ފްލެޓު އަޅާނެ ކަމަށް ބުނެ އެތައް ބައެއްގެ އަތުން މަކަރާއި ހީލަތުން ފައިސާ ނެގިކަމުގެ ތުހުމަތުގައި ހިޔާނާތުގެ ދައުވާ ކޮށްފައިވާ ސީލައިފް ގްލޯބަލް ކުންފުނީގެ މެނޭޖިން ޑިރެކްޓަރު އަހުމަދު މޫސާ (އައްމަޓީ) މިއަދު ކޯޓުން ދޫކޮށްލައިފި އެވެ.
ހުޅުމާލޭގައި 3،000 ހައުސިން ޔުނިޓް އަޅަން ހައުސިން ޑިވޮލޮޕްމެންޓް ކޯޕަރޭޝަން (އެޗްޑީސީ) އިން މާޗު 13، 2014 ގައި ސީލައިފް ގްލޯބަލްއާ ހަވާލުކުރުމުން އެ ޔުނިޓުތައް ވިއްކުމުގެ ނަމުގައި ގިނަ ބައެއްގެ އަތުން ބުކިން ފީ ނެގުމަށް ފަހު އެ ފައިސާ ނުދިން މައްސަލައިގައި އައްމަޓީގެ މައްޗަށް ދައުލަތުން ވަނީ ހިޔާނާތްތެރިވުމުގެ 42 ދައުވާއެއް އުފުލައިފަ އެވެ.
މިދިޔަ މާޗު މަހު އައްމަޓީ ލަންކާ އިން ރާއްޖެ ގެނެސް ބަންދުކުރި ފަހުން އެކި ފަހަރު މަތިން އޭނާގެ ބަންދު ކޯޓުން ވަނީ އިތުރުކޮށްދީފަ އެވެ. އެންމެ ފަހުން ބޭއްވި އަޑުއެހުމުގައި އައްމަޓީގެ ބަންދު އިތުރު ކުރީ ހަތް ދުވަހަށެވެ.
މިއަދު އޮތް އެ މައްސަލައިގެ އަޑުއެހުމުގައި ބަންދު ރިވިއު ކުރުމުގެ ބައިގައި މައްސަލަ ބައްލަވާ ގާޒީ ހަސަން ސައީދު ނިންމެވީ އޭނާ ބަންދުން ދޫކޮށްލާށެވެ. އޭނާ ބަންދުން ދޫކޮށްލީ މާލެއިން ބޭރަށް ނުދިޔުމަށާއި ޝަރީއަތަށް އެއްބާރުލުން ދިނުމަށް ޝަރުތު ކޮށެވެ.
މިއަދުގެ އަޑުއެހުމުގައި ދައުލަތުން ވަނީ އައްމަޓީ ހެއްކަށް ނުފޫޒު ފޯރުވަފާނެ ކަމަށާއި، ފިލައިގެން ހިނގައިދާނެ ކަމަށާއި އޭނާގެ ފަރާތުން މުޖުތަމައުގެ ސަލާމަތަށް ނުރައްކާ ވެދާނެ ކަމަށް ބުނެފަ އެވެ. އެހެންވެ ދައުލަތުން އެދުނީ އޭނާ ޝަރީއަތް ނިމެންދެން ބަންދު ކުރާށެވެ.
ނަމަވެސް އައްމަޓީ ބުނެފައި ވަނީ ޝަރީއަތަށް އެއްބާރުލުން ދޭނެ ކަމަށާއި، ނުފޫޒު ފޯރުވަން ޖެހޭ ހެއްކެއް ނޯންނާނެ ކަމާއި، ފިލައިގެން ވެސް ނުދާނެ ކަމަށެވެ. އައްމަޓީ މީގެ ކުރިން ޝަރީއަތުގައި ބުނެފައި ވަނީ އޭނާ ކުރިން ފިލައިގެން އުޅެފައި ނުވާ ކަމަށާއި އުޅުނީ ލަންކާ އަންހެނަކާ އިނދެގެން އުޅޭތީ އެ ގައުމުގައި ކަމަށެވެ.
މިއަދުގެ އޮންލައިންކޮށް ބޭއްވި އަޑުއެހުމުގައި އައްމަޓީ ވަނީ އޮންލައިންކޮށް ޝަރީއަތް ހިންގުމުގެ ބަދަލުގައި ކްރިމިނަލް ކޯޓުގެ މާލަމުގައި ޝަރީއަތް ހިންގައިދޭން އެދިފަ އެވެ. އެކަމަށް ދައުލަތުން އިއުތިރާޒު ނުކުރުމުން ގާޒީ ވަނީ އެ ފުރުސަތު ދެއްވައިފަ އެވެ. އެހެންވެ، މިއަދު ޝަރީއަތުގެ ބައި ކުރިއަށް ނުގެންދެ އެވެ.
އައްމަޓީގެ މައްޗަށް އުފުލާފައިވާ 42 ދައުވާ ސާބިތުވެއްޖެ ނަމަ އޭނާގެ މައްޗަށް 65 އަހަރުގެ ޖަލު ހުކުމެއް އިއްވޭނެ އެވެ.
ސީލައިފުން ފައިސާ އަނބުރާ ނުދިނުމުގެ ސަބަބުން ގެއްލުންވި މީހުންގެ ތެރެއިން 203 މީހަކު ކޯޓުގައި ދައުވާކުރުމުން ސަރުކާރުން މައްސަލައިގެ ތެރެއަށް ވަދެ، ދައުވާކުރި މީހުންނަށް ބަދަލުދޭން ވަނީ ނިންމައިފަ އެވެ. އެގޮތުން، ފައިސާގެ ބަދަލުގެ އިތުރުން ބޯހިޔާވަހިކަމުގެ މަޝްރޫއަކުން ފްލެޓް ގަތުމަށް އެ މީހުންނަށް ފުރުސަތު ދޭ ގޮތަށް ކޯޓުން ބޭރުގައި މައްސަލަ ވަނީ ނިންމައިފަ އެވެ.