އުމުރުގެ ބޮޑު ބއި ހޭދަކުރެއްވީ ރައްޔިތުންނަށް ހައްގުތަކަށް ވަކާލާތު ކުރެއްވުމުގަ އެވެ. އަނިޔާވެރިކަމާ ދެކޮޅަށް އުފުލި އަޑުތަކާއެކު ޖަލުގެ ތޭރިތަކުގައި ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދުގެ ޒުވާން އުމުރު ހޭދަކުރެއްވި އެވެ. އެ މަނިކުފާނު ހައްޔަރުކުރުމާއި ޖަލަށް ލުމަކީ އެ އާއިލާ އަށް އާ ކަމަކަށް ނުވިޔަސް މިދިޔަ ބުރާސްފަތި ދުވަހުގެ ރޭ ގޮއްވާލި ބޮމާއެކު މުޅި އާއިލާ އަށް ލިބުނީ ބޮޑު ޝޮކެކެވެ.
އެ މަނިކުފާނުގެ އެއްބަނޑުއެއްބަފާ ބޭބެ ޑރ. އިބްރާހިމް ނާޝިދު "މިހާރު" އަށް މިއަދު ވިދާޅުވީ ނަޝީދަށް އަމާޒުވާ އެފަދަ އިންޒާރުތަކާއި މީހުން ދައްކާ ވާހަކަތައް އާއިލާއިން ލުއިކޮށް ނުނަގާ ކަމަށެވެ. އެހެންވެ ވަކި ހިސާބަކުން ނަޝީދަށް ވަރަށް ރިސްކު ބޮޑު ކަމަށް އާއިލާ އަށް ގަބޫލު ކުރެވެން ވެސް ފެށި ކަމަށް އޭނާ ވިދާޅުވި އެވެ.
"މީހުން ދައްކާ އެކަހަލަ ވާހަކަތައް އަޅުގަނޑުމެން ލައިޓްކޮށެއް ނުނަގަން. އަނެއްހެން ބަލަންޏާ ވަރަށް ކުރީއްސުރެ ވެސް ލާދީނީ، މި ކަހަލަ އެއްޗެހި [ނަޝީދަށް] ގޮވަމުން [ދިޔައީ]. އިދިކޮޅަށް، އަންޑަމައިންކުރާ ކަހަލަ ވާހަކަ،" ޑރ. ނާޝިދު ވިދާޅުވި އެވެ.
"ސިޔާސީ ކަންތައްތަކުގައި އަޅުގަނޑުގެ ވާހަކައަކީ އޯކޭއޭ، އޭގައި އަޅުގަނޑުމެންގެ މައްސަލައެއް ނެތޭ. އެއީ ހަމަ ދެ ފަރާތުން ވެސް ސިޔާސީ މައްސަލަ. އެކަމަކު ލައިފް ތްރެޓިނިން، ތްރެޓުތައް، އެކަހަލަ އެއްޗެހި އަޅުގަނޑުމެން ވަރަށް ސީރިއަސްކޮށް ނަގަން."
އޭނާ ވިދާޅުވީ އެގޮތަށް ދޭ އިންޒާރުތައް ބައެއް ފަހަރު ވަރަށް ސީރިއަސްވެ އެވެ.
"ވަރަށް ވަރަށް ބޮޑު ޝޮކެއް މިފަހަރު ވެސް އަސްލު [މި ލިބުނީ]. އެކަމަކު މި ފަހަރު މިއީ ހަމަ ނަސީބު. އިންޓާނަލް އޯގަންއަކަށް ގެއްލުންވާ ގޮތަކަށް ނަސީބަކުން ހަމަލައެއް ނުދިޔަ. ޑޮކްޓަރުންގެ ޓީމް ވެސް ރަނގަޅުކަމުން، 16 ގަޑިއިރު އެ ބޭފުޅުން މަސައްކަތްކުރި [ހަށިގަނޑަށް ދިޔަ] އެ އެއްޗެހިތައް ނަގަން. ސައިކަލުގެ ބައެއް ވެސް ހަށިގަނޑުގެ ތެރޭގައި އޮތް،" ޑރ. ނާޝިދު ވިދާޅުވި އެވެ.
ނަޝީދު މިހާރު ދިރިއުޅުއްވާ އެ މަނިކުފާނުގެ ގެކޮޅު، ގ. ކެނެރީގެއިން އެ ރޭ 8:27 ހާއިރު ނުކުމެވަޑައިގަތީ ކުރުނބާ ރިސޯޓަށް ވަޑައިގަތުމަށެވެ. ނަމަވެސް ނީލޯފަރު ހިނގުމުން، މަޖީދީމަގު ކަންމަތީގައި ޕާކްކުކޮށްފައި އޮތް އެ މަނިކުފާނުގެ ކާރުކޮޅާ ހަމަވިތަނުން އެއްޗެއް ގޮއްވާލި އެވެ.
އެއީ މީގެ 14 އަހަރުކުރިން ސަލްޓަން ޕާކުގައި ގޮއްވާލި ބޮމަށްވުރެ ވެސް އެތައް ދަރަޖަ ބާރުގަދަ އައިއީޑީ އެކެވެ. އެ ނުރައްކާތެރި ހަމަލާއިން ސަލާމަތްވެވަޑައިގެން އެ މަނިކުފާނު މިހާރު ގެންދަވަނީ އޭޑީކޭ ހޮސްޕިޓަލުގެ އައިސީޔޫގައި ފަރުވާ ހޯއްދަވަމުންނެވެ.
"މިއަދު އަޅުގަނޑުމެންނަށް ތަންކޮޅެއް ފަސޭހަ އައުޓް އޮފް ޑޭންޖާ ވީމަ. މިއަދު ލައިފް ސަޕޯޓު ނަގާފައި އަންނިއަށް އަމިއްލައަށް ރިކަވެވޭ. އަންނިއަކީ އެހެން ބައްޔެއް ހުންނަ މީހެއް ނޫން. އިންޖަރީސް އިން ރަނގަޅުވުން ދެން އޮންނާނީ،" ޑރ. ނާޝިދު ވިދާޅުވި އެވެ.
ޑޮކްޓަރުން އުއްމީދުކުރި ވަރަށް ވުރެ ވެސް އަވަހަށް ނަޝީދު ރަނގަޅުވަމުން އަންނަ ކަމަށް އާއިލާއިން ބުނެ އެވެ. ނާޝިދު ވިދާޅުވީ އެ ރިކަވަރީގެ ބަޔަކީ ފިޓްނަސް ކަމަށެވެ. މިއަދު ހެނދުނު ބައްދަލުވެގެން ވެސް އެ ކަމުން ރަނގަޅުވާނެ ކަމަށް ނަޝީދު ވިދާޅުވި ކަން ނާޝިދު ފާހަގަކުރެއްވި އެވެ.
"އަންނި އަކީ ވަރަށް ފައިޓްކުރާ މީހެއް. މިއަދު ބުނި ތިމަންނަ ރަނގަޅުވާނަމޭ،" ޑރ. ނާޝިދު ވިދާޅުވި އެވެ.
ހައްގުތަކަށް މަސައްކަތްކުރުން އެއީ ނަޝީދުގެ މަސައްކަތް
ޑރ. ނާޝިދު ވެސް ވިދާޅުވީ ރައްޔިތުންނަށް ހައްގު ހޯދައިދިނުމުގައި ނަޝީދުގެ މުޅި އުމުރު ހޭދަކުރައްވަމުން ގެންދަވާއިރު، އޭނާއަށް ފެނިވަޑައިގަންނަވަނީ އެ އިންޒާރުތައް ނުވަތަ ލިބިދާނެ ގެއްލުންތައް މައްޗަށް ދާތަނެވެ. މީގެ ކުރިން ސަންގު ނޫސް ނެރުނުއިރު ވެސް ބިރާއި އިންޒާރު އަންނަ ކަމަށާއި ފަހުން އަންނަން ފެށީ އެއަށްވުރެ ވަރުގަދަ އިންޒާރުތައް ކަން އޭނާ ފާހަގަކުރެއްވި އެވެ.
"...ފަހުން އަންނަން ފެށީ އެހެން ކަހަލަ [އިންޒާރުތަކެއް]. [ވަޒީފާގެ ގޮތުން] މައްޗަށް ދިޔަ ވަރަކަށް [ނުރައްކާ] ބޮޑު ވެސް ވާނެ. އެއީ އަބަދު ވެސް އޮންނަ ތްރެޓެއް. އެހެން ވިޔަސް އަންނިގެ ބިލީފެއް ބަދަލެއް ނުވާނެ ހަމަ ގައިމު ވެސް،" ޑރ. ނާޝިދު ވިދާޅުވި އެވެ.
ނަމަވެސް ވައްކަމުގެ ވާހަކަ އާއި ހައްގުތަކަށް މަސައްކަތްކުރުމަކީ ނަޝީދުގެ މަސައްކަތްޕުޅަށް ވާތީ އެފަދަ ކިތަންމެ އިންޒާރެއް ލިބިވަޑައިގަތަސް އެކަން އެ މަނިކުފާނު ދޫކޮށްނުލައްވާނެ ކަމަށް ނާޝިދު ވެސް ވިދާޅުވި އެވެ.
ތަހުގީގަށް ހުރަސްއެޅިދާނެތީ، ނަޝީދަށް އަމާޒުކޮށް މިފަދަ ހަމަލާއެއް ދިން ކަމަށް އާއިލާއިން ގަބޫލުކުރާ ސަބަބުތަކާ ގުޅޭގޮތުން ނާޝިދު އެއްވެސް ވާހަކައެއް ނުދައްކަވަ އެވެ.
ނާޝިދާއި ނަޝީދު ރޭގަނޑު އާންމުކޮށް ގެއިން ބޭރަށް ނުކުމެވަޑައިގަންނަވަނީ ދެ ބޭފުޅުން އެކުގައި ނަމަވެސް އެ ހާދިސާ ހިނގި ވަގުތު ނާޝިދު ހުންނެވީ އެހެން ތަނެއްގައި ޔޯގާ ހެއްދެވުމަށް ފޯން އޮފްކޮށްލައްވައިގެންނެވެ. މި ހާދިސާގެ މައުލޫމާތު އެނގިވަޑައިގަތުމާ އެކު ނާޝިދު ވެސް، އައި އާއިލާގެ ހުރިހާ ބޭފުޅުން ވެސް ވަޑައިގަތީ ހޮސްޕިޓަލަށެވެ.
"އަންނިގެ ފަރާތުން މަންމައަށް ވަރަށް ގިނަ ކަންތައްތައް ދިމާވެއްޖެ. މަންމަ އިއްޔެ ވެސް ބުނި އެކަމަކު މި ވަރުގެ ކަމެއް ދުވަހަކު ވެސް އަދި ދިމައެއް ނުވޭއޭ. އެކަމަކު މަންމަ އަބަދު ވެސް ހިތްވަރު ގަދަވާނެ."