ރައްޔިތުން މަޖިލީހުގެ ރައީސް މުހައްމަދު ނަޝީދަށް މިދިޔަ މަހު ދިން ޓެރަރިސްޓް ހަމަލާއާ ގުޅޭ ގޮތުން ރައްޔިތުން މަޖިލީހުން ހިންގާ އިންކުއަރީގައި ސިފައިންގެ 29 މީހަކާ ސުވާލުކުރާނެ ކަމަށާއި އެ މުއައްސަސާއިން އެއްބާރުލުން ދޭނެ ކަމުގެ ޔަގީންކަން ލިބިފައިވާ ކަމަށް ގައުމީ ސަލާމަތާ ބެހޭ ކޮމިޓީ (241 ކޮމިޓީ) ގެ މުގައްރިރު އަދި ހިތަދޫ އުތުރު ދާއިރާގެ މެންބަރު މުހައްމަދު އަސްލަމް މިއަދު ވިދާޅުވެއްޖެ އެވެ.
ނަޝީދަށް ދިން ހަމަލާއާ ގުޅިގެން ވަކިވަކި ސިފައިންނާ ސުވާލުކުރަން މަޖިލީހަށް ހާޒިރުކުރަން އެންގުމުން ޑިފެންސް މިނިސްޓްރީން ވަނީ އެކަމާ ދެކޮޅު ހަދައިފަ އެވެ. އަދި ސިފައިންގެ ފަރާތުން ޖަވާބުދާރީ ވާނީ މުޅި މުއައްސަސާ ކަމަށް އެ މިނިސްޓްރީން ކަމަށް ވަނީ ބުނެފަ އެވެ.
މަޖިލީހުން މިއަދު ބޭއްވި ނޫސްވެރިންގެ ބައްދަލުވުމެއްގައި އަސްލަމް ވަނީ ކޮމިޓީއަށް ސިފައިންގެ 40 މީހަކު ހާޒިރުކުރަން ނިންމާފައިިވާ ކަމަށް ބުނާ ވާހަކަ ދޮގުކުރައްވައިފަ އެވެ.
"ތިޔަ ވިދާޅުވަނީ 40 [ސިފައިން] އަޅުގަނޑަކަށް ވެސް ނޭނގެ. 40 ތޯ؟ ތި ލިސްޓެއް އަޅުގަނޑެއް ނުދެކެން، އެއީ ރަނގަޅު އަދަދެއް ނޫން،" އަސްލަމް ވިދާޅުވި އެވެ.
އަސްލަމް ވިދާޅުވ އިންކުއަރީއަށް އެމްއެންޑީއެފްގެ ފަރާތުން ހާޒިރުކުރަން ނިންމާފައި ވަނީ 29 އޮފިސަރެއް ކަމަށާއި ފުލުހުންގެ ހަތް އޮފިސަރެއް ކަމަށެވެ. އެ އަދަދުތަކަށް ބަދަލުތައް ގެންނަން ޖެހިދާނެ ކަމަށާއި މަތީ ރޭންކުތަކުގެ އޮފިސަރުންގެ ފަރާތުން ބޭނުންވާ ޖަވާބުތައް ލިބެމުންދާ ވަރަކަށް އިތުރު ފަރާތްތަކާ ސުވާލު ނުކުރަން ނިންމުން އެކަށީގެންވާ ކަމަށް ވެސް އޭނާ ވިދާޅުވި އެވެ.
"ކުރިން ގަސްތުކޮށްފައި އޮތީ ދަށު ރޭންކުތަކުން ފެށިގެން މަތީ ރޭންކުތަކާ ސުވާލުކުރަން. ނަމަވެސް މިހާރު މި ފެށީ މަތީ ރޭންކުތަކުން. ބައެއް މައުލޫމާތުތައް ދަށު ރޭންކުތަކުން ހޯދުމުގެ ކުރީގައި އެ މައުލޫމާތުތައް ލިބިދާނެ،" އަސްލަމް ވިދާޅުވި އެވެ.
އެކަމާ ގުޅިގެން ކުރިން މައްސަލަތަކެއް އުޅުނަސް މިހާރު ފުރިހަމަ އެއްބާރުލުން ލިބޭނެ ކަމުގެ ޔަގީންކަން ސިފައިންގެ އިސް ފަރާތްތަކުން ދެއްވާ ކަމަށް އަސްލަމް ވިދާޅުވި އެވެ.
އިންކުއަރީއަށް މީހުން ހާޒިރު ކުރަނީ ކުށްވެރިންގެ ގޮތުގައި ތަހުގީގަކަށް ނޫން ކަމަށާއި އެ މީހުން ހާޒިރުކުރަނީ އިންކުއަރީއަށް ބޭނުންވާ މައުލޫމާތުތަކާއި ކޮމިޓީއަށް ބޭނުންވާ ސުވާލުތަކަށް ޖަވާބު ހޯދަން ކަމަށް ކަމަށް ވެސް އަސްލަމް ވިދާޅުވި އެވެ.
ކުރިޔަށް އޮތް ތަނުގައި ޑިފެންސް މިނިސްޓަރު މާރިޔާ އަހުމަދު ދީދީ އާއި ހޯމް މިނިސްޓަރު އިމްރާން އަބްދުﷲ ވެސް ކޮމިޓީއަށް ހާޒިރު ކުރާނެ ކަމަށް އަސްލަމް ވިދާޅުވި އެވެ. އަދި އިތުރު ވަޒީރުން ހާޒިރުކުރަން ޖެހޭ ނަަމަ އެކަން ވެސް ކުރައްވާނެ ކަމަށް އޭނާ ވިދާޅުވި އެވެ.
އަސްލަމް މިހެން ވިދާޅުވިއިރު، ވަކިވަކި ސިފައިން މަޖިލީހަށް ހާޒިރު ކުރަން ހުރަސް އެޅި ކަމަށް ބުނެ އެ މައްސަލަ ނަޝީދު ވަނީ މަޖިލީހުގެ ފަރާތުން ޕްރޮސެކިއުޓާ ޖެނަރަލް އޮފީހަށް ފޮނުވައިފަ އެވެ.
