ހުޅުމާލޭ ފޭސް ދޭއްގައި އިމާރާތްކޮށްފައިވާ ހިޔާ ފްލެޓުތަކުގެ ފިނިޝިން މަސައްކަތްތައް ނިންމަން ނުވަ މަސް ދިނުމަށް މާލޭ ސިޓީ ކައުންސިލުން އެދެފި އެވެ.
ހިޔާ މަޝްރޫއުގެ ދަށުން އެޅި ދެ ކޮޓަރީގެ ފްލެޓްތައް ހަވާލުކުރަން ނިންމާފައި ވަނީ ފާހާނާގައި ދޮރުފަތް ހަރުނުކޮށް، ތަށިމުށި ނުޖަހައި، ފަންކާ އާއި ލައިޓުތައް ވެސް ހަރު ނުކޮށެވެ. ފްލެޓުގައި ކުލަ ލާން ޖެހެނީ ވެސް ފްލެޓު ލިބޭ މީހުން އަމިއްލައަށެވެ.
އެޗްޑީސީން ނިންމާފައި ވަނީ އެޕާޓްމެންޓުތަކުގެ އެ މަސައްކަތްތައް ނިންމުމަށް ތިން މަސް ދުވަސް ދިނުމަށެވެ. އެ މުއްދަތުގައި ފްލެޓުތަކުން އެއްވެސް ފީއެއް ނުނަގާނެ ކަމަށް ސަރުކާރުން ވަނީ ބުނެފަ އެވެ.
މިއަދު ކުރެއްވި ޓްވީޓެއްގައި މާލޭގެ މޭޔަރު ޑރ. މުހައްމަދު މުއިއްޒު ވިދާޅުވީ، ފްލެޓުތަކުގެ ފިނިޝިން މަސައްކަތަށް އަމިއްލައަށް ހަރަދު ކުރަން ޖެހުމުގެ ސަބަބުން ތިން މަސް ތެރޭގައި މަސައްކަތް ނިންމޭނީ މަދު ބަޔަކަށް ކަމަށެވެ.
"ހިޔާ ފްލެޓުތަކުގެ ފިނިޝިން މަސައްކަތަށް އަމިއްލައަށް ހަރަދު ކުރަން ޖެހުމުގެ ސަބަބުން ދީފައިވާ ތިން މަސް ދުވަހުގެ ތެރޭގައި ނިންމޭނީ މަދު ބަޔަކަށް،" މުއިއްޒުގެ ޓްވީޓުގައިވެ އެވެ.
ފިނިޝިން މަސައްކަތް ނިންމަށް މަދުވެން ނުވަ މަސް ދިނުމަށް ވަރަށް ގިނަ ބަޔަކު އެދޭ ކަމަށާއި އެހެންވެ މިއަދު އެޗްޑީސީއާއި ރައީސް އޮފީހުގައި އެގޮތަށް އެދިފައިވާނެ ކަމަށް މުއިއްޒު ވިދާޅުވި އެވެ.
ހިޔާ ފްލެޓުތަކުގެ އެގްރީމަންޓުގައި ސޮއިކުރަން ފަށާނީ އަންނަ މަހު 14ގަ އެވެ. އަދި އެއް މަސް ތެރޭގައި ހުރިހާ އެގްރީމަންޓެއްގައި ސޮއިކޮށް ނިންމާލަން ވަނީ ނިންމައިފަ އެވެ.
ފްލެޓުތަކުން މަހު ކުލީގެ ގޮތުގައި 25 އަހަރަށް ބަހާލައިގެން 7،500ރ. އަދި ސާވިސް ފީގެ ގޮތުގައި 1،000ރ. ނަގަން ނިންމާފައިވެ އެވެ. އަދި ޑައުންޕޭމަންޓުގެ ގޮތުގައި އެއްވެސް ފައިސާއެއް ނުނަގަން ވެސް ސަރުކާރުން ނިންމާފައިވެ އެވެ.