ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ދިން ހަމަލާގައި ގޮއްވާލި އައިއީޑީ އިން ބުރައިގެން ދިޔަ ރޭޒާ ފުއްތަކުގެ ތެރެއިން އެތިކޮޅެއް ފުއްޕާމެއިން ނަގަން ޖެހުނު ކަމަށާއި އެ ވަދެގެން ދިޔައިރު ހިތާ ހިސާބަށް ނުގޮސް ސަލާމަތްވީ ކަށިގަނޑެއްގައި ޖެހި އެ ފުނޑިގެން ދިއުމުން ކަމަށް އޭޑީކޭ ހޮސްޕިޓަލުން ބުނެފި އެވެ.
އޭޑީކޭން މިހާރު ކުރިއަށް ގެންދާ ޕްރެސް ކޮންފަރެންސެއްގައި، ފަރުވާ ދިން ޓީމުގެ ޑޮކްޓަރުން ބުނީ ބަނޑާއި ގޮހޮރުން ވެސް އެކި ތަންތަން ފޫ އަޅާފައި ހުރި ކަމަށާއި ލިވާގެ ތެރެއަށް ވެސް އެތިކޮޅެއް ވަދެފައި އޮތް ކަމަށެވެ.
ޑޮކްޓަރުން ވިދާޅުވި ގޮތުގައި ފުއްޕާމެއިން ވައި ބޭރުވުން ހުއްޓުވަން ޕެޗް އަޅަން ޖެހުނު ކަމަށެވެ. އަދި ގޮހޮރުން ފޫދިޔަ ތަންތަނުން ވެސް އެއްޗެހި ބޭރުގެ އިންފެކްޝަންގެ ބިރު އޮތް ކަމަށެވެ.
އަނިޔާގެ ތަފްސީލް ދެއްވަމުން ޑޮކްޓަރުން ވިދާޅުވި ގޮތުގައި ދަގަނޑު ރޭޒާ ފުއްތަކުގެ އިތުރުން އެހެން ބައެއް އެއްޗެހި ވެސް ހަށިގަނޑު ތެރެއަށް ވަދެފައިވެ އެވެ.
ޕްރެސް ކޮންފަރެންސްގައި ދެއްކި ތަފްސީލުން އެނގޭ ގޮތުގައި އައިއީޑީ އަމާޒުވެފައި ވަނީ ނަޝީދުގެ ވާތްފަރާތަށެވެ. އައިއީޑީން އައި ބައެެއް އެތިކޮޅުތައް ހަށިގަނޑުގެ އެއް ފަރާތުން ވަދެ އަނެއް ފަރާތުން ފޫގޮސްފައިވާ ކަމަށާއި ބައެއް އެތިކޮޅުތައް، މުހިންމު ލޭ ހޮޅިތަކާ ދިމާލަށް ވެސް ވަދެފައިވާ ކަމަށް ވިދާޅުވި އެވެ.
ހޮސްޕިޓަލުގެ ޗީފް މެޑިކަލް އޮފިސަރު އަބްދުﷲ ނިޔާފް ވިދާޅުވީ ޑޮކްޓަރުން ބޮޑަށް ފަރިތަވެފައި ހުންނަނީ ލޭ ހޮޅިތަކުގައި ހުންނަ ގަނޑު ލޭކޮޅުތައް ނަގަން ކަމަށާއި އޮމާންކޮށް ހުންނަ ރޭޒާ ފުއް ފަދަ އެއްޗެހި ލޭގެ މައި ހޮޅި އަށް ވަނުމުން އެ ނެގުން ވީ އުނދަގޫ ކަމަކަށް ކަމަށެވެ. އެހެންވެ އާންމުކޮށް ޕްރޮސީޖާތައް ހަދާ ގޮތާ ހިލާފަށް، އެހެން ހޮސްޕިޓަލްތަކުގެ ޑޮކްޓަރުންގެ ވެސް އެހީއާ އެކު ވަރަށް އުނދަގުލުން ކަމަށެވެ.
ބޮލަށް އަމާޒުވި އެތިކޮޅުތައް ސިކުނޑިއާ ހަމަޔަށް ނުގޮސް ސަލާމަތްވެފައިވާކަން ވެސް ޑޮކްޓަރުން ފާހަގަކުރެއްވި އެވެ.
މިއަދު ހެނދުނު ނަޝީދު ވަނީ ވެންޓިލޭޓަރުން ނަގާފައި ކަމަށާއި ނޭވާލުމުގައި މިހާރު ދަތިކަމެއް ނެތް ކަމަށް ވެސް ޑޮކްޓަރުން ވިދާޅުވި އެވެ. ލޭގެ ޕްރެޝަރު ހަމަޔަކަށް ގެންދަން ދިން ބޭސް ވެސް މިހާރު ހުއްޓާލާފައިވާ ކަމަށާއި އެކަމަކު އިންފެކްޝަނެއް ހެދިދާނެތީ ވަރަށް ގާތުން ބަލަމުން ދާނެ ކަމަށް ޑޮކްޓަރުން ވިދާޅުވި އެވެ. މިވަރުގެ ބޮޑު އޮޕަރޭޝަންތައް ކުރުމަށް ފަހު އިންފެކްޝަނެއް އުފެދުމުގެ ނުރައްކާ ބޮޑުކަން އެ ބޭފުޅުން ފާހަގަކުރެއްވި އެވެ.
ނިޔާފް ވިދާޅުވި ގޮތުގައި ނަޝީދު އޭޑީކޭ އަށް ގެނައިތާ ދިހަ ވަރަކަށް މިނެޓްގެ ތެރޭގައި ތިއޭޓަރަށް ގެންގޮސް ފަރުވާ ދޭން ފެށުނެވެ. ނިޔާފް ވިދާޅުވީ ޕޭޝަންޓުންގެ މައުލޫމާތު ހާމަކުރުމަކީ އާންމުކޮށް ނުކުރާ ކަމަކަށް ވިޔަސް ނަޝީދުގެ ފަރުވާއާ ބެހޭ ގޮތުން މީޑިއާއާ މައުލޫމާތު ދިނީ އާއިލާގެ އިޒްނަ އާއި އަދި ނަޝީދުގެ ވެސް އިޒްނަ ލިބިގެން އެކަމަށް އެދިވަޑައިގަތުމުން ކަމަށެވެ.