ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން އައިއީޑީ ގޮއްވާލީ ނަޝީދަށް ހަމަލާއެއް ދޭން ބަޔަކު ރާވަމުންދާ ކަމުގެ މައުލޫމާތު ލިބުނު ކަމަށް ބުނާ ބަޔަކު އެކަން އެމްއެންޑީއެފަށް އަންގާފައި ވަނިކޮށް ކަމަށާއި އެ މައުލޫމާތާ ގުޅޭ ގޮތުން އެކަށީގެން ގޮތަށް އަމަލުކޮށްފައި ނުވާ މައްސަލަ ބަލަމުން އަންނަކަން "މިހާރު" އަށް އެނގިއްޖެ އެވެ.
އެނގިފައިވާ ގޮތުގައި މި މައުލޫމާތު، ނަޝީދުގެ ސަލާމަތީ ކަންކަން ބަލަހައްޓާ އެމްއެންޑީއެފަށް ދިނީ އާންމުންގެ މީހަކު އެމްޑީޕީގެ ޕާލިމެންޓްރީ ގްރޫޕްގެ މެންބަރަކަށް އެ މައުލޫމާތު ދިނުމުން ޑިފެންސް މިނިސްޓަރު މާރިޔާ އަހްމަދު ދީދީ މެދުވެރިކޮށެވެ. އަދި މި މައުލޫމާތު ސީދާ ނަޝީދަށް ވެސް ހިއްސާކުރިކަން ވަނީ އެނގިފަ އެވެ.
މިކަމާ ބެހޭ ގޮތުން އެންއެންޑީއެފްގެ މީޑިއާ އަށް ގުޅުމުން ބުނީ އެކަމާ ބެހޭ ގޮތުން ކުރީގެ ޕްރެސް ކޮންފަރެންސްގައި ވާހަކަ ދައްކާފައި ވާނެ ކަމަށާއި ކޮމެންޓަކީ އެއީ ކަމަށެވެ.
ނަޝީދަށް ދިން ހަމަލާ އަށް ފަހު އެމްއެންޑީއެފުން ބޭއްވި ޕްރެސް ކޮންފަރެންސްގައި މި ހަމަލާއާ ބެހޭ އިންޓެލިޖެންސް މައުލޫމާތު ލިބިފައި ވޭތީ ނޫސްވެރިން ކުރި ސުވާލާ ގުޅިގެން ސީދާ ޖަވާބެއް ނުދެއްވައި، މޭޖަ ޖެނެރަލް އަބްދުﷲ ޝަމާލް ވަނީ ސަލާމަތީ ކަންކަމާ ގުޅޭ ގޮތުން އެމްއެންޑީއެފަށް އަބަދުވެސް މައުލޫމާތު ލިބެމުން އަންނަ ކަމަށާއި އެ ކަންކަމާ ގުޅިގެން އަޅަންޖެހޭ ފިޔަވަޅުތައް ވެސް އަޅާ ކަމަށް ވިދާޅުވެފަ އެވެ. ނަމަވެސް މިފަދަ މައުލޫމާތެއް ލިބިފައި ނެތް ކަމަށް ފުލުހުން ބުނެފައި ވާތީ ގާނޫނީ ގޮތުން މިކަމުގައި ބަޔަކު އިހުމާލުވެފައިވާ ކަމަށް ވަނީ ބެލެވިފަ އެވެ. އެއީ ޓެރެރިޒަމް މަނާކުރުމުގެ ގާނޫނުގައި، ޓެރަރިޒަމްގެ އަމަލެއް ހިންގަން އުޅޭކަމުގެ އެއްވެސް މައުލޫމާތެއް އެއްވެސް ފަރާތަކަށް ލިބިއްޖެ ނަމަ އެކަން ފުލުހުންނަށް އަންގަން ޖެހޭނެ ކަމަށް ބަޔާންކޮށްފައި ވާތީ އެވެ.
ޓެރަރިޒަމް މަނާކުރުުގެ ގާނޫނުގައި ބުނާ ގޮތަށް ޓެރަރިޒަމްގެ އަމަލަކާ ގުޅޭ އިންޓެލިޖެންސް މައުލޫމާތު ދޭންވާ ފަރާތަކަށް ނުދީ އޮއްވައި އެފަދަ ކަމެއް ހިނގައި މީހަކު މަރުވެއްޖެ ނަމަ އިހުމާލުވި ފަރާތެއް 5-7 އަހަރަށް ޖަލަށް ލެވޭނެ އެވެ. އަދި މީހެއްގެ ހަށިގަނޑަށް ބޮޑު ގެއްލުމެއް ލިބިއްޖެ ނަމަ 3-5 އަހަރަށް ޖަލަށް ލެވޭނެ އެވެ. މީގެ އިތުރުން މުދަލަށް ލިބޭ ގެއްލުމަށް ބަލައި 100،000ރ. އާއި 500،000ރ. އާ ދެމެދުން ޖޫރިމަނާކުރުމާއި އެހެން ހާލަތްތަކުގައި ގިނަވެގެން ހަ މަހަށް ޖަލަށް ލުމަކީ ވެސް ކަނޑައަޅާފައިވާ އަދަބުތަކެވެ.
ސިފައިންނަށް ލިބެމުންދާ މައުލޫމާތަށް ބަލައި ފިޔަވަޅު އަޅާ ކަމަށް ޝަމާލް ވިދާޅުވި ނަމަވެސް، ހަމަލާއެއްގެ މައުލޫމާތު ލިބިފައި ވަނިކޮށް އަޅަންޖެހޭ ފިޔަވަޅު އަޅާފައިވާކަމާ މެދު ސުވާލު އުފެދޭ ކިތަންމެ ކަމެއް ހަމަލާދިން ވަގުތުގެ ސީސީޓީވީ ފުޓޭޖުން ފެނެ އެވެ. ނަޝީދު ގެކޮޅުން ނުކުމެވަޑައިގެން އިރު ވެސް އެ ހަނި މަގު އޮތީ ވެހިކަލްތަކާއި މީހުން ވަދެ ތޮއްޖެހިފަ އެވެ. ނަޝީދުގެ ގައިކޮޅުގައި ޖެހޭ ހިސާބުން، ކުރިމަތިންނާއި ފުރަގަހުން މީހުން ހިނގަ އެވެ. ދުއްވާފައި ދިޔަ ސައިކަލްތައް ވެސް ނަޝީދުގެ ގައިކޮޅުގައި ޖެހޭ ހިސާބުން ދެ އެވެ.
ސަލާމަތީ ސަބަބުތަކަށްޓަކައި، ނަޝީދުގެ ގެކޮޅު ހުންނަ ނީލޯފަރު މަގުގައި ޕާކްނުކުރެވޭ ގޮތް ހަދައިދޭން އެމްއެންޑީއެފުން އެދުމުން ޕާކިން ޒޯނެއް ހަދަން ބިން ހޯދަން ގޮތުން މާލޭ ސިޓީ ކައުންސިލުން މާޗް 23 ގައި ހައުސިން މިނިސްޓްރީ އަށް ފޮނުވި ސިޓީއެއް މީޑިއާގައި ލީކުކޮށްލާފައި ވާއިރު އެއީ އެމްއެންޑީއެފުން ފިޔަވަޅުތައް އަޅަމުންދާ ކަމުގެ ހެއްކެއް ކަމަށް ސިފައިންގެ ޗީފް ޝަމާލް ވަނީ ކުރިން ވިދާޅުވެފަ އެވެ. އަދި ނަޝީދުގެ ބޮޑީގާޑުންގެ މަސައްކަތަށް ވަނީ ވަރަށް ބޮޑަށް ތައުރީފް ކުރައްވައިފަ އެވެ.
އެނގިފައިވާ ގޮތުގައި، އެމްއެންޑީއެފަށް ލިބުނު މައުލޫމާތަށް ބަލައި ނަޝީދުގެ ރައްކަލަށްޓަކައި އެކަށީގެންވާ ފިޔަވަޅު ނާޅައި އޮތުމާއި އެ މައުލޫމާތު ފުލުހުންނާއި ސަރުކާރު އެހެން އެއްވެސް އިދާރާއަކާ ހިއްސާ ނުކޮށް އޮތް މައްސަލަ ނެޝަނަލް ސެކިއުރިޓީ ކައުންސިލަށް ވަނީ ގެންގޮސްފަ އެވެ. ހަމަލާއާ ބެހޭ ގޮތުން ފުލުހުން ބޭއްވި ފުރަތަމަ ޕްރެސް ކޮންފަރެންސްގައި ކޮމިޝަނަރު މުހައްމަދު ހަމީދު ވެސް ވަނީ ހަމަލާއެއް ދޭން އުޅޭ ކަމުގެ އިންޓެލިޖެންސް އެއްވެސް މައުލޫމާތެއް ފުލުހުންނަށް ލިބިފައި ނުވާ ކަމަށް ވިދާޅުވެފަ އެވެ.
ރައީސް އިބްރާހިމް މުހައްމަދު ސޯލިހް މިހާރު ވަނީ ނަޝީދަށް ދިން ހަމަލާއާ ގުޅިގެން އިންޓެލިޖެންސް އޮޑިޓެއް ހަދަން އަންގަވައިފަ އެވެ. ރައީސް ވިދާޅުވި ގޮތުގައި އިންޓެލިޖެންސް މިއަށް ވުރެ ވަރުގަދަކޮށް މިއަށް ވުރެ ރަނގަޅަށް އޮންނަން ޖެހެ އެވެ.
