނުކުރެވެނީތަ؟" ވިލިމާލެ ދާއިރާގެ މެމްބަރު އަހުމަދު އުޝާމް ޓްވީޓެއްގައި އެއްސެވި އެވެ.
އާންމުންގެ ތެރެއިން އަލީގެ ނަމުގައި ޓްވީޓުކުރި މީހަކު ބުނީ އެފަދަ ޖަރީމާތައް ހުއްޓުވޭނެ ގޮތެއް އޮންނަންޖެހޭނެ ކަމަށެވެ. މަޑުމައިތިރި ކަމާއެކު ފާޅުކުރާ ޝުއޫރެއް ހުއްޓުވުމަކީ އެއްވެސް ބަޔަކު ކޮށްގެންވާނެ ކަމެއް ނޫން ކަމަށް އޭނާ ދެކެ އެވެ.
މި މައްސަލަ ފުލުހުން ބަލާނެ: ހޯމް މިނިސްޓަރު
ފާޑުކިޔުންތަކާއެކު ފުލުހުން ބުނީ އިހުތިޖާޖުގައި ފުލުހުން ބާރުގެ ބޭނުންކޮށްފައިވާ ގޮތް ހާއްސަ އިސްކަމެއްދީގެން ޕްރޮފެޝަނަލް ސްޓޭންޑާޑްސް ކޮމާންޑުން ބަލަން ފަށައިފައިވާ ކަމަށެވެ. އަދި "މި މައްސަލައިގެ އިތުރު ތަފުސީލު، މައްސަލަ ކުރިއަށް ދާ ވަރަކުން ހިއްސާކުރާނެ ވާހަކަ ދަންނަވަން" ކަމަށް ފުލުހުން ކުރި ޓްވީޓެއްގައި ވެ އެވެ.
މި މައްސަލާގައި ހޯމް މިނިސްޓަރު އިމްރާން އަބްދުﷲ ވެސް ވަނީ ކަންބޮޑުވުން ފާޅުކުރައްވައިފަ އެވެ. އޭނާ ކުރެއްވި ޓްވީޓެއްގައި ވިދާޅުވި ގޮތުގައި ފުލުހުން ބާރުގެ ބޭނުން ކުރަން ގަނޫނު ހުއްދަކުރާ ހާލަތްތަކުގައި ވެސް ބާރުގެ ބޭނުން ކުރަން ވާނީ އެކަމަށް ކަނޑައެޅިފައިވާ މިންގަނޑުގެ ތެރެއިންނެވެ.
"މިރޭ ހިނގައިދިޔަ ހާދިސާގައި ނޫސް އޮފް ފޯސްގެ މިންގަނޑުތަކާ ހިލާފަށް އެއްވެސް ކަމެއް ހިންގާފައި ވޭތޯ ބަލާނަން،" މިނިސްޓަރު ވިދާޅުވި އެވެ.
އިހުތިޖާޖުގެ ބައެއް ބައިވެރިން ބުނި ގޮތުގައި، އަންހެނަކު ހައްޔަރު ކުރަން ވެގެން މިރޭ ފިރިހެން ފުލުހުންތަކެއް ވަނީ އޭނާގެ ގައިގައި ވެސް އަތްލައިފަ އެވެ. އަދި އެހެން ނުހެދޭނެ ކަމަށް އެ ވަގުތު ވެސް އެތާނގައި ގޮވަމުން ދިޔަ ކަމަށް އެ މީހުން ބުނެ އެވެ.
އިހުތިޖާޖުގެ އެއް ބައިވެރިއަކަށް އަނިޔާވެގެން އޭނާ އަށް އައިޖީއެމްއެޗުގައި މިރޭ ވަނީ ފަރުވާ ވެސް ދީފަ އެވެ.