ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ދިން ޓެރަރިސްޓް ހަމަލާގައި އެ މަނިކުފާނަށް ލިބުނު ޒަހަމްތަކުގެ ފޮޓޯތަކެއް ފުރަތަމަ ފަހަރަށް އާއިލާ އިން މިއަދު އާއްމުކޮށްފި އެވެ.
ނަޝީދުގެ އިޒްނަފު ޅާއެކު ޓްވިޓާގައި އެ ފޮޓޯތައް އާއްމުކުރެއްވީ، އެ މަނިކުފާނުގެ އެއްބަނޑު އެއްބަފާ ބޭބެ ޑރ. އިބްރާހިމް ނާޝިދެވެ.
ނަޝީދުގެ އާއިލީ ގެކޮޅު، ގ. ކެނެރީގެއިން ނުކުމެވަޑައިގެން ކާރުކޮޅަށް އަރައިވަޑައިގަންނަވަނިކޮށް ދިން ހަމަލާގައި އެ މަނިކުފާނަށް ސީރިއަސް ޒަހަމްތަކެއް ލިބި އޭޑީކޭ ހޮސްޕިޓަލުގައި ވަނީ 16 ގަޑިއިރު ވަންދެން ބޮޑެތި އޮޕަރޭޝަންތަކެއް ކޮށްފަ އެވެ.
އާންމުކުރި ފޮޓޯތަކުން ފެންނަ ގޮތުގައި ނަޝީދުގެ ބަނޑުފުޅު ވަނީ މެޔާ ހަމަޔަށް އެއްކޮށް ފަޅާލައިފަ އެވެ. އޭޑީކޭ ޑޮކްޓަރުން ކުރިން ވިދާޅުވެފައިވާ ގޮތުގައި ހަމަލާ ދޭން ގޮއްވާލި އައިއީޑީގައި ހުރި ރޭޒާ ފުއްތަކާއި އެހެން ބައެއް އެއްޗެހި ހަށިގަނޑަށް ވަދެ ގޮހޮރު ވެސް އޮތީ ފޫގޮސްފަ އެވެ. އަދި ގޮހޮރުން ހަށިގަނޑުތެރެއަށް ލީކުވެފައި ވާތީ ސާފުކޮށް ގޮހޮރު ފަހަން ޖެހުނެވެ.
ނަޝީދުގެ މެޔަށް ލިބުނު ޒަހަމްތަކުގައި މޭކަށިތަކަށް ވެސް ގެއްލުން ވެފައިވާ ކަމަށާއި ހިތާ ދިމާލަށް ވަން ރޭޒާފުކެއް ހިތަށް ނުވަދެ ސަލާމަތްވީ ކަށިގަނޑެއްގައި ޖެހިފައި ކަމަށް ވެސް ޑޮކްޓަރުން ވިދާޅުވެފައިވެ އެވެ. އާންމުކުރި ފޮޓޯތަކުގައި ވެސް މޭގެ ވާތްފަރާތަށް ބޮޑެތި ޒަހަމްތަކެއްވެފައިވާ ވާތީ ފެނެ އެވެ.
ނަޝީދުގެ އަތްފައިގެ އެކި ތަންތަނަށް ވެސް ވަނީ ފުން ޒަހަމްތަކެއް ވެފަ އެވެ. ފޮޓޯތަކުން ފެންނަނީ އެ ތަންތަނުގައި ބޮޑެތި ބޭސްގަނޑުތައް އަޅާފައި ވަނިކޮށެވެ.
ފޮޓޯތަކުން ފެންނަ ގޮތުގައި އެންމެ ބޮޑަށް ޒަހަމްވެފައި ވަނީ ހަށިގަނޑުގެ ވާތްފަޅި އެވެ. އެއީ ގޮއްވާލި އައިއީޑީ އަމާޒުވި ފަޅި އެވެ. ވާތްފަރާތު އަރިކައްޓާއި ބަނޑުގެ އަރިމަތިން ވެސް ހުރީ ބޭސް އަޅައިފަ އެވެ.
ފޮޓޯތައް އާންމުކޮށްފައި މި ވަނީ އޭޑީކޭގައި ދިން ފަރުވާތަކަށް ފަހު ނަޝީދު ޖަރުމަނަށް ގެންގޮސް އެ ގައުމުގައި އިތުރު ފަރުވާ ފެށުމަަށް ފަހުގަ އެވެ.