ނަޝީދަށް ދިން ހަމަލާގެ ބޮޑެއް ހަރުކަށި ފިކުރުގެ މީހުން ތެރޭ

ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން މިދިޔަ މަހުގެ ހަ ވަނަ ދުވަހުގެ ރޭ ދިން ހަމަލާއަށް ފަހު، ހަރުކަށި ފިކުރުގެ މީހުން ހޯދައި ހައްޔަރުކުރަން ފުލުހުން ހިންގި އޮޕަރޭޝަންގައި ފުލުހުންގެ ބެލުމުގެ ދަށަށް ގެންގޮސް ތިބި މީހުންގެ ތެރޭގައި ނަޝީދަށް ދިން ހަމަލާއާ ސީދާ ގުޅުން ހުރި ކަމަށް ތުހުމަތުކުރެވޭ މީހަކު ހިމެނޭ ކަމަށް ފުލުހުން ބުނެފި އެވެ.

ނަޝީދަށް ދިން ހަމަލާއަށް މިއަދު މަސް ދުވަސްވުމާ ދިމާކޮށް ފުލުހުން ބޭއްވި ޕްރެސްކޮންފަރެންސްގައި ޗީފް ސުޕްރިންޓެންޑެންޓް އޮފް ޕޮލިސް މުހައްމަދު ބަޝީރު ވިދާޅުވީ އެ މީހާ އަކީ ހަރުކަށި ފިކުރު ފަތުރާ ކަމުގެ ތުހުމަތުގައި ހައްޔަރުކުރި މީހުންގެ ތެރެއިން މީހެއް ކަމަށެވެ.

"ހަރުކަށި ފިކުރާއި ޓެރަރިޒަމްގެ ހަރަކާތްތަކަށް ވާގިވެރިވާ ފަރާތްތައް ހޯދުމަށް ހިންގި ހާއްސަ އޮޕަރޭޝަންގައި އަޅުގަނޑުމެންނަށް ހައްޔަރުކުރެވުނު ފަރާތްތަކުގެ ތެރޭގައި، ރައީސް ނަޝީދުގެ ބޮމުގެ ހަމަލާއާ ގުޅޭ އެއް ފަރާތެއް ހިމެނި އަޅުގަނޑުމެން އެ މައްސަލަ އަޅުގަނޑުމެން މިހާރު މި ތަހުގީގުތަކުގެ ތެރެއިން ކުރަމުންދާ ވާހަކަ ދަންނަވާލަން،" އެއީ ހަމަލާއާ ސީދާ ގޮތުން ގުޅުން ހުރި ކަމަށް ތުހުމަތުކުރެވޭ މީހެއްކަން ހާމަކުރެއްވުން ފިޔަވައި އިތުރު ތަފްސީލެއް ނުދެއްވައި ބަޝީރު ވިދާޅުވި އެވެ.

ނަމަވެސް "މިހާރު" އަށް އެނގިފައިވާ ގޮތުގައި އެ މީހަކީ ހަމަލާގައި ވަރަށް އިސް ދައުރެއް އަދާކުރި ކަމަށް ތުހުމަތުކުރެވޭ މީހެކެވެ. ނަޝީދަށް ދިން ހަމަލާއާ ސީދާ ގުޅުން ހުރި ކަމަށް ތުހުމަތު ކުރެވިގެން މީގެ ކުރިް ހަތަރު މީހަކު ހައްޔަރުކޮށްފައި ވާއިރު، ހަރުކަށި ފިކުރުގެ އޮޕަރޭޝަނުން ހައްޔަރުކުރި މީހާއާ އެކު މިހާރު ވަނީ ހަމަލާގެ ތުހުމަތު ފަސް މީހަކަށް ކޮށްފަ އެވެ.

ފުލުހުން ކުރިން ވެސް ބުނަމުން އައި ގޮތަށް މިއަދުވެސް ބުނީ ހަރުކަށި ފިކުރުގެ މީހުން ހައްޔަރުކޮށް ހިންގަމުންދާ ތަހުގީގުގައި، ހަމަލާއާ ގުޅުން ހުރި މީހުން ތިބިތޯ ބަލަމުންދާނެ ކަމަށެވެ. މިއަދުވެސް ބުނީ ތަހުގީގަށް ފަހު އެ މައުލޫމާތު ހާމަކުރާނެ ކަމަށެވެ.

ހަމަލާގެ ތުހުމަތަށް މިހާތަނަށް ހައްޔަރުކޮށްފައިވާ ހަތަރު މީހުން: މަތީގައި (ކ-ވ) އަދުހަމް އަހްމަދު އާއި މުޖާޒް އަހްމަދު އަދި ތިރީގައި (ކ-ވ) އަހްމަދު ފާތިހު އާއި ތަހްމީން އަހްމަދު

ހަމަލާއާ ގުޅިގެން ހައްޔަރުކުރި މީހުންގެ ތެރެއިން ފުލުހުން މިހާތަނަށް މައުލޫމާތު ހާމަކޮށްފައިވާ މީހުންނަކީ ވ. ތިނަދޫ، ހިޔާ، އަދުހަމް އަހުމަދު ރަޝީދާއި މއ. ފޭރުގޭ މުޖާޒް އަހުމަދާއި ގއ. ކޮނޑޭ، ފޮޅޭމާ ތަހުމީން އަހުމަދު އަދި ލ. ގަން ދުންފިނިއުފާ އަހްމަދު ފާތިހު އެވެ.

ހަމަލާގެ ތުހުމަތަށް ހައްޔަރުކޮށްފައިވާ މީހުންނާ ގުޅޭ ގޮތުން ލިބެމުންދާ ހެއްކާއި ތަހުގީގާ ގުޅޭ ތަފްސީލް އެއްވެސް މައުލޫމާތެއް މީޑިއާގައި ހާމަ ނުކުރަން ފުލުހުން ވަނީ ނިންމާފައި ވާތީ މިއަދުގެ ޕްރެސްގައި ވެސް ދީފައިވަނީ ވަރަށް އާންމު މައުލޫމާތެވެ. ފުލުހުން ބުނި ގޮތުގައި މިގޮތަށް އަމަލުކުރަން ނިންމާފައި ތަހުގީގުގައި އަދިވެސް ބަލަންޖެހޭ މުހިންމު ކަންތައްތަކެއް ހުރުމުން އެ ކަންކަމަށް ހުރަސްއެޅިދާނެ ކަމަށް ބަލައި ތަހުގީގަށް ކަނޑައަޅާފައިވާ ސްޓްރެޓެޖީގެ ދަށުންނެވެ.

ފުލުހުން މިއަދު ބުނީ ހައްޔަރުކުރި މީހުންނާ ގުޅުން ހުރި ތަންތަނާއި ތަކެތި ފާސްކޮށް ފޮރެންސިކް މުހިންމު ހެކިތަކެއް ހޯދާފައިވާ ކަމަށެވެ. އިތުރު ތަފްސީލެއް ނުދެ އެވެ.

މި ތަހުގީގުގެ މައިގަނޑު މަގުސަދަކީ ހަމަލާގައި އަމަލީ ގޮތުން ބައިވެރިވި މީހުންނާއި ހަމަލާ ރޭވުމުގައި އުޅުނު މީހުންނަށް އެއްވެސް ގޮތަކުން މާލީ އެހީތެރިކަން ބަޔަކު ފޯރުކޮށްދީފައިވާ ނަމަ އެ ބަޔަކު ހޯދުން ކަމަށް ފުލުހުން ވަނީ ބުނެފަ އެވެ. މިއަދުގެ ޕްރެސް ކޮންފަރެންސްގައި ސުޕްރިންޓެންޑެންޓް އޮފް ޕޮލިސް ހަސަން ޝިފާއު ވިދާޅުވީ ހަމަލާ އަށް ބަޔަކު ފަންޑު ކޮށްފައި ވޭތޯ ބެލުމަށް ކުރާ ތަހުގީގުގައި އެމެރިކާގެ ފަންނީ މާހިރެއްގެ އެހީތެރިކަން ހޯދަމުން އަންނަ ކަމަށެވެ. އަދި ހަމަލާއާ ބަޔަކު ފަންޑުކޮށްފައިވާ ނަމަ އެ ބަޔަކު ހޯދޭނެ ކަމުގެ ޔަގީންކަން އެބަ އޮތް ކަމަށް ވިދާޅުވި އެވެ.