ބޮޑު މާހެފުން މިއަދު ހަވީރު، ހުރިހާ އެންމެނަށް ބައިވެރިވޭނެ

ރޯދަމަހަށް ތައްޔާރުވުމުގެ ގޮތުން، މާލޭގެ ރައްޔިތުންނަށް ހާއްސަކޮށްގެން ބާއްވާ މާހެފުން މިއަދު ފެށުމަށް ތައްޔާރުވެއްޖެ އެވެ.

އިސްލާމިކް މިނިސްޓްރީން އިންތިޒާމުކުރާ މާހެފުން އޮންނާނީ މިއަދު ހަވީރު 4:00 އިން 6:00 އަށް ޖުމްހޫރީ މައިދާނުގަ އެވެ. މާހެފުން ފައްޓަވައި ދެއްވާނީ ރައީސް އަބްދުﷲ ޔާމީންގެ އަނބިކަނބަލުން ފާތުމަތު އިބްރާހިމް އެވެ.

އިސްލާމިކް މިނިސްޓްރީގެ އޮފިޝަލަކު ވިދާޅުވީ މާހެފުމުގައި ކަދުރު، ކާށި، މަސް، ބޮނޑިބަތް އަދި ފެން ފޯރުކޮށްދިނުމަށް ހަމަޖެހިފައިވާ ކަމަށެވެ. އަދި މާލޭގެ ރައްޔިތުންގެ އިތުރުން ކައިރި ރަށް ރަށުން ވެސް މިކަމުގައި ބައިވެރިވެވޭނެ ކަމަށް އޭނާ ވިދާޅުވި އެވެ.

"ކުދި ބޮޑު އެންމެން މިކަމުގައި ބައިވެރިވުމަށް އެދެން. މިއީ ގައުމީ ކަމެއްގެ ގޮތުގައި ދެކިގެން ހުރިހާ އެންމެންގެ ބައިވެރިވުން މުހިންމު،" އޮފިޝަލް ވިދާޅުވި އެވެ.

މާހެފުމަށް ގޭގެއިން ތައްޔާރު ކުރާ ތަކެތި ވެސް ޖުމްހޫރީ މައިދާނަށް ގެނައުމުގެ ފުރުސަތު އޮންނާނެ ކަމަށް އޮފިޝަލް ވިދާޅުވި އެވެ.

އިސްލާމިކް މިނިސްޓްރީން ވަނީ މާހެފުމަށް ޖުމްހޫރީ މައިދާނުގައި މެޓް އަޅައި، އެންމެން އެކުގައި އިށީނދެ ވަގުތު ހޭދަކޮށްލެވޭނެ އިންތިޒާމް ހަމަޖެއްސުމަށް ނިންމައިފަ އެވެ.

ރޯދަ މަހު ދީނީ ތަފާތު ޕްރޮގްރާމްތައް ކުރިއަށް ގެންދިއުމަށް އިސްލާމިކް މިނިސްޓްރީން ވަނީ ހަމަޖައްސައިފަ އެވެ. އަދި ރޯދަ މަހު ސޯޝަލް މީޑިއާގައި ބޭނުންކުރާނެ ހާއްސަ ހޭޝްޓެގެއް ވެސް ތައާރަފްކޮށްފައިވެ އެވެ. ފޮޓޯ އާއި ވީޑިއޯ ހިއްސާ ކުރުމަށް ހާއްސަ ކުރި ހޭޝްޓަގަކީ Roadha37 އެވެ.