ނަޝީދުގެ ސެކިއުރިޓީ ބްރީޗްވި ގޮތް ތަހުގީގުކުރަން މަޖިލީހުން ފާސްކޮށްފި

ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އެމްއެންޑީއެފުން ރައްކާތެރިކަން ދެމުން ދަނިކޮށް އެ ރައްކާތެރިކަން ގެއްލުމު ގޮތް ނުވަަތަ ސެކިއުރިޓީ ބްރީޗްވި ގޮޮތް ބަލަން ރައްްޔިތުންގެ މަޖިލީހުން މިއަދު ފާސްކޮށްފި އެވެ.

ނަޝީދުގެ ސެކިއުރިޓީ ބްރީޗްވި ގޮތުގެ އިންކުއަރީއެއް ހިންގަން ފުރަތަމަ ނިންމީ ސަލާމަތީ ހިދުމަތްތަަކުގެ ކޮމިޓީ (241) ކޮމިޓީންނެވެ. އެ ނިންމުން ހިމަނާފައި އޮތީ މިމަހުގެ ހަ ވަނަ ދުވަހު ބޮމުގެ ހަމަލާއެއްދީ ނަޝީދު ޒަހަމްކޮށްްލުމުން ހަމަ އެ ރެއިން ފެށިގެން 241 ކޮމިޓީން ކުރިއަށް ގެންދިޔަ ބައްދަލުވުންތަކަކަށް ފަހު އެކުލަވައިލި ރިޕޯޓްގަ އެވެ. މަޖިލީހުގެ މިއަދުގެ ޖަލްސާގައި އެރި ޕޯޓް ފާސްކުރީ މިއަދުގެ ޖަލްސާގައި ބައިވެރިވެވަޑައިގެންނެވި 43 މެމްބަރުންގެ ތެރެއިން ވޯޓުގައި ބައިވެރިވެވަޑައިގެންނެވި 42 މެމްބަރުންގެ އިއްތިފާގުންނެވެ.

ވޯޓުގައި ބައިވެރިވަޑައިނުގަންނަވަނީ ރިޔާސަތުގައި އިންނެވި މަޖިލީހުގެ ނައިބު ރައީސް އީވާ އަބްދުﷲ އެވެ. މަޖިލީހުގެ ގަވައިދު ބުނާ ގޮތުން ރިޔާސަތުގައި އިންނަވާ ބޭފުޅަކަށް ވޯޓުގައި ބައިވެރިވެވަޑައި ގެންނެވޭނީ ވޯޓެއްގައި ދެފަރާތް ހަމަމަވާ ހާލަތެއްގައި އެކަންޏެވެ.

ނަޝީދުގެ ސެކިއުރިޓީ ބްރީޗްވި ގޮތް ބެލުމުގެ އިތުރުން، ހަތަރުކަމެއް ކުރަން ވެސް މިއަދު ފާސްކުރި ރިޕޯޓްގައި ކަނޑައެޅި އެވެ. އެއް ކަމަކީ ހަރުކަށި ފިކުރާ ގުޅޭ އެންމެހާ ތަހުގީގެއް، އަވަސް ނަތީޖާ ނެރެވޭނެ ގޮތަކަށް ކުރިއަށް ގެންދަން ފުލުހުންނަށް ލަފާ ދިނުމެވެ.

ހަމަލާގެ ތަހުގީގުގެ ހުރިހާ ކަމެއް ކޮމިޓީއާ ހިއްސާކުރަން ފުލުހުންނަށް އަންގަން ވެސް ރިޕޯޓްގައި އެބަ އޮތެވެ. ފުލުހުން އެކަމުގައި ކުރަމުންދާ ތަހުގީގު ކޮމިޓީން ގާތުން ބަލަން ވެސް އެ ނިންމުމުގައި ވެ އެވެ.

ނަޝީދު ދިރިއުޅުއްވާ ކެނެރީގޭގެ ކައިރީގައި އެމަނިކުފާނަށް ދިން ބޮމުގެ ހަމަލާގައި ފުރާނައަށް ނުރައްކާވާ ފަދަ ބޮޑެތި ގެއްލުންތަކެއް ލިބިވަޑައިގަތެވެ. އެ ޒަހަމްތަކަށް ފަރުވާ ކުރުމަށް އޭޑީކޭގައި ގިނަ ސާޖަރީތަކެއް ހެދި އެވެ. އޭޑީކޭ އިން ފަރުވާ ހޯއްދެވުމަށް ފަހު އިތުރު ފަރުވާ ހޯއްދެވުމަށް އެ މަނިކުފާނު ވަޑައިގެން މިހާރު ހުންނެވީ ޖަރުމަނުވިލާތުގަ އެވެ.