މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ) ގެ ސީއީއޯ ކަމުގެ މަގާމަށް ޑރ. އަބްދުލް ހަންނާން ވަހީދު މިއަދު އައްޔަންކުރައްވައިފި އެވެ.
ރާއްޖޭގެ މަތީ ތައުލީމާއި ތަމްރީނުގެ ގާނޫނުގެ ދަށުން އެކުލަވާލައިފައިވާ، މޯލްޑިވްސް ކޮލިފިކޭޝަން އޮތޯރިޓީ އަށް ސީއީއޯ އަކު އައްޔަންކުރެއްވުމުގެ އިތުރުން، ރައީސް އިބްރާހިމް މުހައްމަދު ސޯލިހު ވަނީ އެ އޮތޯރިޓީގެ އެޑްވައިޒަރީ ބޯޑު އުފައްދަވައި އެ ބޯޑަށް ވެސް މެމްބަރުން އައްޔަންކުރައްވައިފަ އެވެ.
ތައުލީމީ ފެންވަރު ކަށަވަރުކުރުމާއި ވަޒަންކުރުމަށް ކުރަންޖެހޭ އެންމެހައި މަސައްކަތްތައްކޮށް، މަތީ ތައުލީމާއި ތަމްރީނުދޭ މަރުކަޒުތަކުން ދޫކުރާ ސަނަދުތަކުގެ ފެންވަރު ބެލުމުގެ މަސައްކަތްތައް ކުރުމަށްޓަކައި "މޯލްޑިވްސް ކޮލިފިކޭޝަންސް އޮތޯރިޓީ" ގެ ނަމުގައި ސަރުކާރުގެ ވަކި އިދާރާއެއް އުފައްދަން މި ގާނޫނުގައި ވަނީ ބުނެފަ އެވެ. އަދި މި ގާނޫނަށް އަމަލުކުރަން ފެށުމާ އެކު، ކުރިން ހިންގަމުން އައި މޯލްޑިވްސް ކޮލިފިކޭޝަންސް އޮތޯރިޓީގެ އެންމެހައި މުވައްޒަފުން، އަލަށް އުފެއްދި އިދާރާ އަށް ބަދަލުކުރަން ވަނީ ނިންމައިފަ އެވެ.
ސީއީއޯ ކަމުގެ މަގާމަށް ހަމަޖެއްސެވި ހަންނާން އަކީ މި ގާނޫނު ތަންފީޒުކުރުމުގެ ކުރިން، މޯލްޑިވްސް ކޮލިފިކޭޝަން އޮތޯރިޓީގެ ސީއީއޯ އަކަށް ވެސް ހަމަ ހުންނެވި ބޭފުޅާ އެވެ. އޭނާ މި މަގާމަށް އަލުން އައްޔަންކުރެއްވީ ސްޓޭޓް މިނިސްޓަރު ފެންވަރުގަ އެވެ.
ހަންނާނަކީ އޮސްޓްރޭލިއާގެ ކުއީންސްލޭންޑް ޔުނިވަސިޓީ އޮފް ޓެކްނޮލޮޖީން ޕީއެޗްޑީ ހާސިލް ކުރައްވާފައިވާ ބޭފުޅެކެވެ. މީގެ އިތުރުން ޓެކްނިކަލް އެންޑް ވޮކޭޝަނަލް އެޑިއުކޭޝަން އެންޑް ޓްރެއިނިން (ޓިވެޓް) ގެ ސީއީއޯގެ މަގާމާއި ތައުލީމީ ދާއިރާގެ އެކިއެކި މަގާމުތައް ވެސް އޭނާ ފުރުއްވާފައިވެ އެވެ.
އެމްކިއުއޭގެ އެޑްވައިޒަރީ ބޯޑަށް އައްޔަން ކުރެއްވި މެމްބަރުން
1. ސީއީއޯ: ޑރ. އަބްދުލް ހަންނާނު ވަހީދު
2. ހަޔަ އެޑިއުކޭޝަންގެ ފަރާތުން އެ މިނިސްޓްރީގެ ސްޓޭޓް މިނިސްޓަރު، ހަދީޖާ އާދަމް
3. މަތީ ތައުލީމާއި ތަމްރީނުގެ ދާއިރާގެ މާހިރު، އަހްމަދު އަލި މަނިކު
4. މަތީ ތައުލީމާއި ތަމްރީނުގެ ދާއިރާގެ މާހިރު، ޑރ. އާއިޝަތު ރީޝާ
5. ދިވެހިރާއްޖޭގެ ގައުމީ ޔުނިވަސިޓީގެ ފަރާތުން އެ ޔުނިވާސިޓީގެ ވައިސް ޗާންސެލާ ޑރ. މުހައްމަދު ޝަރީފް
6. ޓެކްނިކަލް އެންޑް ވޮކޭޝަނަލް ދާއިރާއިން، މޯލްޑިވްސް އިންސްޓިޓުޓް އޮފް ޓެކްނޮލޮޖީގެ ޑިރެކްޓާ އޮފް ޕްރޮގްރާމް، އާދަމް ހަލީމް
7. ރާއްޖޭގައި ހިންގާ މަތީ ތައުލީމު ދޭ އަމިއްލަ ކޮލެޖްތަކުގެ ހިންގުމުގެ ދާއިރާއިން، ވިލާ ކޮލެޖުގެ ޑިރެކްޓަރު، މޫސާ މުހައްމަދު މަނިކު
މަތީ ތައުލީމާއި ތަމްރީނުގެ ގާނޫނަކީ ރާއްޖޭގައި ފެންވަރު ރަނގަޅު މަތީ ތައުލީމާއި ތަމްރީނުދިނުމުގެ ނިޒާމެއް އެކަށައެޅުމާއި ދެމެހެއްޓެނިވި ގޮތެއްގައި މަތީ ތައުލީމާއި ތަމްރީނު ފޯރުކޮށްދިނުމަށް މަރުކަޒުތަކުން ދޭ ޚިދުމަތްތައް ކުރިއެރުވުމާއި އެ ޚިދުމަތް ފޯރުކޮށްދިނުމުގައި އަމަލުކުރާނެ ގޮތުގެ އުސޫލުތަކާއި އަދި މަތީ ތައިލީމާއި ތަމްރީނު ތަރައްގީކޮށް ކުރިއެރުވުމާ ގުޅޭ އެ ނޫން ވެސް އުސޫލުތައް ބަޔާންކުރާ ގާނޫނެކެވެ.
މި ގާނޫނުގައިވާ ގޮތަށް މަތީ ތައުލީމު ދޭ މަރުކަޒުތަކުން އަމަލުކުރަމުންދޭތޯ ބަލައި އެތަންތަން މޮނިޓާކޮށް ފިޔަވަޅު އަޅާނީ ހަޔާ އެޑިއުކޭޝަން މިނިސްޓްރީންނެވެ.
ސަރުކާރުގެ ފަރާތުން ވެލިދޫ ދާއިރާގެ މެމްބަރު މުހައްމަދު އަބްދުﷲ ޝަފީގު މަޖިލީހަށް ހުށަހެޅުއްވި މަތީ ތައުލީމާއި ތަމްރީނުގެ ބިލު ގައުމީ ތަރައްގީ އާއި ތަރިކައިގެ ކޮމިޓީން ދިރާސާކޮށް ނިންމި ގޮތަށް، މަޖިލީހުން ފާސްކުރީ 49 މެމްބަރުންގެ އަގުލަބިއްޔަތުންނެވެ.