އާބާދީގެ 12-17 އަހަރާ ދެމެދުގެ 50 ޕަސެންޓަށްވުރެ ގިނަ ކުދިންނަށް ވެކްސިންގެ ފުރަތަމަ ޑޯޒު

ކޮވިޑު-19 އިން ދިފާއުވުމަށް ރާއްޖޭގެ އާބާދީގެ 12-17 އަހަރާ ދެމެދުގެ 50 ޕަސެންޓަށްވުރެ ގިނަ ކުދިންނަށް ވެކްސިންގެ ފުރަތަމަ ޑޯޒު ދީފި އެވެ.

އެޑިއުކޭޝަން މިނިސްޓްރީން މިއަދު ބުނީ، މިދިޔަ އާދިއްތަ ދުވަހު ފެށި ޕްރޮގްރާމުގެ ދަށުން މިހާތަނަށް 20،239 ކުއްޖަކަށް ފައިޒާ ވެކްސިން ދީފައިވާ ކަމަށެވެ. އެއީ، އެ އުމުރުގެ ކުދިންގެ ތެރެއިން 50 ޕަސެންޓަށްވުރެ އިތުރު އަދަދެކެވެ.

"މިއީ ރާއްޖޭގެ ދަރިވަރުންގެ ރައްކާތެރި ކަމަށް ކުރެވެމުންދާ މަސައްކަތަށް ލިބުނު ބޮޑު ކާމިޔާބީއެއް،" އެޑިއުކޭޝަންގެ ޓްވީޓުގައިވެ އެވެ.

އެ މިނިސްޓްރީން މީގެ ކުރިން ބުނިގޮތުގައި 12-17 އަހަރާ ދެމެދުގެ ގާތްގަނޑަކަށް 40،000 ކުއްޖަކަށް ވެކްސިން ދޭނެ އެވެ.

ސަރުކާރުން ނިންމާފައިވަނީ 12 އަހަރުން މަތީގެ ހުރިހާ ކުދިން ކޮވިޑު ވެކްސިންގެ ދެ ޑޯޒު ފުރިހަމަކުރުމުން ސްކޫލުތަކުގައި އިތުރު ހަރަކާތްތައް އަލުން ފަށާށެވެ. އޭގެ އިތުރުން، ސްކޫލުތަކަށް ވަދެ/ނުކުމެވޭނީ ވެކްސިންގެ ޑޯޒުތައް ފުރިހަމަކޮށްފައިވާ މީހުންނަށް އެކަނި ކަމަށް ނިންމާފައިވާތީ، ސްކޫލުގައި މަސައްކަތްކުރާ އެންމެން ވެސް ވީހާ ވެސް އަވަހަކަށް ވެކްސިން ޖެހުމަށް ވަނީ އިލްތިމާސްކޮށްފަ އެވެ.

އެ ބަލީގެ ސަބަބުން ފާއިތުވި ދޮޅު އަހަރު މާލެ ސަރަހައްދުގައި ކިޔަވައިދިނީ އޮންލައިންކޮށެވެ. ނަމަވެސް މި މަހުގެ 10 ވަނަ ދުވަހު ފެށި ދިރާސީ އާ އަހަރާއެކު ހުރިހާ ދަރިވަރުން ސްކޫލަށް ހާޒިރުކޮށް ކިޔަވައިދޭން ފަށާފައި ވެ އެވެ.

ކޮވިޑުން ރައްކާތެރިވުމަށް މިހާތަނަށް 364،847 މީހުން ފުރަތަމަ ޑޯޒު އަދި 289،418 މީހުން ވަނީ ވެކްސިންގެ ދެ ޑޯޒު ފުރިހަމަކޮށްފަ އެވެ.