ކުރީގެ ރައީސް މުހައްމަދު ނަޝީދު އަވަހާރަކޮށްލުމަށް މިދިޔަ މަހުގެ ހަ ވަނަ ދުވަހު ދިން ހަމަލާއާ ގުޅޭ މައުލޫމާތު އެއްކުރުމަށް ރައްޔިތުންގެ މަޖިލީހުގެ ސަލާމަތާ ހިދުމަތްތަކާ ބެހޭ ކޮމިޓީ (241 ކޮމިޓީ) އިން ފަށާފައިވާ އިންކުއަރީއަށް އޭޑީކޭގެ ޑޮކްޓަރުން މިއަދު ހާޒިރުކޮށް ސުވާލުކޮށްފި އެވެ.
ކާރުކޮޅަށް އަރައިވަޑައިގަންނަވަނިކޮށް، އައިއީޑީއެއް ގޮއްވާލައިގެން ދިން ހަމަލާއަށް ފަހު ލިބުނު ބޮޑެތި ޒަހަމްތަކާ ގުޅިގެން ނަޝީދަށް ފަރުވާ ދިނީ އޭޑީކޭ ހޮސްޕިޓަލުންނެވެ. ނަޝީދުގެ ފުރާނަ ސަލާމަތްކުރުމަށް 16 ގަޑިއިރު، އެކި ވަރުގެ އޮޕަރޭޝަންތައް ކުރަން ޖެހުނެވެ.
މަޖިލީހުން ބުނި ގޮތުގައި ރައްޔިތުންގެ ނަޝީދަށް ދެމުން ގެންދާ ސަލާމަތާއި ރައްކާތެރިކަން ބްރީޗްވިގޮތް ހޯދުމަށް ކުރިއަށް ގެންދާ ޕާލަމެންޓަރީ އިންކުއައިރީގައި އޭޑީކޭގެ ޑޮކްޓަރުންގެ ޓީމް ހާޒިރުކޮށް މިއަދު ސުވާލުކޮށްފައިވެ އެވެ،
މަޖިލީހުގެ ކޮމިޓީއަށް އޭޑީކޭގެ ޑޮކްޓަރުންގެ ޓީމު ހާޒިރުކުރިކަން މަޖިލީހުން ހާމަކޮށް ޓްވީޓްކުރި ފޮޓޯތަކުން ފެންނަ ގޮތުގައި އޭޑީކޭގެ މެނޭޖިން ޑިރެކްޓަރު އަހުމަދު އަފްއާލް އާއި ޑރ. އަބްދުﷲ ނިޔާފާއި ޑރ. އަހުމަދު ނިޝާން ހާޒިރުކުރި އެވެ.
އޭޑީކޭގެ ޑޮކްޓަރުންގެ ޓީމު ހާޒިރުކޮށް ކޮމިޓީން ސުވާލުކުރިއިރު މިއަދު ހެނދުނު ވަނީ ހުޅުދޫ ދާއިރާގެ މެމްބަރު އިލްޔާސް ލަބީބު ކޮމިޓީއަށް ހާޒިރުކޮށް ސުވާލުކޮށްފަ އެވެ.
އިލްޔާސް ކޮމިޓީ އަށް ހާޒިރުކޮށް ސުވާލުކުރީ، ނަޝީދު އަވަހަރާކޮށްލަން ދިން ހަމަލާގެ ކުރިން، އެފަދަ އަމަލެއް ހިންގަން ބަޔަކު ރާވާ ކަމުގެ މައުލޫމާތު ލިބިވަޑައިގެން ޑިފެންސް މިނިސްޓަރު މާރިޔާ އަހުމަދު ދީދީ އަށް އެކަން އެންގެވި އެންގެވުމާ ގުޅޭ ގޮތުންނެވެ.
އިލްޔާސް ވަނީ ނަޝީދަށް ދިން ހަމަލައާ ގުޅޭ ގޮތުން ފުލުސް އޮފީހަށް ވެސް ބަޔާނެއް ދެއްވައިފަ އެވެ.
މީގެ ކުރިން އެ އިންކުއަރީއަށް ޑިފެންސް މިނިސްޓަރު މާރިޔާގެ އިތުރުން އެ މިނިސްޓްރީގެ އިސްވެރިންނާއިނަޝީދުގެ ބޮޑީގާޑުން ހާޒިރުކޮށް ވެސް ސުވާލުކުރި އެވެ.
މި އިންކުއަރީގެ މަސައްކަތް މި މަހުގެ ނިޔަލަށް ނިންމުމަށް މަސައްކަތް ކުރަމުން އަންނަ ކަމަށް 241 ކޮމިޓީގެ މުގައްރިރު ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް މީގެ ކުރިން ވިދާޅުވެފައިވެ އެވެ. މި އިންކުއަރީގައި ސިފައިންނާއި ފުލުހުންނާއި އެހެން ބައެއް އިދާރާތަކުން ވެސް ގިނަ ބަޔަކާ ސުވާލުކޮށްފައިވެ އެވެ.